JEREMÍAS 40 - Quichua Imbabura 2016

Jeremiasmandapash, Gedalías runahuan puchushca Israelcunamandapash

1Jerusalén pueblopi causajcunatapash, Judá llactapi causajcunatapash, Babilonia llactaman prezu apanajushpami, macanajuj runacunata mandaj Nabuzaradán runaca, Jeremiastaca, Ramá shuti pueblopi cacharirca. Chai punllacunami Mandaj Diosca, Jeremiasman rimarca.

2Shinallata, Macanajuj runacunata mandaj runapash, Jeremiastaca cashnami nirca: “Canda Mandaj Diosca, cai pueblota llaquichinatami villahuarca.

3Mandaj Diosca, Pai nishcashnami, cai llaquicunata cachamushca. Cangunallata juchata rurashpa, Mandaj Diosta na cazushcamanda, Pai rimashca shimicunata na uyashcamandami, cai tucui llaquicunaca cangunapajman shamushca.

4Cunanga, cambaj maquita huatashcataca, ñucami cacharichircani. Babilonia llactaman ñucahuan ringapa munashpapash jaculla, candaca, ñucami huacaichisha. Babilonia llactaman ñucahuan na ringapa munashpaca, can maiman munashcaman rilla.

5Caipillata causangapa munashpaca, Ahicam shuti runapaj churi Gedalías runapajman tigrailla. Gedalías runataca, Babilonia llactata jatun mandajmi, Judá llactapi tiyaj pueblocunapi causajcunata mandachun churarca. Judá llactapi saquirishpa, cambaj llactapuracunahuan causagrilla. Na cashpaca, maipi ashtahuan ali causanata ricushpa chaiman rilla. Gedalías shuti runaca, Ahicam shuti runapaj churimi. Ahicam shuti runaca, Safán shuti runapaj churimi” nijurcami. Shina nishpami, macanajuj runacunata mandajca, micunatapash, shuj caranacunatapash carashpa, Jeremiastaca, cayacaman nishpa cacharca.

6Jeremiasca, Ahicam shuti runapaj churi Gedalías shuti runapajman, Mizpa shuti pueblomanmi tigrarca. Chaipimi, Judá llactaman puchushca gentecunahuan causajurca.

7Babilonia llactata jatun mandajca, Ahicam runapaj churi Gedalías runatami, Judá llactatapash, chaipi puchushca jaricunata, huarmicunata, huahuacunata, huajchacunatapash mandachun churashca carca. Chai gentecunata mandachun paita saquishcataca, pambacunapi macanajuj runacunata mandajcunapash, tucui macanajuj runacunapashmi yachaj chayarca.

8Chai jipaca, Netanías shuti runapaj churi Ismael shuti runapash, Carea shuti runapaj Johanán shuti, Jonatán shuti churicunapash, Tanhumet shuti runapaj churi Seraías shuti runapash, Netofa pueblomanda Efai shuti runapaj churicunapash, Maaca pueblomanda shuj runapaj churi Jezanías shuti runacunapash, paicunapaj macanajuj runacunandimi, Mizpa shuti puebloman, Gedalías runapajman shamunajurca.

9Paicunatapash, macanajuj runacunatapash, Safán shuti runapaj churi Ahicam shuti runapaj churi Gedaliasca, cashnami nirca: “Caldeo runacunapaj gañan tucunataca, na manllanachu canguichi. Chai llactapillata causashpa, Babilonia llactata jatun mandajpajta rurashpa causashpaca, alimi causanguichi.

10Caldeo runacuna cangunapajman shamujpica, cangunapaj randi ñuca shayaringapami, cai Mizpa shuti pueblopi causajuni. Ashtahuangarin cangunaca, vinota, aceiteta, rupai punllacunapi tandachishca granocunatapash, alichina huasicunapi alichishpa, canguna causana pueblocunapi shuyaichilla” nijurcami.

11Shinallata, Judá llactamanda gentecunaca, Moab, Amón, Edom llactacunaman, shinallata caishuj llactacunaman rishpami causanajurca. Paicunami, Babilonia llactata jatun mandaj, huaquin gentecunataca Judá llactapillata saquishcata yachaj chayarca. Chaipi saquirishcacunata mandachunga, Safán shuti runapaj churi Ahicam shuti runapaj churi Gedaliasta saquishcatami yachaj chayarca.

12Chaita yachashpami, chai llactacunapi causanajushca Judá llactamanda gentecunaca, paicunata llujchishpa cachajpi rishca pushtumanllata tigramunajurca. Paicunaca, Judá llactapi Mizpa shuti pueblopi tiyaj Gedalías runapajmanmi shamunajurca. Chaipimi, vinotapash, granocunatapash ashtacata tandachinajurca.

Ismael shuti runa, Gedalías runata llujchingapa yarijushcamanda

13Carea shuti runapaj churi Johanán shuti runapash, pambacunapi pacajushpa saquirishca macanajuj runacunata mandajcunapashmi, Gedalías shuti runapajman, Mizpa shuti puebloman shamunajurca.

14Paicunami, Gedalías runataca cashna ninajurca:

“Amón llacta gentecunata jatun mandaj Baalis shuti runaca, Netanías shuti runapaj churi Ismael shuti runatami, canda huañuchichun cachamushca. ¿Chaitaca, nachu yachangui?” ninajurcami.

Shina ninajujpipash, Ahicam shuti runapaj churi Gedalías runaca na uyarcachu.

15Shinamandami, Carea shuti runapaj churi Johanán shuti runaca, Mizpa shuti pueblopillata Gedalías runataca, pacalla cashna nirca:

“Netanías runapaj churi Ismael shuti runataca, cunanda rishpami huañuchigrisha. Chaitaca, pipash na yachangachu. ¿Imashpata candaca huañuchinga? Canhuan tandanajushca, Judá llactapi causajcunapash, ¿Imashpata caita chaita rinajunga? Chai huaquinlla puchushca, Judá llactapi causajcunapash, ¿Imashpata tucuringa?” nircami.

16Shina nijpipash, Ahicam shuti runapaj churi Gedalías runaca, Carea shuti runapaj churi Johanán shuti runataca:

“Ama chaita ruragrichu. Ismael runataca, napash chashna rurangapa munajujpitami, yangata juchachijungui” nircami.