ISAÍAS 19 - Quichua Imbabura 2016

Egipto llactata llaquichinata villashcamanda

1Egipto llactata llaquichinatami villashca.

Mandaj Diosca ñapash yalijuj fuyupi tiyarishpami, Egipto llactaman yaicunga.

Shina yaicujpimi, chai llactapi tiyaj rurashcalla dioscunaca, Diospaj ñaupajpi ninandapacha manllanajunga.

Egipto llacta runacunapash, paicunapaj shungupimi huañungashna manllarinajunga.

2“Egipto llactapi causajcunataca, paipurallata macanajuna yuyaita cujpimi, paipura macanajunga.

Pueblopi causajcunapash, jatun mandajcunapash, paipurami macanajunga.

3Shinamandami, Egiptopi causajcunapaj yuyaicunatapash, imata rurangapa yuyashcacunapash, chaipi tucuringa.

Shina rurajpica, paicunapaj rurashcalla dioscunata, yumbucunata, huañushcacunahuan rimajcunata, yachajcunatami tapunajunga.

4Egiptopi causajcunataca, ninanda llaquichishpa mandaj runapaj maquipimi churasha.

Ninanda llaquichij jatun mandajmi, paicunataca llaquichishpa mandanga” ninmi tucuita Mandaj Jatun Diosca.

5Mama cuchapash chaquingami.

Jatun yacupash, chaquishpami tucuringa.

6Tucui jatun rijuj yacucunami chaquinga.

Pugyucunamanda llujshishpa rijuj larca yacucunapashmi chaquinga.

Chaicunapi viñashca yuracunapash, sucuscunapash chaquishpami tucuringa.

7Jatun yacu manñapi tiyaj michina pambacunapash,

chai yacu manñapi tarpushca chagracunapash,

tucuillami chaquishpa tucuringa.

8Pijita japijcunapash, ninandami llaquirinajunga.

Jatun yacucunapi, anzuelocunahuan, linllicunahuan pijita japijcunapash, ninandami llaquirinajunga.

9Ali lino puchata puchajcunapash,

linllicunata rurajcunapash, imata ruraitapash na ushanajungachu.

10Paicunapaj linllicunaca, tucuillami liquiringa.

Pijicunata viñachijcunapash, tucuillami llaquichi tucunajunga.

11Zoán shuti pueblota mandajcunaca, juizu illajcunapachami.

Alipacha yachajushcacuna, Faraonman ali yuyaita cushcapash, yangallami saquirishca.

¿Imashnashi Faraonmanga:

“Ñucanchica, ninan yachajushcacunapaj churicunami canchi.

Punda jatun mandajcunapaj miraicunami canchi” ninguichi?

12Cunanga, alipacha yachajushca runacunaca ¿Maipitayari?

Paicunami, Egipto llactata, Mandaj Dios imashna llaquichinataca canmanga villanga.

13Zoán shuti pueblota mandajcunaca, yuyai illajmi tucushca.

Menfis shuti pueblota mandajcunaca, paicunallatami llullapi urmashca.

Paicunapaj ayllucunapajca, huasipa callari rumishna cashpapash,

Egipto llactataca umachishpami, pandachishca.

14Mandaj Diosca, paicunamanmi pandachij espirituta cachamushca.

Egipto llactapi causajcunataca, ninandami pandachishca.

Chaimandami, machashca runacunashna, imatapash na alitalla ruranajun.

15Umashna, chupashna, yura malquishna, sucus yurashna cashpapash, Egipto llactataca na yanapai ushangachu.

16Chai punllacunapica, Egiptopi causajcunaca huarmicunashnami ninanda manllanajunga. Tucuita Mandaj Diospaj ushaihuan ninanda llaquichijpimi, chashna manllarinajunga.

17Egiptopi causajcunaca, Judá llactapi causajcunataca ninandami manllanajunga. Tucuita Mandaj Dios imashna llaquichishcata yarishpami, ninanda manllashpa causanajunga.

18Chai punllacunaca, Egipto llactapica, picha pueblocunapi causajcunami, Canaán llacta rimaita rimanajunga. Paicunaca, tucuita Mandaj Diosta catingapami, ari nishpa juramentunajunga. Chai pueblocunamanda shujtaca, Herez nishpami rigsinajunga.

19Chai punllacunapica, Egipto llactapica, Mandaj Diosta yarina shuj altarmi tiyanga. Egipto llacta mujunbica, Mandaj Diosta yarichij shuj jatun rumi pircami tiyanga.

20Chaica, Egipto llactapi causajcunapajca, tucuita Mandaj Diosta yarichingapami canga. Paicunata llaquichijcuna, ninanda llaquichinajujpimi, Mandaj Diostaca caparishpa mañanajunga. Shina mañanajujpimi, paicunata yanapashpa cacharichij, shuj mandajta cachamunga.

21Mandaj Diosca, Egiptopi causajcunahuanmi rijsi tucunga. Chai punllami, Egiptopi causajcunaca, Mandaj Diosmanga, animalcunata huañuchishpa, ofrendacunatapash caranajunga. Mandaj Diosman imata rurangapa ari nishcatapashmi, pactachinajunga.

22Mandaj Diosca, Egiptopi causajcunataca ninandami llaquichinga. Shina llaquichishpapash, Paillatami alichinga. Mandaj Diospajman tigrarijpica, Diospash paicunata ninanda llaquishpami alichinga.

23Chai punllacunapica, Egipto llactamandaca Asiria llactacamanmi, shuj ñan tiyanga. Asiria llactamanda gentecunaca, Egiptomanmi yaicunajunga. Egiptopi causajcunaca, Asiria llactamanmi yaicunajunga. Egiptopi causajcunaca, Asiria llacta gentecunahuanmi Mandaj Diospajta ruranajunga.

24Chai punllacunapimi Israelcunaca, Egiptopi causajcunahuan, Asiria llactapi causajcunahuan, quimsandi llacta tandanajushpa, tucui cai pachapi causajcunapaj alipacha canga.

25Tucuita Mandaj Diosmi, paicunataca cashna nishpa bendicianga: “Egiptopi causaj gentecunaca Ñucapajmi. Asiria llacta gentecunapash Ñuca maquihuan rurashcacunami. Israelcunacarin, Ñucapajlla shicanyachishcami. Paicunatami bendiciani” ningami.