1Jerusalenman Jesús ña chayajushpaca, Olivo urcupi tiyajuj Betfagé pueblomanmi chayamurca. Chai pueblomandami Jesusca Paipaj ishcai yachajujcunata cacharca.
2Paicunataca, cashnami nirca:
“Chai chimbapi tiyajuj uchilla puebloman ripaichi. Chaipimi, paya burruguta huatashcata, maltun burrugundi shayajujta taringuichi. Chai burrucunataca cacharishpa apamupanguichilla.
3Pipash imatapash nijpica: ‘Apunchi Jesús, apamugrichi’ nijpimi apanajupanchi, ñapash apamushunllami ninguichi” nishpami cacharca.
4Profeta rimashca pactachunmi, chaicunaca chashna tucurca. Paica cashnami nirca:
5“Sión pueblopi causajcunaman, cashna nishpa villapaichi:
Ricuichi, cangunata jatun Mandajmi shamujun.
Paica ali shungutami charin.
Paica aparishpa purij paya burrupaj huahua,
maltun burrupimi tiyarishpa shamujun” nishcami carca.
6Chai yachajujcuna rishpaca, Jesús mandashcashnami ruranajurca.
7Paya burruta, maltun burrundi apamushpaca, paicunapaj jahualla churajushcatami burrucunapaj lomopi churanajurca. Shina churajpimi Jesusca, maltun burrugupi tiyarirca.
8Shinallata, ashtaca gentecunami, paicunapaj churajunataca, ñambi mandanajurca. Huaquingunaca, quiru malquicunata cuchushpami, ñambi churanajurca.
9Chai gentecunaca, Jesusta chaupipi churashpami, ñaupajtapash huashatapash rinajurca. Paicunaca, cashna nishpami ninanda caparinajurca:
“¡Taita Davidpaj Churica, alicachi tucushca cachun! ¡Taita Diospaj shutipi shamujujca, ‘aligumari cangui’ ni tucushca cachun! ¡Jahua pachapi Diosca, alicachi tucushca cachun!” ninajurcami.
10Jerusalenman Jesús yaicujpica:
“¿Maijan runatayari?” nishpami, chai pueblopi causaj gentecunaca, tucuilla ninanda manllarishpa paicunapura tapurinajurca.
11Shina cajpimi:
“Cai runaca, profeta Jesusmari. Paica, Galilea llactapi tiyaj Nazaret pueblomandami shamujun” ninajurca.
Diospaj huasita mapayachijcunata, llujchishpa cachashcamanda(Mar. 11:15-19; Luc. 19:45-48; Juan 2:13-22)12Jerusalenbi cashpami Jesusca, Taita Diospaj huasiman yaicurca. Chaipica jatujcunatapash, randijcunatapash llujchishpami calpachirca. Culquicunata randishpa jatushpa tiyajcunapaj mezacunatapash, palomacunata jatungapa tiyarinacunatapash urmachishpami saquirca.
13Shinallata, Jesusca cashnami nirca:
“Quilcashcapica cashnami nijun: ‘Ñuca huasiguca, Ñucata mañana huasimi canga’ nijunmi. Ashtahuangarin cangunaca, shuhuacuna pacajuna utujutashnami rurashcanguichi” nircami.
14Diospaj huasi ucupica, ñausacunapash, jangacunapash paipajman shamujpimi, Jesusca paicunataca alichijurca.
15Ashtahuangarin, shina juyailla alichijujta ricushpami, sacerdotecunata mandajcunapash, mandashca Shimita yachachijcunapash fiñarca. Shinallata: “¡Taita Davidpaj Churica, alicachi tucushca cachun!” nishpami, uchilla huahuacunaca chai pushtupica caparinajurca. Shina caparinajujpimi, ashtahuan ninanda fiñarca.
16Chashna fiñashpami:
“Caicuna cashna caparinajujtaca, ¿nachu uyangui?” ninajurca.
Shina nijpimi Jesusca, cashna nirca:
“Ari, uyajunimi.
