1Tauca punllacuna yalishpa, ña quimsa huata tucujpimi Mandaj Diosca, Eliasman cai shimicunata nirca: “Acab shuti runapaj ñaupajpi ricuringapa ri. Ñucami, cai pachapi tamiachisha” nircami.
2Shina nijpimi Eliasca, Acab runapaj ñaupajpi ricuringapa rirca. Samaria pueblopica, jatun yarjaimi tiyarca.
3Chaimandami Acab runaca, Abdías shuti paipaj mayordomota cayashca carca. Abdías runaca, Mandaj Diosta ninanda manllaj runami carca.
4Jezabel huarmi mandajpi, Mandaj Diospaj profetacunata catiriyashpa huañuchinajui punllacunapimi, Abdías runaca, patsaj profetacunata pushashpa, picha chungataca shuj jatun utujupi, shuj picha chungataca caishuj jatun utujupi pacarca. Chaipimi tandata, yacuta carashpa charirca.
5Chai Abdías runatami, Acab runaca cashna nirca:
“Cai llactapi tiyaj pugyucunaman, huaicucunaman rishpa jihuata mascashpa apamugripashun, chashna rurajpica caballocuna, mulacuna causaj saquiringapashchari” nircami.
6Chai jipami, chai llactata maitalla ringapapash, paipura shicanyarishpa, Acab runaca shuj ñanda, Abdiasca caishuj ñanda rinajurca.
7Ñanda rijushpallatami Abdiasca, Eliashuan tuparirca. Shina tuparishpaca, Elías cajta rijsishpami Abdiasca, cungurishpa, urai cumurishpaca:
“Canga, ¿nachu ñucata mandaj Elías capangui?” nirca.
8Shina nijpimi, Eliasca:
“Ari, ñucami cani: ‘Eliasca caipimi’ nishpa, canda mandajman villagri” nirca.
9Shina nijpimi Abdías runaca, cashna nirca:
“Cambajta ruraj ñucata huañuchijuchun, Acab runapaj maquipi churachunga, ¿ima juchatata rurapashcani?
10Canda Mandaj Taita Diosca ricujumbachami. Tucui llactacunaman, tucui mandajcunapajmanmi ñucata mandaj Acab runaca, canda mascachun cacharca. Tucui paicunami: ‘Eliasca na caipichu’ ninajurca. Shina nijpimi, chai mandajcunatapash, chai llactacunapi causajcunatapash canda na ricushcata juramentuchirca.
11¿Chashna cajpitachu cunanga: ‘Eliasca caipimi nishpa, canda mandajman villagri’ nihuangui?
12Ñuca rishca jipaca, cashnami tucunga: Mandaj Diospaj Espiritumi, candaca ñuca na yachai ushanallaman apanga. Chashna apashca cajpi, Acab runaman ñuca villagrijpi, canda na caipi tuparij shamushpaca, ñucatami huañuchinga. Cambajta ruraj ñucaca, huambramandapachami Mandaj Diosta manllashpa causani.
13Profetacunata, Jezabel huarmi huañuchijujpi, ñuca imatalla rurashcataca, ¿nachu ñucata mandajman imatallapash villaparca? Profetacunataca, picha chungataca shuj jatun utujupi, caishuj picha chungataca caishuj jatun utujupimi pacarcani. Chashna pacashpami tandata, yacuta carashpa charircani.
14¿Ñucata pai huañuchijuchun munashpachu, cunanga: ‘Eliasca caipimi nishpa, canda mandajman villagri’ nihuangui?” nircami.
15Shina nijpimi Eliasca, cashna nirca:
“Tucuita Mandaj Diosca ricujumbachami. Paipaj ñaupajpimi cani. Cunanga, Acab runapaj ñaupajpi ricuringapa rishallami” nirca.
16Shina nijpimi Abdías runaca, Acab runahuan tuparingapa rishpa, Eliasta tuparishcata villarca. Shina villajpimi Acab runaca, Elías runahuan tuparingapa shamurca.
17Acab runaca, Eliasta ña ricushpami:
“¿Canllu Israelcunata pandachij cangui?” nirca.
18Shina nijpimi Eliasca, cashna nirca:
“Israelcunataca, na ñuca pandachircanichu. Ashtahuangarin canhuan, cambaj taitapaj huasi ucupurahuanmi, Mandaj Dios mandashcacunata saquishpa, Baal shuti dioscunatara catishpa pandachircanguichi.
