Psalms 74 - Quichua Imbabura 2016

Fiñajcuna llaquichijujpi, Taita Diosman villashcamandaYachachingapa Asaf shuti runa rurashca Salmomi.

1Taita Dioslla,

¿imamandata ñucanchitaca, causaita causaicaman jichushpa saquircangui?

¿Imamandata jihua pambapi purinajuj Cambaj llamacunataca, ninanda fiñarcangui?

2Punda huatacunallata Can agllashca gentecunataca yaripayari.

Can agllashca ayllucuna cachunmi quishpichircangui.

Can causajuj Sion pueblotapash yaripayari.

3Cambaj huasita llaquinayaita tucuchishcata ricuj shamupayari.

Cambajlla huasitaca canda fiñajcunami chashna tucuchishca.

4Canda fiñajcunaca, chaipi tandanajushpami cushijushpa caparinajun.

Paicunapaj cajta ricuchingapami, banderacunata churarca.

5Paicunaca, quiru junda pamba chaupipi, hachahuan quiruta cuchunajunshnami.

6Cunangarin, labrashca cambaj caspicunataca,

hachacunahuan, martillocunahuanmi tucuillata faquirca.

7Cambajlla huasitaca, ninahuanmi rupachirca.

Can causajuj Cambajlla huasitaca, alpaman shitashpami, yangapi churanajurca.

8Paicunapaj shungupica: “Tucuillata tucuchishun” yashpami purinajurca.

Taita Diosta yaringapa tandanajuna huasicunataca, tucuillatamari rupachirca.

9Can ñucanchihuan cajtaca na ricushpami causanajunchi.

Cambaj profetacunapash illanmari.

Ima punllacunacaman cashna canata yachajpash, na tiyapanllu.

10Taita Dioslla,

¿ima punllacunacamanda ñucanchita fiñajcunaca rimashpa llaquichigrin?

Canda fiñajcunaca, ¿causaita causaicamanllu, Cambaj shutita na ali cachishpa rimanajunga?

11¿Imamandata, imatapash na rurapangui?

¿Imamandata Cambaj ninan ushaitaca na ricuchipangui?

12Ashtahuangarin, punda huatamandapachami Taita Diosca ñucata jatun mandaj cangui.

Canmi cai pachapica quishpichij capangui.

13Cambaj ushaihuanmi, mama cuchatapash chaupircangui.

Yacucunapi tiyaj manllanayai animalcunapaj umatapashmi faquircangui.

14Leviatán manllanayai animaltaca umapi sarushpami huañuchircangui.

Chaitaca, jichushca pambacunapi causaj animalcuna micuchunmi shitarcangui.

15Canmi pugyucunatapash, jatun yacucunatapash churarcangui.

Ninandapacha rijuj jatun yacucunatapash chaquichircanguillami.

16Punllapash, tutapash Cambajllatami.

Canmi inditapash, lunatapash churarcangui.

17Canmi, tucui cai pacha maicamanlla canataca churarcangui.

Rupai punllacunatapash, tamia punllacunatapash Canmi churarcangui.

18Mandaj Dioslla,

Canda fiñajcunami Candaca na alicachishpa rimanajurca.

Juizu illaj gentecunaca, Cambaj shutitami na ali shimicunahuan rimanajurca.

19Urpigushna, Cambaj gentecunataca, na alicunapaj maquipica ama saquipaichu.

Llaquita apaj, Cambajlla gentecunataca, causaita causaicaman ama cungapanguichu.

20Ñucanchihuan ari ninajushcata, ama cungapanguichu.

Cai pachapica, yana yana tutapishna na ali gentecunahuanlla jundami causanajunchi.

21Llaquicunahuan causajcunataca, ama ashtahuan llaquichinajuchun saquipanguichu.

Imatapash na charijcuna, llaquihuan causajcunaca, Candami alicachinajunga.

22Taita Dioslla,

paicunamanda shayarishpa jarcapayari.

Punllandi imashna Canda, na alicachishpa, juizu illaj runa rimajtaca yaripanguilla.

23Canda fiñajcuna na alicachishpa caparinajujtaca, ama cungapanguichu.

Canda fiñashpa rimajcunaca, ashtahuanmi caparinajun.