‘Uchilla huahuacuna, chuchujuj huahuacunami,
canda alicachinajuchun ashtahuan alichishcangui’ nijujtaca,
¿nachu quilca catishcanguichi?” nircami.
17Shina nishpallami, chaimanda anchurishpa, Jerusalenmanda llujshishpaca, Betania puebloman rishpa chaipi saquirirca.
Na fucuj higo yurata, Jesús chaquichishcamanda(Mar. 11:12-14,20-26)18Jerusalenman tutamanda tigrajushpami, Jesusca yarjachirca.
19Ñan manñapi higo yura shayajujta ricushpami Jesusca, chai yuraman quimirirca. Chai yurapica, fangacunalla junda, imapash na fucushca cajpimi:
“Cunanmandaca amapacha fucungui” nirca.
Shina nijpimi, chai higo yuraguca, ñapash chaquirca.
20Shina chaquijta paipaj yachajujcuna ricushpaca, ninanda manllarishpami:
“¿Imashpata chai yuraguca, ñapash chaquircalla?” nishpa tapunajurca.
21Shina tapujpimi Jesusca, cashna nirca:
“Na llullashpami cangunataca cashna nini: Aliguta crishpa, na ishcai shungu tucushpa, cai higo yurata Ñuca chaquichishcatapash yalitami rurai ushanguichi. Shinallata, cai urcuta: ‘Caimanda anchurishpa, mama cuchaman huashajui’ nijpica, huashajungallami.
22Tucui shunguhuan crishpa, Taita Diosta mañashpaca, imagutapash japinguichimi” nijurca.
Jesusca, tucuita rurangapa ushaita charishcamanda(Mar. 11:27-33; Luc. 20:1-8)23Diospaj huasiman shamushpa Jesús yachachijujpimi, sacerdotecunata mandajcunapash, chai pueblomanda mandaj ancianocunapash, Paipajman quimirishpa, cashna nishpa tapunajurca:
“¿Pipaj ushaihuanda caicunataca, chashna rurajungui? ¿Pita chashna rurachun, candaca mandarca?” ninajurcami.
24Shina nijpimi Jesusca, paicunataca cashna nirca:
“Ñucapashmi, cangunataca shuj tapunata charini. Chaita canguna tigrachijpica, Ñucapash pipaj ushaihuan cashna rurajushcataca villashallami.
25Juan bautizachunga, ¿maimandata cachamushcanga? ¿jahua pachamandachu cachamushcanga, na cashpaca runacunachu cachamushcanga?” nircami.
Shina tapujpimi, paicunapura cashna rimarinajurca: “¿Ima nishunchita? ‘Juanga, jahua pachamanda cachamujpimi shamurca’ nijpica: ‘¿Imashpata na crircanguichi?’ ningami.
26‘Runacuna cachamujpillami shamurca’ ningapaca, gentecunata manllashpami na ni ushanchi. Tucui gentecunami: ‘Juandaca, profetami’ ninajun” ninajurcami.
27Shina ninajushpami, Jesustaca:
“Na yachapanchica” ninajurca.
Shina nijpimi Jesusca, paicunatapash cashna nirca:
“Ñucapash, Pipaj ushaihuan cashna rurajushcataca na villashachu” nirca.
Ishcai churimanda yarichishpami yachachishca28¿Cangunaca imatata yanguichi? Shuj runaca, ishcai churicunatami charirca. Shuj churitaca: “Cunanga, uvacunata pallangapa ri huahua” nishpami, taitaca mandarca.
29Shina nijpica: “Na rinayanllu” nircami. Shina nishpapash, jipaman llaquirishpaca, rircallami.
30Chai taitaca, cai shuj churipajman quimirishpami shinallata mandarca. Shina mandajpica: “Ari ripashallami taiticu” nishpapash na rircachu.
31Chai ishcai churimandaca, ¿maijanda taita munashcata rurarca? nishpami Jesusca tapurca.
Shina tapujpica:
“Punda cachashca churimi, taita munashcataca rurashca” ninajurca.