19Cunanga, tucui Israelcunata Carmelo shuti lomapi tandanajuchun cachai. Shinallata, Baal shuti diospaj chuscu patsaj picha chunga profetacunatapash, Asera shuti huarmi diospaj chuscu patsaj profetacunatapash tandanajuchun cachangui. Paicunamanga, Jezabel shuti huarmimi micunata carashpa charijun” nircami.
Eliasmandapash, Baal shuti diospaj profetacunamandapash20Acab runaca, tucui Israelcunata cayachishpami profetacunataca, Carmelo shuti lomapi tandachirca.
21Chai tucuilla gentepajman quimirishpami Eliasca cashna nirca:
“¿Ima punllacamanda cangunaca, ishcai shungu tucushpa causagringuichi? Mandaj Dios, Taita Dios cajpica, Paita catichi. Ashtahuangarin Baal shuti dios, cangunapaj Dios cajpica, paita catishpa richilla” nircami.
Shina nijpica gentecunaca, imatallapash na nircachu.
22Eliasca, gentecunataca cutinmi cashna nirca:
“Mandaj Diospaj profetaca, ñucallami puchushcani. Ashtahuangarin Baal shuti diospaj profetacunaca, chuscu patsaj picha chunga runacunami tiyan.
23Shina cashcamanda, ishcai huagrata apamuichi. Chaitaca, chai profetacuna agllashpa, shujtaca huañuchishpa, asha asha fitishpa yamda jahuapi churashpa, ninataca ama japichishca cachun. Shinallata caishuj huagratapash, chashnallatami rurasha.
24Chai jipaca cangunapash, cangunapaj dioscunapaj shutipi mañaichilla. Ñucapash, Mandaj Diospaj shutipimi mañasha. Mañajujta uyashpa, maijan Dios cashpapash ninata cachamushpa japichijmi, Taita Diospacha canga” nircami.
Shina nijpimi, tucuilla gentecuna:
“Alitapachamari ningui” ninajurca.
25Shina nijpimi Eliasca, Baal shuti diospaj profetacunataca cashna nirca:
“Canguna ashtaca cashcamandaca, cangunara shuj huagrata agllashpa alichishpa churaichi. Chai jipaca, cangunapaj dioscunapaj shutipi mañaichi. Ashtahuangarin yamda ucupica, ninataca na churanachu canguichi” nircami.
26Shina nijpimi, chai profetacunaca, paicunaman cushca huagrata japishpa huañuchirca. Chashna huañuchishpa alichishpami, tutamandata callarishpaca, chaupi punllacaman: “¡Baal, ñucanchi mañashcata uyapai!” nishpa, Baal shuti diospaj shutipi mañanajurca. Ashtahuangarin parlajllapash, maijan tigrachijllapash na uyarircachu. Paicunaca, paicunallata rurashca altar ñaupajpimi fahuashpa muyunajurca.
27Ña chaupi punlla tucujpica: Eliasca, paicunata asishpa ricushpami, cashna nirca:
“Paica diosmari, shinllita caparichilla. Paica, imatapashmi yarijunga, na cashpaca imatapashmi rurajunga. Na cashpaca maimambashmi rishcanga, na cashpaca puñujungami, rijchachinami canga” nircami.
28Shina nijpimi paicunaca, ashtahuan shinllita caparinajurca. Paicuna imashna ruranata yachan cashcashnami, cuchillocunahuan, tucsina uchilla jirrucunahuan chugririshpa yahuarsapa fahuanajurca.
29Ña chaupi punlla yalishcapipash paicunaca, Diosman animalta carashpa huañuchinapimi, juizu illajcunashna caparinajurca. Chashna caparinajujpipash, pipash na parlarcachu, pipash na uyashpa tigrachircachu.
30Chaimandami Eliasca, tucui gentecunataca:
“Ñucapajman quimirimuichi” nirca.
Shina nijpimi, tucuilla quimirinajurca. Chaipimi Eliasca, Mandaj Diospaj altarta urmachishcata alichirca.
31Eliasca, Jacobpaj churicuna, chunga ishcai ayllucuna cashcamandami, chunga ishcai rumicunata japirca. Mandaj Diosca, Jacobtaca: “Cambaj shutica Israelmi canga” nishcami carca.
