HAGEO 2 - Quichua Imbabura 2016

Diospaj mushuj huasica, juyailla punchapamba canamanda

1Canchis quillapaj, ishcai chunga shuj punllapimi Mandaj Diosca, profeta Hageotaca, cashna nishpa villachun mandarca:

2“Cunanga, Salatiel runapaj churi, Judá llactata mandaj Zorobabel runata, Josadac runapaj churi, sacerdotecunata mandaj Josueta, caishuj gentecunatapash cashna ningui:

3‘Punda, cai huasi punchapamba cajta ricushca, ¿maijambash causanguichirachu?

Cunanga, imashna cajta ricunajunguichimi,

¿Nachu cai huasica, imapash illaj ricurin?

4Chaimanda cunanga, Zorobabel shinlli tucunami cangui’ ninmi Mandaj Diosca.

Shinallata: ‘Josadac runapaj churi, sacerdotecunata mandaj Josuepash, shinlli tucunami cangui.

Cai llactapi tucuicunapash, shinlli tucushpa cai huasita alichinami canguichi’.

‘Ñucaca, cangunahuanmi cani’ ninmi tucuita Mandaj Diosca.

5‘Egipto llactamanda canguna llujshimujujpi, cangunahuan imashna ari nishcashnami,

Ñuca Espirituca cangunapaj chaupipi canga.

Shina cashcamandami, na manllana canguichi’ ningui” nishpa villachunmi mandarca.

6Tucuita Mandaj Diosca cashnatapashmi nin:

“Huaquin punllacuna jipami, jahua pachatapash, cai pachatapash,

mama cucha yacutapash, chaquishca alpatapash chujchuchisha.

7Shinallata, tucui llactacunatapashmi chujchuchisha.

Shina rurajpimi, tucui llactacunapi causajcuna shamuchun munashca Runaca shamunga.

Pai shamujpimi cai huasipica, punchapamba ninan ushaita jundachisha” ninmi tucuita Mandaj Diosca.

8“Culquipash Ñucapajmi,

curipash Ñucapajmi” ninmi tucuita Mandaj Diosca.

9“Jipa rurashca cai huasica,

punda rurashca huasitapash yali punchapambami canga” ninmi tucuita Mandaj Diosca.

“Caipica, tucuicunami ali causaita charinga” ninmi tucuita Mandaj Diosca.

Israelcuna na cazujpi jarcashpa rimashcamanda

10Jatun mandaj Darioca, ñami ishcai huatata mandajurca. Chai huatapaj iscun quilla, ishcai chunga chuscu punllapimi, Mandaj Diosca, profeta Hageotaca, cashna nishpa villachun mandarca:

11“Tucuita Mandaj Diosca, cashnami nin: ‘Cunanga, mandashcapi nishcacunata cashna nishpa, sacerdotecunata tapungui:

12Maijan cashpapash, Diospajlla shicanyachishca aichata, paipaj churajunapi migllashpa apajujpica, tandahuan cashpa, aicha cusashcahuan cashpa, vinohuan cashpa, aceitehuan cashpa, ima shuj micunahuan cashpapash, chai churajunapi tacarishcamandalla, ¿Diospajlla micuna tucungallachu? nishpa tapui’ ninmi” nichunmi mandarca. Shina tapujpica, chai sacerdotecunaca: “Na” ninajurcami.

13Hageo runaca, cashnatapashmi tapurca: “Maijan cashpapash, huañushcapaj aichapi tacarishpaca, mapami tucun. Shina cashpapash, Diospajlla micunacunapi tacarijpica, ¿mapa tucungachu?” nishpa tapujpimi, sacerdotecunaca: “Ari, mapami tucunga” ninajurca.

14Shina ninajujpimi Hageo runaca, cashna nirca: “Mandaj Diosca, cashnami nin: ‘Ñuca ñaupajpica, cai llactapi causaj gentecunapash, chashna mapacunallatami. Paicuna imata rurashcapash, paicuna Ñucaman imata carashcapash, chashna mapallatami.

15Shina cashcamanda cunanga, Mandaj Diospaj huasita nara cutin shayachi callarishpallata cunan punllamandapacha, cangunapaj shungupi aliguta yarinami canguichi.

16Nara caicunata rurai callarishpaca, pusaj quintal chuscu chunga kilo granota apangapa shamujpica, chuscu quintal ishcai chunga kilo granollami tiyarca. Uvacunata cutana pushtupi, picha chunga fundu vinota llujchingapa shamujpipash, ishcai chunga fundullami tiyarca.

17Ñucami, canguna tarpushca granocunataca, rupajlla huairahuan, ungüihuan, runduhuan chingachircani. Shina rurajpipash, napacha Ñucapajman tigrarishpami causarcanguichi’ ninmi Mandaj Diosca” nircami.

18Shinallata: “Cangunaca, cunanmanda callarishpa, cangunapaj shungupi aliguta yarinami canguichi. Mandaj Diospaj huasitaca, iscun quillapaj ishcai chunga chuscu punllapimi, rumicunata churashpa callarina canguichi. Chai punllamandapachami cangunapaj shungupica, aliguta yarina canguichi.

19Cangunapaj tarpuna muyucunaca, alichishcami tiyajun. Uvacunapash, higocunapash, granadacunapash, olivo yuracunapash, nara sisanllu. Ashtahuangarin cunan punllamandapachami bendiciagrini” nircami.

Mandaj Diosca, Zorobabel runaman, alicunata cusha nishcamanda

20Iscun quillapaj ishcai chunga chuscu punllapillatami, Mandaj Diosca cutinllata Hageo runaman cashna nishpa villarca:

21“Judá llactata mandaj Zorobabel runaman, cashna ningui: ‘Ñucami, jahua pachatapash, cai pachatapash chujchuchisha.

22Mandajuj llactacunata mandangapa tiyarinatapash urmachishami. Tucui llactacunata mandajuj llactacunapaj ushaitapash tucuchishami. Macanajuna carretacunatapash, chai carretacunapi purijcunatapashmi urmachisha. Shina rurajpimi, caballocunapash, chaicunapi tiyarij macanajuj runacunapash huañunga. Paicunapaj espadahuanllatami, caishuj chaishuj huañuchirinajunga.

23Paicunata chashna llaquichijui punllapica, Salatiel runapaj churi, Ñucapajta ruraj can Zorobabelmanmi, Ñuca ushaita cusha. Ñucami, candaca agllarcani. Ñucaca, tucuita Mandaj Dios cashpami, chashnapacha pactachisha’ ninmi” nishpami villarca.