LAMENTACIONES 1 - Quichua Imbabura 2016

Sion pueblopi causajcunata prezu apajpi llaquirishcamanda

1¡Ashtaca gentecuna causanajushca puebloca, jichushcamari saquirishca!

Tucui llactacunata yali jatun puebloca, sapalla huarmishnamari saquirishca.

Mandaj huarmishna tucui llactacunata mandaj puebloca, gañanmari tucushca.

2Tutaca ninanda llaquirishpami, viquipash jicharijta huacajun.

Paita juyajcunamandaca, pipash na cushichingapa tiyanllu.

Paipaj cumbacunapash, paita fiñajcunami tucushca.

3Judá llactapi causajcunaca, gañan tucushpa ashtahuan llaquichi tucungapami apai tucushca.

Ninanda llaquichi tucushpallami, shuj llactacunapica causanajun.

Paicunata llaquichijcunaca, ashtahuan jatun llaquicunapimi churashca.

4Sion pueblopi jatun cushijui punllacunaman pipash na shamujpimi, ñangunapash jichushca saquirishca.

Puebloman yaicuna pungucunapash, jichushca saquirijpimi, sacerdotecunapash huacanajun.

Chairalla viñai cuitsacunapash, ninandami llaquirinajun.

Sion puebloca, jatun llaquipimi causajun.

5Paita fiñajcunarami, mandajcuna tucurca.

Paita na rinayachijcunarami, ashtahuan charijyanajun.

Paicunallata ninan juchata rurashcamandami, Mandaj Diosca chashna llaquichirca.

Paicunapaj huahuacunatapash, paicunata fiñajcunami, prezu apanajurca.

6Sion pueblopi causajcunapajca, tucui ima juyaillagu tiyashcapash, tucuillami chingarca.

Paicunata mandajcunapash, jihuata na tarij tarugashnami purinajurca.

Paicunata catiriyashpa llaquichijcunapaj ñaupajpica, ushai illajmi tucunajurca.

7Jerusalenbi causajcunata fiñajcuna llaquichinajujpica, pipash na yanaparcachu.

Shinamandami, paicunallata na cazushcamanda llaquichi tucunajushcata yarinajurca.

Ñaupa huatacuna juyailla causashcatapashmi yarinajurca.

Paicunata fiñajcunaca, chashna llaquichi tucushcata ricushpami, asishpa ricunajurca.

8Jerusalenbi causajcuna, juchata rurashcamandami, na ricunayachi tucunajurca.

Paita tucui alicachijcunapash, cunanga napacha alicachinajunllu.

Chaimandami paica ninanda llaquirishpa causajun.

9Na alita rurashcamandami, paipaj churajunapash mapayarca.

Pai llaquichi tucunataca, na yarircachu.

Paitaca, ninandapacha llaquichijpimi, pipash na yanapai usharca.

Mandaj Dioslla, jatun llaquihuan cajtaca ricuhuayari.

Ñucata fiñajcunaca, ninandami llaquichinajuhuan.

10Fiñajcunaca, paicuna tucui imatalla juyailla charishcacunatapash, quichushpami aparca.

Sion pueblomi, shuj llactamanda runacunara, Diospajlla huasiman yaicunajundaca ricurca.

Chai gentecunataca, chai tandanajuiman yaicuchunga, napacha mandarcanguichu.

11Jerusalenbi causajcunaca, micunata mascashpami, huacashpa purinajurca.

Yarjaimanda ama huañungapaca, paicuna tucui imatalla charishcacunatami, micunamanda cunajurca.

Mandaj Dioslla, ninan llaquihuan cajtaca ricuhuayari.

12Ñanda yalijcunaca ¿Ñucataca nachu llaquishpa ricuna cahuanguichi?

Ricuichi, cashna jatun llaquicunaca ¿pitapash japircachu imashi?

Mandaj Dios, ninanda fiñarishca punllapimi cashna llaquichihuashca.

13Paica, jahua pachamandami ninata cachamurca.

Chai ninami, ñucataca tullucunacaman tucuchijun.

Ñuca rina ñangunata jarcashpami, huashaman tigrachihuarca.

Ñucataca, punllandi llaquinata apashpa causachunmi jichushpa saquihuarca.

14Ñuca juchacunami, yuguta huatashcashna llaquichijuhuan.

Chaitaca ñuca huashapi huatashcashna cajpimi, imatapash na rurai ushajuni.

Jatun Diosmi, ñucataca shinlli runacunapaj maquipi saquihuashca.

Chai runacunapaj ñaupajpica imata ruraitapash na ushanichu.

15Jatun Diosca, ñucapaj shinlli runacunataca, sarushpami tucuchirca.

Paica, macanajuj ashtaca runacunata cayashpami, chairalla viñai ñuca huambracunataca tucuchirca.

Judá llactapi causajcunataca, chairalla cuitsashna cajpipash, Jatun Diosllatami uvata sarujshna ñuturca.

16Chaimanda huacajujpimi, ñuca ñavimandaca, yacushna viquica llujshijun.

Ñucaman cushijuita cushpa, ñucata samachijca caruyarcamari.

Ñuca huahuacunapash, ñucata fiñajcuna huañuchijpimi tucurirca.

17Sion pueblopi causajcuna maquita chutanajujpipash, paicunata yanapangapaca pipash na tiyanllu.

Jacobpaj miraicunata llaquichinajuchunga, paicunapaj quimiriapi causajcunatallatami, Mandaj Diosca mandarca.

Jerusalenbi causajcunaca, paicunapurallatami na ricunayachi tucunajurca.

18Mandaj Diosca, tucuita pactachij Diosmi.

Ñucami, pai mandashcacunataca na cazurcani.

Cunanga, tucui gentecuna uyahuaichi.

Ñuca llaquitaca ricuichiyari.

Cuitsacunapash, huambracunapashmi, prezu apai tucurca.

19Ñucapaj juyashcacunatami caparijurcani.

Ashtahuangarin paicunaca umachihuashcami.

Ñuca sacerdotecunapash, ñucata mandaj ancianocunapash, pueblopillatami huañurca.

Yarjaimanda ama huañungapa, micunata mascanajushpallatami huañunajurca.

20Mandaj Dioslla, jatun llaquipimari cani.

Canda na cazushcamandami, ñuca vijsa ucutapash ninanda rupajun.

Ñuca shungupipash ninan nanaihuanmi cani.

Canllapica, macanajuipimi huañunajurca.

Ucupica, yarjaihuanmi huañunajurca.

21Huacajujta uyashpapash, ñucata cushichijca, pipash na tiyanllu.

Ñucata Dios chashna llaquichijujta ricushpami, ñucata fiñajcunaca ninanda cushijurca.

Cachamusha nishca llaquichina punllataca, paicunamambash cachamupayari.

Shina cachamujpimi, paicunapash ñucashnallata llaquita apanga.

22Paicuna na alita rurashcapash, Cambaj ñaupajpi ricurishpami ali canman.

Tucuita ñuca na cazushcamanda, ñucata llaquichishcashnallata, paicunatapash llaquichipangui.

Ñucaca, ninandapachami llaquirini.

Shinamandami, ñuca shungutapash ninandapacha nanajun.