DANIEL 11 - Quichua Imbabura 2016

1Paitaca: “Media shuti llactamanda Darío shuti runa mandai callarijui huatapipash, ñucallatami aliguta yarichishpa shinllichijurcani” nircami.

Janajman tiyaj, uraman tiyaj llactacunata jatun mandajcunamanda

2Cunanga, tucui imalla pactanatami canman villagrini: “Cai Persia llactapica, quimsa jatun mandajcuna mandangarami. Chai quimsapaj cati jatun mandajca, paicunatapash yali ninan charijmi tucunga. Paica, ninan charij, shinllipacha cashpami, Grecia llactata jatun mandajhuan macanajuna yuyaita cushpa tucuicunata pushashpa ringa.

3Chai jipaca, shuj ninan shinlli jatun mandajmi, mandangapa jataringa. Paica, ninan ushaihuan mandashpami, pai munashcata rurajunga.

4Ashtahuangarin llactata mandai callarijushpallata tucuchi tucushpami, chai mandanaca, chuscupi chaupiringa. Na paipaj miraicunaman chaupishpa cungachu. Pai mandajushcashnaca na mandai ushangachu. Pai mandajushcataca tucuchishpami, shujcunaman cunga.

5Shina rurajpimi, urai llactata jatun mandajca, ninan shinlli tucunga. Ashtahuangarin paipaj cati mandajpuramandaca shujmi, paitapash yali shinlli tucushpa, ninan ushaita charij tucunga. Pai mandanaca jatumbachami canga.

6Ña tauca huata jipami, aligutapacha causangapa nishpa ari ninajunga. Urai llactata jatun mandajpaj ushica, alipacha causai tiyachunmi, janaj llactata jatun mandajhuan cazaranga. Shina cashpapash chai huarmica, na unaicaman mandai ushangachu. Paipaj cusapash na mandashpa cati ushangachu. Chai huarmica, paita catijcunandi, paipaj churicunandi, paita yanapaj gentecunandimi, huañuchi tucunga.

7Shina cajpipash paipaj ayllumanda shuj miraimi, pai mandangapa tiyarinapi tiyaringa. Paimi, paipaj macanajuj runacunandi shamushpa, janaj llactata jatun mandajhuan macanajushpa, chai mandajpaj jatun huasita quichunga. Shina mishashpami pai munashcata llaquichinga.

8Chaipi tiyaj dioscunatapash, yacuyachishpa rurashca imamambash rijchajcunatapash, culquita, curita rurashca juyailla charishcacunata llujchishpami, Egipto llactaman apanga. Shina rurashpaca unai huatacunatami, janaj llactata jatun mandajhuanga, macanajushpa causanga.

9Shinallata, janaj llactata jatun mandajca, chai uraman tiyajun llactaman yaicungapa munashpapash, cutinmi paipaj llactamanllata cutin tigranga.

10Ashtahuangarin janajman tiyaj llactata jatun mandajpaj churicunaca, ninanda fiñarishpami, ashtaca macanajuj runacunata tandachinajunga. Chai macanajuj runacunahuan shamushpami, yacu jundamujshna macanajushpa ñapash tucuita tucuchinga. Chai jipaca urai llactata mandajpaj shinlli torrecamanmi chayanga.

11Shinamandami, urai llactata jatun mandajca, ninanda fiñarishpa, janajman tiyaj llactata jatun mandajhuan macanajungapa llujshinga. Paipaj macanajuj runacunata tandachishpa rishpami, janaj llactata jatun mandajtapash, paipaj ashtaca macanajuj runacunatapash mishashpa tucuchinga.

12Chashna ashtaca runacunahuan mishashpami, paipaj shungupica ninanda jariyashpa, ashtaca huaranga huarangacunata huañuchijunga. Chashna cashpapash, na unaicaman mandangachu.

13Shinallata, janajman tiyaj llactata jatun mandajca, cutin macanajungapami pundatapash yali ashtaca macanajuj runacunata tandachinga. Tauca huatacuna jipami, ashtaca macanajuj runacunahuan, ashtahuan alichirishpa ninanda shamunga.

14Chai huatacunapica, ashtaca llactacuna tandanajushpami, urai llactata jatun mandajhuan macanajungapa ringa. Israel llactamandapash na ali yuyaita charij runacunami ringa. Shina cajpipash, Dios ricuchishca pactajpimi tucuicuna mishai tucunga.

