Psalms 132 - Quichua Imbabura 2016

Diospaj huasita bendiciachun mañashcamandaVichai rinajushpa candanami.

1Mandaj Dioslla,

Davidtaca yaripanguilla.

Pai llaquita apajushcatapash yaripanguilla.

2Mandaj Diosman, juramentushcatapash yaripanguilla.

Jacobpaj, ninan ushaita charij Diostaca, cashna nishpami ari nijurca:

3“Ñuca causajuj huasimambash, na yaicushachu.

Ñuca camapipash na samashachu.

4Ñuca ñavitapash, napacha puñuchun saquishachu.

Ñavitallapash na vichashachu.

5Mandaj Diospaj causana pushtuta taringacaman,

Jacobpaj, ninan ushaita charij Diospaj huasita shayachingacaman, napacha samashachu” nijurcami.

6Efrata shuti pueblopimi uyarcanchi.

Quirucuna shayanajuj pambacunapimi, chaitaca tarircanchi.

7Diospajlla huasiman yaicushpami,

Paipaj chaqui ñaupajpi cungurishunchi.

8Mandaj Dioslla,

jatarishpa Can samana pushtuman ripashunyari.

Cambash, Cambaj ninan ushaita charij arcandi ripashunyari.

9Cambaj sacerdotecunaca, alitalla ruranahuan churajushcashna cachun.

Cambajlla causajcunaca, ninanda cushijuchun.

10Cambajta ruraj Davidtaca ninandami juyajungui.

Can agllashca mandajtaca ama saquipanguichu.

11Mandaj Diosca, na llullashpami, Davidmanga cashna nishpa juramenturca:

“Can mandashpa tiyajushcapica, cambaj miraitami churasha.

12Cambaj churicuna ñucahuan ari ninajushcatapash,

Ñuca mandashca shimicunatapash pactachishpaca,

can mandashpa tiyarinapica, tucui causaipimi mandanajunga” nijurcami.

13Mandaj Diosmi, Sion pueblotaca agllarca.

Pai chaipi causangapa agllashpami, cashna nijurca:

14“Caimi, causaita causaicaman ñuca samana pushtu canga.

Caipi causangapa munashpami agllarcani.

15Ashtaca micuna tiyachunmi, ninanda bendiciasha.

Imagutapash na charijcuna, na ushangacaman micuchunmi, chashna carasha.

16Shinallata, paicunapaj sacerdotecunamambash,

churajunata churachinshnami quishpichisha.

Diospajlla causajcunaca, ninan cushijuihuanmi alicachinajunga.

17Chaipimi, Davidpaj ushaihuan mandanaca, cutin shayaringa.

Ñuca agllashca mandajtami, lamparahuanshna punchayachisha.

18Paita fiñajcunataca, pandarinajuchunmi saquisha.

Ashtahuangarin, Davidpaj umapica, juyailla coronami sisashna ricuringa” nijurcami.