Shina nijpimi Jesusca, paicunataca cashna nirca:
“Na llullashpami, cangunataca cashna nini: ‘Impuestota japijcuna, culquimanda huainayaj huarmicunarami, cangunata mishashpa, Taita Dios mandajuj llactaman yaicunajunga.
32Ashtahuangarin alitalla rurashpa causana ñanda ricuchishpa, Bautizaj Juan villangapa shamujpipash na crishpami causarcanguichi. Shina cajpipash, impuestota japijcuna, culquimanda huainayashpa causaj huarmicunarami crinajurca. Chashnata ricushpapash, cangunaca na crishpami, na llaquirishpa causarcanguichi’ ninimi.
Pambapi tarpuj na ali runacunamanda(Mar. 12:1-12; Luc. 20:9-19)33Uyahuaichi, cutimbashmi cangunaman shuj yarichinahuan parlagrini: Shuj huasiyuj taitami, uva chagrata tarpushcata charirca. Chai tarpushca alpataca, muyunditami jarcarca. Chaipillatami, uvata cutana pushtutapash utujushpa rurarca. Shinallata shuj torretapashmi rurarca. Shina rurashpallami, tarpuj runacunaman chai alpata tarpuchun cushpa, caru llactaman rirca.
34Ña fucuna punllacuna pactajpimi, tarpuj runacunapajman, uvacuna fucushcata mañashpa apamugrichun, paipajta ruraj runata cacharca.
35Ashtahuangarin chai tarpuj runacunaca, shujtaca macashpa, shujtaca rumicunahuan shitashpa, shujtaca huañuchishpami saquirca.
36Chashna rurajpimi, punda cachashcatapash yali ashtahuan tauca runacunata cacharca. Paicunatapash, chashnallatami chai runacunaca llaquichinajurca.
37Tucuicunapaj jipaca, ‘Ñuca churigutaca cazungami’ yashpami, Paipaj churiguta cacharca.
38Ashtahuangarin tarpuj runacunaca, chai churiguta ricushpami, paicunapura cashna ninajurca: ‘Paimi, cai alpataca japinga. Cai alpataca, ñucanchi japingapa, paitaca huañuchingapa shamuichi’ ninajurcami.
39Paita japishpami, uva chagramanda llujchishpa huañuchinajurca.
40Alpayuj taita shamushpaca, chai tarpuj runacunataca, ¿imatashi ruranga?” nishpami tapurca.
41Shina tapujpimi paicunaca cashna ninajurca:
“Chai na ali runacunataca, llaquitapash na llaquishpami tucuchinga. Chai jipaca paipaj uva chagrataca, fucuna punlla chayajpi chaupingapa munaj shuj tarpuj runacunamanmi minganga” ninajurcami.
42Shina nijpimi Jesusca cashna nijurca:
“Dios quilcachishca shimipi imata nijujtaca, ¿nachu quilca catishcanguichi? Chaipica cashnami nijun:
‘Huasichijcuna na munashpa shitashca rumillatami,
huasichita callaringapa churana jatun rumi tucushca.
Chaitaca, Jatun Diosmi rurashca.
Chaita ricushpaca, ñucanchipaca ninan cushijuimi canga’ nijunmi” nircami.
43Chaimi cangunataca cashna nini: “Taita Dios mandajuj llactaman, canguna yaicunataca quichushcami canga. Chaitaca ali fucujshna Paita cazuj gentecunamanmi cunga.
44Maijambash chai rumipi urmashpaca, faquiringami. Shinallata, maijambaj jahuapipash chai rumi urmashpaca, ñutuitami ñutunga” nircami.
45Chashna yarichishpa parlajujta uyashpami, sacerdotecunata mandajcunapash, fariseocunapash, paicunamanda chashna parlajujta yachanajurca.
46Ashtahuangarin gentecunaca: “Profetami” ninajushca cajpimi, gentecunata manllashpa Jesusta imashna japitapash na ushanajurca.
Who We AreWhat We EelieveWhat We Do
2025 by iamachristian.org,Inc All rights reserved.
