ISAÍAS 2 - Quichua Imbabura 2016

Mandaj Dios tucuita mandana cashcamanda(Miq. 4:1-3)

1Judá llactapash, Jerusalén pueblopash ima tucunatami, Amoz shuti runapaj churi Isaiasca, muscuipishnalla ricushpa, cashna villajurca:

2Tucurimui punllacunapica, Mandaj Diospaj huasi shayajuj lomaca,

tucui lomacunapaj mandajmi tucunga.

Tucuicunami paitaca alicachinajunga.

Tucui llactacunamandami, paipajman shamunajunga.

3Ashtaca gentecuna shamushpami, cashna ninajunga:

“Mandaj Diospaj lomaman vichai rishunchi.

Jacobpaj, Diospaj huasiman jacuchi.

Chaipimi imashna ali causanata yachachinga.

Shinallata, chaipimi Paita cazushpa causashun” ninajungami.

Sion pueblomandami, mandashca shimicunaca llujshinga.

Jerusalenmandami, Mandaj Diosca rimajunga.

4Llactacunataca, Diosmi aliguta ricushpa mandajunga.

Ashtaca gentecunatami, jarcashpa rimanga.

Chashna rurajpimi, paicunapaj espadacunataca, yapuna aradocunata ruranga.

Huañuchina jirrucunatapash, hocescunatami ruranga.

Llactapuracunapash, na ashtahuan macanajungachu.

Macanajuita yachachinapash, na ashtahuan tiyangachu.

Na ali gentecunata, Mandaj Dios llaquichinamanda

5Jacobpaj miraicunaca, shamuichi.

Mandaj Dioshuan causangapa shamuichi.

6Mandaj Dioslla, Can agllashca Jacobpaj miraicunataca jichushcanguimi.

Paicunaca, indi llujshimujman tiyaj llactapi causajcuna imashna rurashcatami catinajun.

Filisteo brujucuna rurashcashnami ruranajun.

Shuj llacta runacunahuanmi, imata rurashpa pactachingapapash, ari ninajun.

7Paicunapaj llactapica, culquipash, curipash,

shuj ima alicunapash na tucurinallami tiyan.

Shinallata, paicunapaj llactapica, caballocunapash, carretacunapash, na yupai ushanalla ashtacapachami.

8Paicunapaj llactapica, rurashcalla dioscunapash jundami tiyanajun.

Paicunapaj maquihuanllata rurashca dioscunatami cungurinajun.

9Paicunaca, chaicunatami cungurishpa urai cumurinajun.

Chai juchataca, ama cungashpa saquipaichu.

10Cunanga, urcu rumi ucucunapi, alpa ucucunapi pacajugrichi.

Mandaj Diosca ninanda fiñarishpami, Paipaj ninan ushaihuan shamujun.

11Jariyashca purijcunatapash, na cazushpa causajcunatapash ninandami llaquichinga.

Chai punllapica, Mandaj Diosllami jatunyachi tucushca canga.

12Tucuita Mandaj Dios llaquichina punllami chayamugrijun.

Na cazujcunata, jariyashpa purijcunata, jatun tucushpa purijcunatami llaquichinga.

13Líbano urcupi tiyaj tucui cedro quirucunata,

Basán llactapi tiyaj tucui encina quirucunata,

14tucui jatun urcucunata, tucui jatun lomacunata,

15tucui jatun torrecunata,

pipash na urmachi ushanalla tucui pircacunata,

16Tarsis pueblomanda jatun barcocunata,

juyailla imatapash rurashcacunatapash tucuchina punllami chayamugrijun.

17Jariyashpa purijcunataca, llaquichingami.

Jatun tucushcacunatapash, pingaichingami.

Chai punllapica, Mandaj Diosllami jatunyachi tucushca canga.

18Rurashcalla dioscunatapash, tucuchingami.

19Mandaj Dios ninan ushaihuan shamujpica,

jaca utujucunapi, alpa ucucunapimi pacajungapa rinajunga.

Cai pachapi causajcunata llaquichingapa jatarijpimi, chashna tucunga.

20Chai punllapica, culquimanda, curimanda rurashca dioscunataca,

ucucha utujucunaman, murcielagocuna causaj pushtumanmi shitanajunga.

21Mandaj Dios ninan ushaihuan shamujpica,

jaca huaicucunapi, jatun rumi utujucunapi pacajunajunga.

Cai pachapi causajcunata Dios llaquichingapa shayarijpimi, chashna tucunga.

22Runacunapaj ushaihuanlla imatapash ruranataca, na yarinachu canguichi.

Runacunaca, ashacamanllami causanga.