15Janaj llactata jatun mandaj uraiman shamushpami, macanajuna chacanacunata shayachishpa macanajushpa, muyundi shinlli pircahuan pueblotaca mishanga. Shina cajpimi, urai llactamanda ashtahuan ali macanajuj runacunaca, ña na macanajui ushashpa, ashtahuan jarcaitaca na ushanga.

16Paicunahuan macanajungapa shamuj jatun mandajca, pai munashcatami llaquichinga. Chashnami, pipash paitaca na mishai ushanga. Paica, juyailla llactapi cashpami, tucui imatapash paipaj ninan ushaihuan tucuchinga.

17Chai jipaca, paipaj ninan mandana ushaihuanmi, urai llactata mishangapa shamunga. Mishashpa tucuchishpami, paipaj ushita chai jatun mandajpaj huarmi cachun cunga. Ashtahuangarin pai imata yarijushcapash, na pactangachu.

18Chai jipaca, mama cucha manñacunapi tiyaj llactacunatami taucacunata mishashpa japinga. Ashtahuangarin shuj mandajmi, pai llaquichijujtaca saquichinga. Pai na alicachishpa rimajushcataca, paimanllatami tigrachinga.

19Chai jipami paica, paipaj llactapi tiyaj shinlli mandana huasiman tigranga. Chaipi cashpa, shuj llaqui japijpi huañujpimi, pipash cutinga na ricunga.

20Paipaj randica, shuj mandajmi tiyaringa. Chai mandajca, pai mandana llactata juyaillata rurangapami, llactaman cuna cashcata japishpa purichun churanga. Chai mandajca, na macanajuiman rishpapash, pipash na fiñajpipash, shuj llaqui shamujpimi na unaita mandashpallata huañuchi tucunga.

21Paipaj randica, napacha ali runami mandangapa tiyaringa. Pai mandashpa tiyajujtaca, pipash na alicachingachu. Ashtahuangarin juyailla shimicunata rimashpa, cungashcapi shamushpami mandai callaringa.

22Paita fiñaj macanajuj runacunaca, yacu jundamushpa urai apajpishnami, paipaj ñaupajpillata tucuringa. Shinallata, tucuita pactachingapa ari ninajushca mandajtapashmi tucuchinga.

23Pihuanbash pactachingapa ari nijushpapash umachishpami llaquichinga. Shina umachishpami, huaquinlla macanajuj runacunahuan cashpapash, mishai ushanga.

24Chai llactapica, ninanda charijyashpa aligutapacha causanajujpimi, paipaj taitacunapash, chai taitacunapaj taitacunapash na rurashcata rurashpa llaquichinga. Paica, macanajuipi quichushcatapash, tucui ima charishcacunatapash, juyailla charishcacunatapashmi paipaj macanajuj runacunaman chaupinga. Shinlli torrecunata imashna tucuchinatami yarijunga. Ashtahuangarin huaquin punllacamanllami, chashna ruranga.

25Ninandapacha fiñarishpami, paipaj ushaita charishcata ricuchingapaca, uraman tiyaj llactata jatun mandajhuan macanajungapa ashtaca macanajuj runacunahuan ringa. Chai llactata jatun mandajpash, ninan shinlli, ashtaca macanajuj runacunahuanmi macanajungapa shayaringa. Ashtahuangarin paitaca, paipaj macanajuj runacunallata umachijpimi, na mishai ushanga.

26Paipaj micunatallata micujcunapashmi, paitaca llaquichinga. Paipaj macanajuj runacunapash ninanda mishai tucushpami huañushpa tucuringa.

27Chai ishcai jatun mandajcunaca, na alita rurana yuyaihuanllami causanga. Shinamandami chimbapura mezapi tiyanajushpapash, llullashpalla parlanajunga. Ashtahuangarin punlla nara pactashcamandami, chai parlashcacunaca yangallata canga.

28Janaj llactata jatun mandajca, ashtaca imacunatapash apashpami, paipaj llactaman tigranga. Shina cashpapash, paipaj shungupica, pactachingapa ari ninajushcata fiñashpami saquichinata yarijunga. Pai munashcata llaquichishpami, paipaj llactaman tigranga.

29Ña punllacuna pactajpimi, urai llactaman tigranga. Ashtahuangarin, cunan chashna rishpaca, na pundashna mishai ushangachu.

