OSEAS 6 - Quichua Imbabura 2016

1Shamuichi, Mandaj Diospajman tigrashunchi.

Paimi, ñucanchitaca ninanda llaquichirca.

Paillatami jambinga.

Pai chugrichishcataca, Paillatami jambinga.

2Ishcai punlla jipaca, cutinmi ali causaita caranga.

Quimsa punlla jipaca, cutin causachijpimi, Paipaj ñaupajpi causashun.

3Chashna rurajpimi, Mandaj Diostaca ali rijsishun.

Paita ashtahuan rijsingapa munashpami purishun.

Paica, tutamandata punllayamunshnami, ñucanchipajman shamunga.

Punda tamia, jipa tamia, shamujshnami, ñucanchipajman shamunga.

4Taita Diosca: “Efrainmanda miraicuna, ¿cangunataca imatata rurashayari?

Judá llactapi causajcunalla, ¿cangunataca imatata rurashayari?

Canguna juyaica tutamandata fuyu ricurimushpa chingashcashnami,

shinallata ña punllayamujujpi jamzi tamia ñapash yalishcashnami.

5Chaimandami, Ñuca ima nishcata villachun, profetacunata cachamurcani.

Ñuca ima nishcata pactachishpami tucuchisha.

Rayuta shitamujshnami, cangunataca llaquichishpa tucuchisha.

6Animalta Ñucaman cushpa huañuchingapa randica, shujcunata llaquishpa ali yarishpa causachunmi munani.

Animalta Ñucaman cushpa tucuillata rupachinapa randica, cangunapaj Dios Ñucata cazuchunmi munani.

7Ashtahuangarin paicunaca, Adanshnallatami imata ari nishcatapash, na pactachinajurca.

Paicunaca, yachashca jahuami, Ñucataca na cazunajurca.

8Galaad pueblopi causaj gentecunaca,

napacha alicuna cashpami, gentecunataca huañuchishpa tucuchirca.

9Ñambi chapashpa huañuchij shuhuacunashnami,

sacerdotecunapash, Siquem shuti puebloman rina ñambi chapashpa huañuchinajun.

Chashnami, paicunaca na alitalla rurashpa causanajun.

10Israel llactapi causaj gentecunataca,

chashna na alitalla rurashpa causajtami ricurcani.

Chaipimi, Efraín ayllucunapash,

Israel gentecunapash ninan juchacunata rurashpa causanajurca.

11Judá llactapi causajcunalla,

Ñuca agllashcacuna prezu tiyajushcamanda tigrachimui punllacunami,

cangunatapash, grano fucushcata tandachijshna llaquichina punlla chayamunga.