32Chai rumicunahuanmi, Mandaj Diospaj shutipi shuj altarta rurarca. Chai jipami, chai altar muyundipi uchilla larcata rurarca. Chaipica, ishcai taza granota churai pactaimi carca.
33Chai jipaca, altar jahuapi yamdata churashpami, huagrata huañuchishpa asha asha fitishpa, yamda jahuapi churarca.
34Chai jipami, cashna nirca:
“Chuscu fundupi yacuta jundachishpa, Diosman cushpa tucuilla rupachina aicha jahuapipash, yamda jahuapipash talichi” nijpimi, chashna talinajurca.
Chai jipapash:
“Cutin shujtapash talichilla” nijpimi, cutinbash talinajurca.
Chashna talijpipash:
“Cutinbash talichilla” nijpimi, caihuanga ña quimsacaman talinajurca.
35Chashna talijpica, altar muyundita yacu jicharishpami, chai muyundi larcapipash yacu jundarca.
36Diosman animalta cushpa tucuillata rupachina ña chayajpimi, profeta Eliasca, altarman quimirishpa cashna nishpa mañarca: “Abrahamda, Isaacta, Israelta Mandaj Taita Dioslla, Israel llactapica canlla Taita Dios cashcata cunanga ricuchipai. Shinallata, ñucapash, Cambajta ruraj cajta, Can mandajpi tucui caicunatapash rurajushcata ricuchipai.
37Mandaj Dioslla, ñuca mañajujta uyashpa tigrachihuailla. Chashna rurajpimi, Can Mandaj Diostaca, Taita Diospacha cajta yachanga. Paicunapaj yuyaitapash, Canllata cambajman tigrachij cajtapashmi yachanga” nishpami mañarca.
38Chashna mañajpimi, Mandaj Dios cachamujpi nina urmamushpa, Diosman carashpa tucuilla rupachina aichatapash, yamdatapash, rumitapash, alpatapash rupachirca. Shinallata, uchilla larcapi jundashca yacutapashmi chaquichirca.
39Chaita tucui gentecuna ricushpami cungurishpa: “¡Mandaj Diosmari, Taita Diospacha. Mandaj Diosmari, Taita Diospacha!” ninajurca.
40Chaimandami Eliasca, cashna nirca:
“Baal shuti diospaj profetacunaca, shujllapash ama pacajushpa calpachun saquishpa, tucuillata japichi” nircami.
Shina nijpimi, tucuillata japinajurca.
Shina japijpimi Eliasca, Cisón shuti huaicu yacuman apashpa, chai profetacunataca cungata fitishpa huañuchirca.
Eliasca tamiachunmi mañashca41Chai jipami Eliasca, Acab runataca cashna nirca:
“Micushpa, ufiashpa tiyajungapa vichai rilla. Ñamari ninan tamia uyarimujun” nircami.
42Shina nijpimi Acab runaca, micushpa ufiashpa tiyanajungapa vichai rirca. Eliasca, Carmelo shuti lomamanmi vichai rirca. Chaipimi Eliasca alpapi cungurishpa, paipaj ñavitapash cunguri chaupipi churashpa tiyajurca.
43Chaipimi, paipajta ruraj runataca:
“Cunanga, vichai rishpa mama cuchata ricugri” nirca.
Shina nijpi, pai vichai rishpa ricushpami:
“Imapash na ricurinllu” nirca.
Shina nijpimi, Eliasca:
“Canchiscaman tigrashpa ricugri” nirca.
44Shina nijpi, ña canchiscaman ricungapa rishpami, cashna nirca:
“Shuj runapaj maqui tablashnalla asha fuyutami, mama cuchamanda vichai jatarijujta ricuni” nircami.
Shina nijpimi Eliasca, chai runataca cashna nirca:
“Ama tamia japichun, caballocunapi carretata huatashpa ucha urai rilla, ninmi nishpa, Acab runaman villagri” nircami.
45Chashna villajpi ña alichirinajujpimi: Huairahuan fuyu shamushpami, jahua pacha yanayashpa ninandapacha tamiarca. Chaimandami Acab runaca, carretapi tiyarishpa Jezreel shuti puebloman shamurca.
46Ashtahuangarin Eliasca, Mandaj Dios pushajpimi, paica alitapacha chumbilirishpa, Acab runata mishashpa, Jezreel shuti puebloman chayajta calparca.
Who We AreWhat We EelieveWhat We Do
2025 by iamachristian.org,Inc All rights reserved.
