1 CRÓNICAS 22 - Quichua Imbabura 2016

1Davidca: “Mandaj Taita Diospaj huasica caipimi shayaringa. Israelcuna, Diosman animalcunata cushpa tucuillata rupachina altarpash, caipillatami canga” nircami.

Diospaj huasita shayachingapa alichinajushcamanda

2Chai jipami Davidca, caru llactamanda shamushpa Israel llactapi causanajuj runacunataca, tandanajuchun mandarca. Paicunapuramanda huaquindaca, Taita Diospaj huasita shayachingapa, rumicunata llagllashpa juyaillaguta rurachunmi mandarca.

3Shinallata, chai huasi pungucunata shayachingapaca, ashtaca jirrucunata rurashpami tandachirca. Shinallata broncetapash, na pezai ushangacamanmi tandachirca. Cedro caspitapash, na yupai ushanalla ashtacatami tandachirca.

4Sidón shuti, Tiro shuti llactacunapi causajcuna, chai cedro caspicunata, ashtacatapacha Davidpajman apamushca cajpimi, chashna tandachirca.

5Davidca cashnami nirca: “Ñuca churi Salomonga, chairalla huambragurami. Mandaj Diospaj huasitaca, aligutapacha juyaillagutami shayachina. Tucui llactacunapi rijsishca, alicachishca cachunmi, chashna rurana. Shina cashcamanda cunanga, ñucallatami tucuita alichigrini” nirca.

Davidca nara huañushpallatami, tucuita ninandapacha alichijurca.

6Chai jipami Davidca, paipaj churi Salomonda cayashpa, Israelcunata Mandaj Taita Diospaj huasita imashna shayachina cashcata mandarca.

7Davidca, Salomondaca cashnami nijurca: “Ñuca huahualla, ñucata Mandaj Taita Diospaj shutipi mañana huasiguta shayachina munaitami, ñuca shungupica charircani.

8Ashtahuangarin Mandaj Diosca, cashnami nihuarca: ‘Canga, jatun macanajuicunata rurashpami, ashtacacunata huañuchishpa yahuarta jicharcangui. Chaimandami, Ñuca shutipi mañana huasitaca, canga na shayachi ushangui. Canga, Ñuca ñaupajpica, ashtaca yahuartami alpapi jicharcangui.

9Ricui, canga shuj churitami charigringui. Paica, pihuambash na macanajuita charingachu. Ñucallatami, muyundi llactacunapi causaj tucui paita fiñajcunahuan, aliguta causanata yuyaita cusha. Paipaj shutica, Salomonmi canga. Pai causajui punllacunapica, Israel gentecunaca, pihuambash na macanajushpami causanga.

10Paimi, Ñuca shutipi mañana huasitaca shayachinga. Paica, Ñuca churishnami canga, Ñucapash paipaj Taitashnami casha. Ñucami, Israelcunata mandashpa pai tiyajunataca, causaita causaicaman churasha’ nihuarcami.

11Cunanga, ñuca huahualla. Mandaj Diosca canhuan cachun. Imata ruranapipash, tucuimi ali llujshinga. Shinallata, canda Mandaj Taita Diospaj huasigutaca, Dios imashna mandashcashna shayachingui.

12Israelcunata ña mandajujpipash, canda Mandaj Taita Dios mandashcata can pactachijuchunga, Mandaj Diosllata ali yuyaitapash, aligutapacha yarishpa causanatapash carachun.

13Israelcunaman cuchun Mandaj Dios, Moisesman cushca mandashca shimicunataca pactachishpami causana cangui. Shinlli shayarishpa, ali yuyaita japishpa, imatapash na manllashpa, tucuita pactachingui.

14Ricui, ñucaca shinlli shayarishpami, Mandaj Diospaj huasiguta shayachingapaca, sucta chunga pusaj huaranga quintal curita, sucta millón pusaj patsaj huaranga quintalta pezaj culquita alichircani. Broncehuan, jirruhuangarin ashtaca cajpimi, na pezashca tiyajun. Shinallata caspicunata, rumicunatapashmi alichircani. Chaitaca, cambash ashtahuanmi tandachishpa mirachina cangui.

15Canga, imatalla ruranata yachajcunataca, ashtaca runacunatami charingui. Rumita tacashpa juyaillata rurajcunata, huasichijcunata, caspita llagllashpa rurajcunata, tucui ruranacunata alipacha yachajushca runacunatami charingui.

16Curipash, culquipash, broncepash, jirrupash, na yupai ushanallami tiyanajun. Cunanga jatarishpa, ucha rurai callarilla. Mandaj Diospash canhuanmi canga” nijurcami.

17Davidca, paipaj churi Salomonda yanapachunmi, Israelcunata tucuilla mandajcunataca, cashna nijurca:

18“Maipi cajpipash, cangunaman ali causaiguta caraj Mandaj Taita Diosca, ¿nachu cangunahuan pacta canga? Paimi, cai llactapi causajcunataca, ñuca maquipi churashca. Shinamandami, cai pachapi causaj gentecunaca, Mandaj Diospaj maquipi, pai agllashca gentecunapaj ñaupajpi cazuchi tucushpa causanajun.

19Chashna cashcamanda cunanga, cangunata Mandaj Taita Diosta tucui shunguhuan, tucui yuyaihuan mascaichi. Mandaj Taita Diospaj huasitaca, shayachi callarinallami canguichi. Mandaj Dioshuan ari ninajushpa quilcashcata alichishca arcatapash, Diospajlla shicanyachishca ima charishcacunatapash, Mandaj Diospaj shutipi mañana huasiman apamungapami shayachina canguichi” nijurcami.