AMÓS 6 - Quichua Imbabura 2016

Israelcunata llaquichishpa tucuchinamanda

1Sión pueblopi cushijushpa causajcunalla,

Samaria lomapi imatapash na manllashpa causajcunalla,

¡aij imachari tucunguichi!

Shuj llactacunapash alicachijpi causaj mandajcunalla,

¡aij imachari tucunguichi!

Cangunapajmanmi Israelcunaca shamunajun.

2Calne shuti puebloman rishpa ricugrichi.

Chaimandaca, Hamat shuti jatun pueblomambash ringuichilla.

Chai jipaca, filisteocuna causanajuj Gad shuti puebloman urai ringuichi.

¿Chai pueblocunachu cangunapaj llactacunatapash yali ali?

¿Chai llactacunachu ashtahuan yali jatun?

3Llaqui punllacuna ama chayamuchun, caruyachingapa munajcunalla,

cangunaca, na alita rurajcunahuanmi tandanajunguichi.

4Cangunaca, marfilhuan rurashca camacunapimi puñunajunguichi.

Chai camacunapimi samanajunguichi.

Maltun jari llamacunata, virayashca maltun shicucunatami micunajunguichi.

5Gaitata taquishpami maitapash candanajunguichi.

Mushuj taquinacunatapash rurashpami, Davidshna taquinajunguichi.

6Vinotapash, jatun vasocunapimi ufianajunguichi.

Mishquilla ashnajun yacucunatami churarinajunguichi.

Josepaj miraicuna llaquita apanajujpipash, na llaquirishpami chashna ruranajunguichi.

7Chashna cashcamandami, prezu apai tucushpa pundapi ringuichi.

Ima munashcata rurashpa, cushijushpa causanajushpapash, jatun llaquitami apanguichi.

8Mandaj Jatun Diosca, Paipaj shutipimi juramenturca.

Tucuita Mandaj Jatun Diosca, cashnami nin:

“Jacobpaj miraicunataca, yapa jariyashcacuna cajpimi, na ricunayachini.

Mandashpa tiyajuna paicunapaj huasicunatapash millanayachinimi.

Chaimandami chai pueblotaca, chaipi imalla tiyajcunandi, paicunata fiñajcunapaj maquipi churasha” ninmi.

9Chai punllapica, cashnami tucunga: Chunga runacuna shuj huasipi saquirishpapash, huañungami.

10Chai huañushcacunataca, shuj ayllullami tandachishpa, tullucunata canllaman shitangapa, tucuilla rupachinga. Paitaca shuj ayllumi: “¿Nachu maijanllapash causaj saquirishca?” nishpami tapunga. Shina nijpica chai runaca: “Shujllapash na saquirishcachu, ashtahuangarin upalla cailla. Mandaj Diospaj shutitaca, napacha rimai ushanachu canchi” ningami.

11Mandaj Diosmi, jatun huasicunatapash,

uchilla huasicunatapash, pircacunata faquishpa tucuchinga.

12¿Caballocunaca, jaca rumicunata calpai ushangachu?

Chai rumicunapica, ¿huagrahuan yapui ushangachu?

Cangunaca ¿imashpata aliguta ricushpa mandangapa randica, huañuchircanguichi?

¿Imashpata, alita ruranapa randica, jatun llaquita curcanguichi?

13Cangunaca, napash cushijunapi cushijushpami:

“Mandanatapash, ñucanchi ushaihuanmi charinchi” ninajunguichi.

14Shina cashcamanda Israel gentecunalla.

Tucuita Mandaj Taita Diosmi cashna nin:

“Cangunata llaquichijuchunga, shuj llactatami cachamusha.

Chai llactami, Hamat shuti puebloman yaicunamandaca,

Arabá llactapi tiyaj jatun larca yacucaman mishashpa llaquichinga” ninmi.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help