HECHOS 18 - Quichua Imbabura 2016

Corinto pueblopimi, Pabloca villajushca

1Chashna tucushca jipaca, Pabloca Atenas pueblomanda llujshishpami, Corinto puebloman rirca.

2Chaipica, Aquila shuti judio runatami tuparirca. Paica, Ponto shuti llactapimi huacharishca carca. Paica, Priscila shuti paipaj huarmindi, Italia llactamanda chairalla shamushcallami carca. Paicunaca, Claudio shuti jatun mandaj, Roma pueblomanda judiocunata tucuillata llujchishpa cachajpimi chaiman shamushca carca. Paicunapajmanmi Pabloca rirca.

3Pablopash, paicunapash, carpata ruranata yachajcuna cashpami, chaita rurashpa causangapa chaipi saquirirca.

4Pabloca, samana punllacunapimi, sinagogaman rishpa chimbapurashpa rimarijuj carca. Shina cashpami, judiocunatapash, griegocunatapash crij tucuchun yachachijuj carca.

5Silaspash, Timoteopashmi, Macedonia llactamanda shamurca. Paicuna shamushpa ricujpica: “Jesusca, Cristomi” nishpami, judiocunaman punllandi, Pabloca Diospaj Shimitaca villajushca carca.

6Pablo villajujta judiocuna na uyanayachishpami, na ali shimicunata rimanajurca. Chaimandami, pai jahualla churajushcata chafsirishpa, cashna nirca:

“Cangunapaj jahuallatami ninan llaquitaca apanguichi. Ñucataca na imata juchachi ushanachu canguichi. Cunanmandaca, na Israelcunamanmi villangapa rigrini” nircami.

7Chai ucumanda llujshishpaca, Taita Diosta cazushpa causaj, Justo shuti runapaj huasimanmi rirca. Chai huasica, sinagoga quimiriallapimi carca.

8Chai sinagogapi mandaj Crispo shuti runaca, tucuilla paipaj huasi ucupuracunandimi Apunchi Jesusta crirca. Corinto pueblopi causajcunapash, Pablo villajujpimi, ashtacacuna crishpa bautizarinajurca.

9Muscuipishna tuta ricurishpami Apunchi Jesusca, Pablota cashna nirca: “Na manllashpami, na upalla saquirishpa, villajunalla cangui.

10Ñuca, canhuan cajpimi, candaca pipash na llaquichi ushanga. Ashtacacunatami, cai pueblopi agllashcata charini” nircami.

11Paicunaman Diospaj Shimita yachachishpami, shuj huata sucta quillata Pabloca chaipi saquirirca.

12Galión shuti runami, Acaya shuti llactataca mandajurca. Chai punllacunapimi, judiocunaca shujllashnalla yarishpa jatarirca. Paicunaca, Pablota fiñashpami, mandajcunapaj ñaupajman apanajurca.

13Chaiman apashpaca, cashnami ninajurca:

“Cai runaca, Taita Diosta yarinami canguichi nishpami yachachijun. Shina cashpapash, mandashca shimitami yangapi churajun” ninajurcami.

14Pablo rimai callarijujpimi, Galión shuti runaca judiocunataca cashna nijurca:

“Judiocunalla. Cai runa, imatapash jatun na alita rurashca cajpi, pitapash ninanda llaquichishca cajpica, canguna nishcata uyashpa, imata rurana cashcata ruraimanmi.

15Ashtahuangarin, shuj shimicunamanda, shuj shuticunamanda, cangunata mandashcamanda cajpica, cangunallata ricuichilla. Chaicunamandaca, imata ricunatapash na charinchichu” nircami.

16Chashna nishpami, chai ucumandaca tucuillata llujchishpa cacharca.

17Shinamandami, tucui griego gentecunaca, sinagogapi mandaj Sóstenes shuti runata japishpa, chai tandanajushcacunapaj ñaupajman apashpa macarca. Chaita mandaj Galión ricushpapash, na imatapash nircachu.

18Ashtahuangarin, Corinto pueblopimi, Pabloca unai punllacunata saquirirca. Chai jipami, crijcunata “cayacaman” nishpa, Siria llactaman ringapa barcota japirca. Paitaca Priscila shuti huarmipash, Aquila shuti runapashmi cumbashpa rirca. “Diosman pactachishami” nishcata ricuchingapami, Pabloca, Cencrea shuti pueblopi ajchata rutuchirca.

19Éfeso puebloman chayashpaca, Aquila shuti runatapash, Priscila shuti huarmitapash chaipi saquishpami, sinagogaman rishpa, judiocunahuan chimbapura rimarinajurca.

20“Ashtahuan punllacunata shuyapai” ninajujpipash, Pabloca na munarcachu.

21Ashtahuangarin paicunataca: “Cunan cai chayamuj cushijuita rurana punllaca, Jerusalenman rinapachami cani. Taita Dios munajpica, cutin tigramushami” nishpaca, Éfeso pueblomanda barcota japishpa: “Cayacaman” nishpa rircallami.

Antioquía puebloman Pablo tigrashpaca, caihuanga quimsatami shuj llactacunapi villai callarishca

22Cesarea shuti puebloman chayashpaca, tandanajuj crijcunata ricungapami vichai rirca. Chai jipaca, Antioquía pueblomanmi urai rirca.

23Huaquin punllacunata chaipi cashca jipaca, Galacia, Frigia llactacunamanmi, callarishpa Pabloca purijurca. Chaipica, tucui crijcuna aliguta catinajuchunmi yachachijurca.

Apolos shuti runaca, Éfeso pueblopimi villajushca

24Alejandría shuti pueblopi huacharishca Apolos shuti judio runaca, Éfeso pueblomanmi shamurca. Paica, alipacha yachajushca, Dios quilcachishca Shimitapash alipacha yachajmi carca.

25Shinallata, Apunchi Jesusta cazushpa causanata yachajushcami carca. Paica, Juan bautizajushcatallami yacharca. Shina cashpapash paica, tucui shunguhuanmi, Apunchi Jesusmandaca aliguta villashpa, cushijuihuan yachachijurca.

26Shinallata, sinagogapipash, na manllashpami, jatun ushaihuan villai callarirca. Shina villajujpimi Priscila shuti huarmihuan, Aquila shuti runahuan paitalla huasiman pushashpa, Taita Dios imashna causachun munajtaca aliguta Apolosman yachachinajurca.

27Acaya llactaman Apolos ringapa munajujpimi, Efesopi causaj crijcunaca, paita cushichinajurca. Shinallata, Paita “ali chasquichun” nishpami shuj quilcatapash cachanajurca. Apolos chaiman chayajpimi, Dios juyajpi crishcacunaca ninanda cushijunajurca.

28Chaipica, Dios quilcachishca Shimicunata judiocunaman ricuchishpami: “Jesusca, Cristomi” nishpa, na manllashpa jatun ushaihuan villajurca.