JUECES 16 - Quichua Imbabura 2016

Gaza shuti puebloman Sansón rishcamanda

1Shuj punllami Sansonga, Gaza shuti puebloman rirca. Chaipimi, culquimanda huainayaj huarmihuan tuparishpa pacta puñungapa rirca.

2Gaza shuti pueblopi causajcuna, Sansón chaipi cajtaca yachashpami, chai huasita chaupipi churashpa, pueblo pungupipash, tucui tuta pacalla chapanajurca. Paicunaca: “Caya punllayajujpimi huañuchishun” nishpami, chashna chapanajurca.

3Ashtahuangarin Sansonga, chaupi tutacamanlla puñushpa jatarishpami, chai pueblo pungutaca, chai punguta charijuj ishcandi pilarcunandi, pungupi quinraiman churashca jirrundi llujchirca. Shina llujchishpaca rigrapi churashpami, Hebrón shuti pueblo chimbapura urcuman apashpa rirca.

Sansonmandapash, Dalilamandapash

4Chai jipami, Sansonga, Sorec shuti pugru pambapi causaj Dalila huarmita ninanda juyashpa ricujurca.

5Shina cajpimi, filisteocunata mandajcunaca, chai huarmipajman shamushpa, cashna ninajurca: “Sansón runa, imashpa ninan shinlli cajtapash, imashna mishai ushanatapash, umachishpa tapungui. Chaita yachashpami, ali huatashpa, manllachishpa charishun. Can chashna rurajpica, tucuicunami huaranga shuj patsajta pezaj culquita cushun” ninajurcami.

6Shina nijpimi Dalila huarmica, Sansondaca: “Canga, ¿imashpata ninan shinlli cangui? Canda mishangapaca, ¿imashnata huatana canchi? Chaita villahuai” nijurcami.

7Shina nijpimi Sansonga cashna nirca: “Nara chaquishca canchis mushuj angucunahuan huatajpica, imata ruraitapash na ushashpa, caishuj runacunashnami tucusha” nirca.

8Chaita villajpimi, filisteocunata mandajcunaca, nara chaquishca canchis mushuj angucunata paiman cunajurca. Chai angucunahuanmi chai huarmica, Sansondaca huatarca.

9Dalila huarmica, tauca runacunatami ucupi pacashpa charijurca.

Chaimandami chai huarmica: “¡Sansón, filisteocunami canda japingapa shamunajun!” nishpa caparirca. Shina caparijpimi Sansonga, paita huatashca angucunataca, ujsha jupa cauchushcata nina rupachijpishna fitirca. Shina rurajpimi, imashpa ninan shinlli cajtaca na yachai usharca.

10Chaimandami Dalila huarmica, Sansondaca:

“Ricui, canga llullaitami llullahuashcangui. Cunanga, canda imashna huatai ushanata villahuai” nircami.

11Shina nijpimi Sansonga: “Mushuj huascahuan shinllita huatajpica, imata ruraitapash na ushashpa, caishuj runacunashnami tucusha” nirca.

12Shina nijpimi Dalila huarmica, mushuj huascacunahuan huatashpaca: “¡Sansón, filisteocunami canda japingapa shamunajun!” nishpa caparirca. Tauca runacunami pacalla chai ucupi chapanajurca. Ashtahuangarin, paipaj maquita huatashcataca, jamzi puchatashnami fitirca.

13Dalila huarmica, cutinmi Sansondaca:

“Cunangaman llullashpallami, umachihuashcangui. Cunanga, canda imashna huatai ushanata villahuai” nirca.

Shina nijpimi Sansonga: “Canchista shambashca ñuca ajchatami, ahuashca telahuan huangushpa, ali estacashca caspipi ali huatana cangui” nirca.

14Shina nijpimi Dalila huarmica, estaca caspipi ali huatarca. Shina huatashpallami:

“¡Sansón, filisteocunami canda japingapa shamunajun!” nishpa caparirca. Ashtahuangarin Sansonga, puñujushcamanda rijcharishpami, telar estacataca ahuashca telandi llujchishpa jatarirca.

15Chashna rurajpimi Dalila huarmica, cashna nirca:

“¿Imashpata ñucataca, na juyashpata, juyanimi nihuangui? Ñami quimsacaman umachihuashcangui. Shinamandami, imashpa ninan shinlli cajtapash, cunangaman nara villahuangui” nirca.

16Punllandi “villahuai” nijujpillatami, Sansonga, shungu junda ninanda llaquirishpa, imata ruraitapash na ushajurca.

