2 CRÓNICAS 33 - Quichua Imbabura 2016

Manasés runa mandajushcamanda(2 Rey. 21:1-18)

1Manasés shuti runaca, chunga ishcai huatata charishpa, mandai callarishpaca, picha chunga picha huatatami Jerusalenbi mandajurca.

2Paica, Israelcunapaj ñaupajmanda, Mandaj Dios llujchishpa cachashca gentecuna na alicunatalla rurashcashnami, Mandaj Diospaj ñaupajpica, na alitalla rurashpa causajurca.

3Lomacunapi altarcunata paipaj taita Ezequías shitashcatapash cutin shayachishpami, Baal shuti dioscunamambash, altarcunata rurarca. Asera shuti huarmi diosman rijchajcunata rurashpami, Jahua pacha tucui luzerocunapaj ñaupajpi cungurishpa ninanda alicachijurca.

4Shinallata, Mandaj Diospaj huasipipashmi altarcunata rurachirca. Chai huasitami, Mandaj Diosca: “Jerusalenbi tiyajuj huasipimi, ñuca shutita churasha” nishca carca.

5Paica,Mandaj Diospaj huasi pungupimi, jahua pachapi tiyaj luzerocunaman altarcunata rurachirca.

6Manasés runaca, paipaj churicunata dioscunaman cushpami, Ben-Hinom shuti pugru pambapi rupachijurca. Paica: Ayacunata cayajpash, ima tucunata yachajpash, brujucunata, yachajcunata tapushpa causajpashmi carca. Mandaj Diospaj ñaupajpi chashna yapa na alita rurashpami, ninandapacha fiñachijurca.

7Manasés runaca, shuj diosman rijchajta rurashpami, Diospaj huasipi churarca. Chai huasimandami Mandaj Diosca, Davidtapash, paipaj churi Salomondapash cashna nishca carca: “Jerusalén pueblotaca, tucui Israel ayllupuramandami agllarcani. Cai huasipimi Ñuca Shutitaca, causaita causachun churasha.

8Tucuita Ñuca mandashcatapash, Ñucapajta ruraj Moisés mandashcatapash, cazushpa pactachinami canguichi. Chashna causajpillami, cangunapaj ñaupa taita Israelcunapaj llactamandaca, napacha cutinga llujchishpa cachasha” nishcami carca.

9Manasesca, Judá llactapi, Jerusalén pueblopi causajcunataca, ashtahuanmi na alita rurachishpa pandachirca. Paicunapaj punda taitacunapaj ñaupajpi Mandaj Dios tucuchishca, shuj llactamanda gentecunatapash yali na alita rurana yuyaitami curca.

10Mandaj Diosca, Manasés runatapash, Pai agllashca Israelcunamambashmi villarca. Chashna cajpipash paicunaca napacha cazurcachu.

11Chaimandami Mandaj Diosca, paicunata llaquichijuchunga, Asiria llactata jatun mandajpaj macanajuj runacunata mandajcunata cachamurca. Paicunami, Manasés runataca, grillocunata churachishpa, cadenacunahuan huatashpa, Babiloniaman prezu apanajurca.

12Chashna ninan llaquicunata apajushpami Manasés runaca, paipaj ñaupa taitacunapaj Taita Diospaj ñaupajpi ninandapacha pingai tucushpa, urai cumurishpa, Mandaj Taita Diosta mañajurca.

13Chashna ninandapacha mañajujta, Taita Dios uyashpami, Judá llactataca paillata mandashpa catichun, Jerusalenman cutin tigrachirca. Shina rurajpimi Manasés runaca, Mandaj Diostaca Taita Diospacha cajta yacharca.

14Chai jipami Manasesca, Davidpaj pueblo canlla muyundita jatun pircata rurarca. Indi huashajunman tiyaj Gihón shuti pugru pambamanda pircai callarishpaca, pijicunahuan yaicuna pungucamanmi pircarca. Chai jipami, Ofel shuti pueblo muyunditapash, ashtahuan jatun pircata rurachirca. Judá llactatapica, muyundi jatun pircacunata charij tucui pueblocunapimi, macanajuj runacunata mandajcunata churarca.

15Shinallata Mandaj Diospaj huasimandaca, shuj dioscunatapash, rurashcalla diostapashmi anchuchirca. Lomapi huasichishca, Mandaj Diospaj huasipi rurashca tucui altarcunatapash, Jerusalenbi rurashca altarcunatapashmi, pueblomanda llujchishpa shitarca.

16Chai jipaca, Mandaj Diospaj altarta cutin alichishpami, Dioshuan ali cangapa cushca animaltapash, Diosta alicachishpa chai altarpillata huañuchijurca. Shinallata Judá llactapi causajcunataca, Israelcunata Mandaj Taita Diospajta ruranajuchunmi mandarca.

17Ashtahuangarin gentecunaca, paicunata Mandaj Taita Diosman animalcunata carashpaca, lomacunapi tiyaj altarcunapillatami huañuchinajurca.

18Manasés runa ashtahuan imatalla rurashcapash, paipaj Taita Diosta mañashcapash, Israelcunata Mandaj Taita Diospaj shutipi profetacuna paita rimashca shimicunapash, Israel llactata jatun mandajcuna imatalla rurashcacunata quilcashca libropimi tucuillata tiyajun.

19Taita Diosta pai mañajpi uyashcapash, tucui juchacunata rurashcapash, yachashpata na cazushcapash, na alita rurashcamanda nara llaquirishpa, maipilla altarcunata rurashca pushtumandapash, Asera shuti huarmi diosman rijchajcunata churashcapash, rurashcalla dioscunata rurashcapash, Dios ricuchishcata villajcuna quilcashcapimi tiyajun.

20Manasés huañushpa, paipaj ñaupa taitacunahuan tandanajugrijpica, mandana huasipimi pambarca. Paipaj randica, Amón shuti paipaj churimi mandajurca.

Amón runa mandajushcamanda(2 Rey. 21:19-26)

21Amón shuti runaca, ishcai chunga ishcai huatata charishpa, mandai callarishpami, Judá llactataca ishcai huatata Jerusalenbi mandajurca.

22Paipash, Mandaj Diospaj ñaupajpica, paipaj taita Manasés rurashcashnami na alitalla rurajurca. Paica, paipaj taita Manasés rurachishca rurashcalla dioscunaman animalcunata cushpa huañuchishpami causajurca.

23Paica, Mandaj Diospaj ñaupajpica, paipaj taita Manasés llaquirishpa ali tucushcashnaca, na ali tucurca. Ashtahuangarin juchacunatallami rurashpa catijurca.

24Jatun mandaj Amón shuti runataca, paipajta ruraj runacuna fiñashpami, pacalla rimarishpa, paipaj huasipillata huañuchirca.

25Shinamandami, chai llactapi causajcunaca, pacalla rimarishpa jatun mandaj Amón shuti runata huañuchijcunataca, tucuillata huañuchirca. Chai llactapica, Amón runapaj randi mandachunmi paipaj churi Josías runata, jatun mandaj cachun churanajurca.