1Taita Diostaca, tucui cai pachapi causajcuna, cushijuihuan candaichiyari.
2Paipaj ninan ushaita charij shutita candaichiyari.
Juyailla candanacunahuanmi, alicachina canguichi.
3Taita Diostaca: “¡Can tucuita rurashcacunaca, juyaillagupachami!
Cambaj jatun ushaimandami, canda fiñajcunaca manllaihuan cazunajunga” nichiyari.
4Tucui cai pachapi causajcunami, ninanda alicachishpa candanajunga.
Cambaj shutitami candanajunga. Selah
5Taita Dios imatalla rurashcacunata ricungapa shamuichiyari.
Runacunamanmi ninan manllarinacunata rurashpa ricuchishca.
6Mama cuchatapash chaquichircami.
Jatun yacutaca, chaquishcata purishpami yalinajurca.
Chaipimi, Dioshuan cushijurcanchi.
7Paica, causaita causaicamanmi Paipaj ushaihuan mandajun.
Paica, ricuriashpa shayaj runashnami, tucui llactacunata ricujun.
Na cazujcuna jariyashpa ama jatarichunmi chashna ricujun. Selah
8Tucui gentecunami, ñucanchi Taita Diostaca, alicachina canguichi.
Paita alicachishpa candashca shimicunataca, uyachinami canguichi.
9Paimi, ñucanchitaca causaita cushpa charijun.
Ñucanchi pandarishpa urmachumbash, napacha saquircachu.
10Taita Dioslla,
ñucanchi imashna cajta ricungapami, llaquicunata cachamushcangui.
Culquita, ninahuan mapa illajta rurajshnami, ñucanchitaca rurashcangui.
11Llaqui japichunmi ñucanchitaca saquircangui.
Ñucanchi huashapica, llasha quipitashnami apachircangui.
12Ñucanchita sarujshna llaquichinajuchunmi saquircangui.
Ñucanchica, ninashna, yacushna, llaquicunatami yalircanchi.
Shina cajpipash, ashtaca alicuna tiyaj pushtumanmi pusharcangui.
13Tucuillata rupachina animalcunahuanmi, Cambaj huasiman yaicusha.
Canman cusha nishcataca pactachishapachami.
14Ninan llaquihuan cashpami,
ñuca shimihuanga pactachishapachami nircani.
15Ali virayashca animalcunata cushpami tucuillata rupachisha.
Jari llamacunataca, sahumerioshna mishquillagu ashnajuchunmi rupachisha.
Huagracunata, jari chivocunatami huañuchishpa cusha. Selah
16Taita Diosta manllajcunaca, tucuicuna uyaj shamuichi.
Ñuca tucui imatalla rurashcatami villasha.
17Diostami, ñuca shimihuan caparishpa mañarcani.
Ñuca shimihuanmi jatunyachircani.
18Ñuca shungupi ima na alitapash yarishca cajpica,
Jatun Diosca na uyahuanmanllu carca.
19Ashtahuangarin Taita Diosca uyahuarcapachami.
Ñuca ninanda mañajujtaca uyahuarcamari.
20Taita Diosca, alicachi tucushca cachun.
Ñuca mañashcataca, na yangapi churarcachu.
Ñucata juyanatapash, na saquihuarcachu.
Who We AreWhat We EelieveWhat We Do
2025 by iamachristian.org,Inc All rights reserved.