30Paihuan macanajungapaca, Quitim shuti llactamandami jatun barcocunapi shamunga. Paicunata manllashpami, llaquirishpa tigranga. Pactachingapa ari ninajushcata fiñashpa saquina yuyaihuanmi, pai munashcata rurashpa tigranga. Shina rijushpami, pactachingapa ari ninajushcata yangapi churajcunahuan, shujlla yuyai tucunga.

31Diospaj huasitapash, muyundi shinlli pircatapash yangapi churangapami, paipaj macanajuj runacunata cachanga. Diosman cushpa punllandi rupachinatapashmi anchuchinga. Chaipica, ninan na ali, millanayaitami churanga.

32Pactachingapa ari ninajushcata na cazujcunataca, uyanayaita llullashpami rimajunga. Ashtahuangarin, Taita Diosta rijsij gentecunaca, shinlli tucushpami imatapash alita ruranajunga.

33Chai pueblomanda alipacha yachajushcacunaca, ashtaca gentecunatami yachachinajunga. Paicunaca, tauca punllacunatami espadahuan huañuchijpi, rupachijpi, prezu apajpi, imatapash quichushpa llaquichijpi causanajunga.

34Chai llaquipi urmajpica, huaquingunaca yanapanajungami. Shinapash ashtacacunami llullashpalla paicunahuan tandanajunga.

35Shinami, alipacha yachajushcapuramanda huaquingunaca, ninanda llaquichi tucunajunga. Paicunaca, Dios agllashca punllacuna pactangacamanmi, mapa illaj cachun tucui mapata anchuchishpa, yurajyachishcashna cangapa chashna llaquita apanga. Chaicunata rurangapapash, punllacuna tiyangarami.

36Chai jatun mandajca, pai munashcata rurashpami jariyashpa, tucui dioscunatapash yali jatun cani yajunga. Tucui dioscunapaj Taita Diostapash, jatun na ali shimicunahuanmi rimajunga. Taita Dios fiñarishpa llaquichina punlla pactangacamanmi, tucuita rurajunga. Ima pactana cashpapash, pactangapachami.

37Paipaj taitacunapaj Taita Diostaca na cazungachu, huarmicunapaj juyaitapash na munangachu. Maijan diostapash na manllashpami, tucuita yalimi cani yajunga.

38Ashtahuangarin Taita Diospaj randica, paipaj taitacunapash na rijsishca, macanajuicunapi shinllichij nishca diostarami alicachinga. Chaitami paica, curita, culquita, juyailla rumicunata, imapash ashtahuan alicunata cushpa alicachinga.

39Shuj na rijsishca diosta mañashpa causajcunata pushamushpami, pipash na urmachi ushanalla, shinlli torrecunataca huacaichinga. Paita alicachijcunataca, ashtaca alicunata carashpami charinga. Alpacunatapash chaupishpami, culquipaj jatujunga.

40Ashtahuangarin, ña punlla chayajpimi, urai llactata jatun mandajca, paihuan macanajugringa. Shinallata janajman tiyaj llactata jatun mandajpash, carretacunahuan, caballocunapi tiyarishca macanajuj runacunahuan, ashtaca barcocunahuanmi, macanajungapa ninan huairahuan tamiashna jataringa. Shina jatarishpami, yacu jundashpa yalijshna, llactacunaman yaicushpa tucuchinga.

41Ñucanchi juyailla llactamambash yaicushpami, tauca llactacunata llaquichijunga. Ashtahuangarin, Edom shuti, Moab shuti llactacuna, shinallata Amón shuti llactapi causajcunallami, ashtacapacha quishpiringa.

42Paipaj ushaihuan, shuj llactacunatapash llaquichishpa catijpimi, Egipto llactapash na quishpiringa.

43Egipto llactamandaca, curita, culquita, ima juyailla tiyashcatapashmi tucuilla apanga. Libia shuti, Etiopía shuti llactacunaca, paitami catinajunga.

44Ashtahuangarin indi llujshimujmandapash, janajmandapash, llaqui villaicuna chayamujpimi, ninanda manllarinajunga. Chaimandami, ninanda fiñarishpa tucuchingapa, ashtacacunata huañuchingapa ringa.

45Pai mandashpa tiyajuna carpacunataca, mama cuchahuan, Diospajlla juyailla jucha illaj urcuhuan chaupipimi shayachinga. Ashtahuangarin paipaj huañuna punlla chayamujpica, maijan yanapajtapash na charingachu.