17Shina cashpami, na llullashpa cashna nishpa villajurca:

“Ñuca mamapaj vijsamandapacha, Taita Diospajta rurachun shicanyachishca cashcamandami, ñuca ajchataca na cuchuhuashca. Ñuca ajchata cuchujpica, ñucamanda ushai anchurijpimi, imata ruraitapash na ushashpa, caishuj runacunashna tucusha” nirca.

18Na llullashpa, tucuita villashcata yachashpami, Dalila huarmica filisteocunata mandajcunaman, cashna nishpa cayachun cacharca:

“Cunangarimbash shamuichilla. Sansonga, tucuitami na llullashpa villahuarca” nircami.

Shina villajpimi filisteocunata mandajcunaca, Dalila huarmiman culquita apashpa shamunajurca.

19Dalila huarmica, Sansondaca paipaj migllapi puñuchishpami, shuj runata cayarca. Chai runa, Sansonbaj canchis shambashca ajchacunata cuchujpimi, paipaj ushaica anchurirca. Shina cajpimi, chai huarmica Sansonda llaquichi callarirca.

20Paitaca:

“¡Sansón, filisteocunami canda japingapa shamunajun!” nishpami caparirca.

Shina caparijpi puñujushcamanda Sansón rijcharishpami, cunambash pundashnallata quishpirishallami yashpa jatarirca. Ashtahuangarin, Mandaj Dios paimanda anchurishcataca na yacharcachu.

21Filisteocuna paita japishpaca, ñavicunata surcushpami, Gaza shuti puebloman aparca. Chai pueblopimi cadenacunahuan huatashpa, prezuna huasi ucupi tiyaj molinopi cutachun churarca.

22Shina cajpimi, Sansón runapaj ajchaca cutin viñai callarirca.

Sansón huañushcamanda

23Sansonda mishai ushashca cashpami, filisteocunata mandajcunaca:

“Ñucanchi diosmi, ñucanchita fiñaj Sansondaca,

ñucanchi maquipi churashca” nishpami,

Dagón shuti diosman animalcunata carashpa huañuchishpa cushijungapa tandanajurca.

24Chaita ricushpami gentecunaca, paicunapaj diosta alicachishpa, cashna ninajurca:

“Ñucanchita fiñashpa, chagracunata tucuchij runataca,

ñucanchi Dagón diosmi ñucanchi maquipi churashca.

Ñucanchipurataca, ashtacacunatami huañuchirca” ninajurcami.

25Paicunapaj shungupi ninanda cushijushca cashpami: “Paita ricushpa asingapa, Sansonda pushamuichi” ninajurca. Shina nijpimi Sansondaca, prezuna ucumanda pushanajurca. Paitaca, pilar chaupicunapi shayachishpami, filisteocunaca na alicachishpa asinajurca.

26Shina cajpimi Sansonga, maquimanda paita aisashpa pushajuj huambrataca: “Cai huasita charijuj pilarcunapi taunaringapa, chaiman pushahuai” nirca.

27Chai jatun huasipica jaricunapash, huarmicunapash jundami carca. Filisteocunata tucui mandajcunapashmi, chaipi carca. Huasi jahua patiopipash, quimsa huarangashna jaricuna, huarmicunami, Sansón runata asinajujta ricungapa rishca tiyanajurca.

28Shina cajpimi Sansonga, Mandaj Diostaca caparishpa cashna mañajurca: “Mandaj Jatun Dioslla, cunanga ñucata yarihuailla. Taita Dioslla, ñuca ishcandi ñavita filisteocuna surcushcamanda, paicunatapash tucuillata llaquichingapami, shinllichihuai nishpa ninanda mañajupani” nijurcami.

29Shina mañashpaca Sansonga, chai huasita charijuj ishcandi pilar chaupipimi, lluqui maquitaca shuj pilarpi, ali maquitaca caishuj pilarpi churashpa shinlli charirishpa shayarirca.

30Chashna shayarishpami Sansonga: “Filisteocunahuanmi huañugrini” nishpa caparirca.

Shina caparishpa, chai ishcai pilarcunata tucui ushaihuan t'angajpimi, chai huasica, filisteocunata mandajcunatapash, chaipi tiyanajuj tucui gentecunatapash llapishpa urmarca. Sansonga, pai causajushpa huañuchishcatapash yali ashtaca gentecunata huañuchishpami, paipash huañurca.

31Chai jipaca, Sansonbaj huauquicunapash, paipaj taitapaj tucui huasi ucupurapash urai rishpami, chaimanda apashpa, Zora shuti pueblohuan, Estaol shuti pueblohuan chaupipi, paipaj taita Manoa shuti runata pambashca utujupi pambarca. Sansonga, ishcai chunga huatatami Israelcunataca mandajurca.