Psalms 24 - Quichua Imbabura 2016

Ninan ushaita charij Jatun MandajmandaDavid rurashca Salmomi.

1Cai pachapi, tucui ima tiyashcapash Mandaj Diospajmi.

Cai alpapash, chaipi causajcunapash Paipajllatami.

2Paimi, cai alpataca, mama cucha chaupipi churarca.

Jatun yacu rijuj jahuacunapimi, alitapacha churarca.

3¿Pita Mandaj Diospajlla lomaman vichai ri ushanga?

Paipajlla shicanyachishca ucumanga, ¿pita yaicui ushanga?

4Ima na alitapash na ruraj, ali yuyaita charij runallami chaimanga yaicunga.

Shinallata, rurashcalla dioscunataca na alicachishpa causaj,

umachishpa juramentunatapash na yachajllami yaicunga.

5Chashna alita ruraj runatami, Mandaj Diosca bendicianga.

Taita Diosca quishpichishpami, paimanga imata cuna cashcata cunga.

6Diosta mascajcunallami, chashna alicunataca japinga.

Jacobpaj Taita Dioslla,

Canman quimirijcunami, chashna alicunata japinajunga. Selah

7Pungucunapash, cuyurishpa pascarichiyari.

Causaita causaicaman tiyaj pungucunapash, pascarichiyari.

Shina pascarijpimi, ninan ushaita charij Jatun Mandajca yaicunga.

8¿Ninan ushaita charij Jatun Mandajca, pitayari?

Paica, ninan ushaita charij, shinllipacha Mandaj Diosmi.

Paica, jatun macanajuita mishaj Mandaj Diosmi.

9Pungucunapash, pascarichiyari.

Causaita causaicaman tiyaj pungucunapash, pascarichiyari.

Shina pascarijpimi, ninan ushaita charij, Jatun Mandajca yaicunga.

10¿Ninan ushaita charij Jatun Mandajca, pitayari?

Paica, tucuita Mandaj Diosmi.

Paica, ninan ushaihuan Jatun Mandajmi. Selah