2 CRÓNICAS 15 - Quichua Imbabura 2016

Asa shuti runa, Diospajta ruranacunata mushujyachishcamanda(1 Rey. 15:13-15)

1Obed shuti runapaj churi Azarías shuti runaman, Taita Diospaj Espíritu shamujpimi,

2Asa shuti runahuan tuparingapa rishpa, cashna nijurca: “Cambash, Judá llacta, Benjamín llacta runacunapash, uyaichi: Canguna Mandaj Dioshuan cajpica, Paipash cangunahuanmi canga. Canguna, Paita mascashpaca, Paihuan tuparinguichimi. Ashtahuangarin, Paita saquijpica, Paipashmi cangunata saquinga.

3Israelcunaca, tauca punllacunatami, Taita Diospachapash illaj, yachachij sacerdotepash illaj, Dios mandashcapash illaj causanajurca.

4Shina cashpapash, paicunaca jatun llaquipi cashpami, Israelcunata Mandaj Taita Diospajman tigrarishpa, Paita mascashpaca, Paihuan tuparinajurca.

5Chai huatacunapica, llujshishpa rijcunapajpash, tigramujcunapajpash ali causai illajpimi, tucui chai llactapi causanaca ninan llaquipi causanajurca.

6Shujcunaca, caishujcunata, shuj puebloca, caishuj pueblocunatami tucuchinajurca. Tucui llaquicunata Taita Diosllata cachamujpimi, chashna causanajurca.

7Ashtahuangarin cangunaca, shinlli tucushpami Taita Diosta cazuna canguichi. Shina cashpami, ima alita rurashcamandaca alitallata japinguichi” nijurcami.

8Asa shuti runaca, Obed shuti runapaj churi profeta Azarías villashcata uyashpa, shinlli tucushpami, Judá llactamanda, Benjamín llactamanda, shinallata Efraín urcu alpacunapi tiyaj, pai quichushca pueblocunamandapash, na ricunayai dioscunata anchuchirca. Shina rurashpami, huasiman yaicunapi tiyajuj, Mandaj Diospaj altartapash cutin alichirca.

9Chai jipaca, Judá, Benjamín ayllucunatapash, shinallata Efraín, Manasés, Simeón ayllucunahuan, shuj llactamanda shamushpa causanajuj gentecunatapashmi tandachirca. Israelcunaca, Mandaj Taita Dios, Asa shuti runahuan cajta ricushpami, chashna tandanajurca.

10Asa shuti runaca, Judá llactataca, chunga picha huatata mandajujpimi, chai huatapaj quimsa quillapi, Jerusalenbi tandanajurca.

11Chai punllallatami macanajuipi quichushpa apamushca, canchis patsaj huagracunata, canchis huaranga llamacunata, Mandaj Diosman cushpa huañuchinajurca.

12Shina rurashpami, aligutapacha yarishpa, paicunapaj ñaupa taitacunata Mandaj Taita Diostaca, tucui shunguhuan, tucui almahuan cazushpa causangapa ari ninajurca.

13Israelcunata Mandaj Taita Diosta na cazungapa munajcunaca, rucu cashpa, huahua cashpa, jari cashpa, huarmi cashpapash, tucuicunami huañuchi tucuna carca.

14Trompetacunata, bocinacunata huacachinajujpimi, ninanda cushijushpa, Mandaj Diostami cazushun nishpa juramentunajurca.

15Chashna rurashpami, Judá llactapi causajcunaca cushijushpa, tucui shunguhuan juramentunajurca. Paicunapaj tucui shunguhuan mascashcamandami, Mandaj Diosca, paicuna maipi cajpipash ali causaita cararca.

16Jatun mandaj Asa shuti runaca, Asera shuti huarmi diosman rijchajta rurashcamandami, Maaca shuti paipaj mamatapash mandashpa tiyajushcamanda anchuchirca. Asa shuti runaca, chai huarmi diostaca faquishpa ñutushpami, Cedrón shuti huaicu yacu manñapi rupachirca.

17Tucuita chashna rurashpapash, Israel llactamandaca, lomacunapi tiyaj altarcunataca na tucuillata anchuchircachu. Shina cashpapash, Asa shuti runaca, paipaj tucui causaipimi, Diosta tucui shunguhuan cazushpa causajurca.

18Paica, culquita, curita, imalla tiyashcacunata, paipash, paipaj taitapash, Diospajlla cachun shicanyachishcataca, Taita Diospaj huasimanmi apamurca.

19Shinallata, Asa shuti runa quimsa chunga picha huatata mandajui huatacunapica, jatun macanajuica na ashtahuan tiyarcachu.