Psalms 19 - Quichua Imbabura 2016

Dios rurashcamandapash, Paipaj ShimimandapashCandajcunata mandaj candachijuchun, David rurashca Salmomi.

1Jahua pachaca, Taita Dios ninan ushaita charishcatami ricuchijun.

Chaipi imalla tiyajcunapash, Paipaj maquihuan rurashcatami villajun.

2Shuj punllapash, caishuj punllamanmi villajun.

Shuj tutapash, caishuj tutamanmi yachachijun.

3Imata rimajpash, na uyarinllu,

ima shimicunapash na uyarinllu.

4Shina cajpipash, tucui cai pachapimi yachaj chayanajun.

Pai rimashca shimicunataca, cai pacha tucuri manñacamanmi yachaj chayanajun.

Jahua pachapimi, indimambash huasita churarca.

5Indica, chairalla cazarashcacunapaj huasi ucumanda cusa llujshijshnami llujshijun.

Shina llujshishpami, paipaj ñandaca ninanda cushijushca rijun.

6Paica, jahua pacha manñatami llujshijun.

Pai rishpa muyunaca, jahua pacha tucuri caishuj manñacamanmi.

Paipaj rupaimandaca, imapash na pacajui ushanllu.

7Mandaj Dios mandashcacunaca,

ima pandapash illaj cashpami, runacunataca mushujyachijun.

Mandaj Diosca tucuita pactachij cashpami, runataca alipacha yachajushca cachun yachachin.

8Mandaj Dios mandashcacunaca,

imapapash alipacha cashpami, shungutaca cushichin.

pactachinajuchun Mandaj Dios mandashcacunaca,

ima mapapash illaj cashpami, ñavitaca punchayachin.

9Mandaj Diosta manllanaca,

ima mapapash illaj cashpami napacha tucuringa.

Mandaj Dios mandashcacunaca, na llullachu.

Tucuillami, alitapacha pactachin.

10Ali curitapash ashtahuan yali juyaillami.

Balun mishquitapash yali ashtahuan mishquimi.

11Cambajta ruraj ñucaca, Can mandashca Shimita yachajushcami cani.

Chaicunata pactachishpallami, japigrina cashcataca japigrisha.

12Paillata pandarishcataca, ¿pita yachai ushanga?

Ñuca na yarishca juchacunamandaca cacharichihuailla.

13Shinallata cambajta ruraj ñucamandaca,

jariyashpa jatun tucuna yuyaicunatapash anchuchipailla.

Chai yuyaicuna ñucata mandachunga, ama saquihuaichu.

Shina cajpimi, ima na alitapash na rurashpa, Candalla cazushpa causapasha.

14Ñuca shimihuan, ñuca shunguhuan rimashcacunapash,

Cambaj ñaupajpi chasquinalla capachun.

Mandaj Dioslla,

Canga jatun rumishna ñucata pacashpa quishpichijmi capangui.