1Sabá shuti llactata jatun mandaj huarmica, Mandaj Dios, Salomonman ushaita cujpi tucuicuna alicachishpa parlanajujtami, yachaj chayarca. Chaita yachashpami, na tigrachi ushanalla tapunacunata tapushpa yachangapa shamurca.
2Chai huarmica, ashtaca gentecunahuanmi, Jerusalenman shamurca. Paica, mishquilla ashnajuncunata, ashtaca curita, juyailla rumigucunata, camellocunapi apachishpami shamurca. Salomonbajman chayamushpaca, paipaj shungupi tucui imatalla yarijushcatami, tucuita tapujurca.
3Salomonga, chai huarmi tapushcataca tucuitami tigrachijurca. Jatun mandaj na tigrachi ushanallacunaca, imapash na tiyarcachu.
4Sabá llactata jatun mandaj huarmica, Salomonbaj tucui ali yachashcatapash, pai mandashpa tiyajuna huasita shayachishcatapashmi ricujurca.
5Shinallata, mezapi tiyanajuj micunacunatapash, Salomonbajta rurajcuna causana ucucunatapash, churajushcatapash, paiman micunata yalichijcunatapashmi ricujurca. Paica, Mandaj Diospaj huasipi animalcunata cushpa tucuillata rupachintapash ricushpami, ninanda manllarishpa ricujurca.
6Chaimandami jatun mandajtaca, cashna nijurca: “Ñuca llactapi cashpallatami, can imata rurashcacunatapash, can alipacha yachajushcatapash uyarcani. Chaica na llullachu cashca.
7Ashtahuangarin, ñuca caiman nara shamushpaca, na chashnachu canga yajurcanimi. Ñuca ñavihuambacha cunan ricujpica, chaupitallapash na parlahuashcachu. Can alipacha yachajushca cajta, ninan charij cajta tucuicuna parlanajushcataca, ashtahuan yalitami ricujuni.
8Cambaj ali yachaita, punllandi uyaj cambajta ruraj cai runacunaca, ninanda cushijushcami canga.
9Canda alicachishpa, Israelcunata mandashpa tiyajunapi churaj Mandaj Taita Diosca, ninanda alicachi tucushca cachun. Mandaj Diosca, Israelcunata juyajujlla cashpami candaca, tucuicunapaj ali cachun ricushpa, mandajuchun churashca” nijurcami.
10Shina nishca jipami jatun mandajmanga, pusaj chunga shuj quintal chaupita pezaj curita, mishquilla ashnajuncunata, juyailla rumicunata cararca. Sabá shuti llactata jatun mandaj huarmi, jatun mandaj Salomonman, mishquilla ashnajuncunata apamushcashnaca, pipash nara apamushcachu carca.
11Hiram shuti runapaj jatun barcocunami, Ofir shuti llactamanda curita apamushca carca. Chai barcocunallatami, sándalo shuti caspicunatapash, juyailla rumicunatapash apamushca carca.
12Chai sándalo caspicunahuanmi, Mandaj Diospaj huasipipash, mandana huasicunapipash, maquihuan charirishpa jarcarinacunatapash rurarca. Shinallata, candajcunaman arpacunata, salteriocunatapashmi rurachirca. Chashna ashtaca sándalo caspicunata apamushcataca, cunangaman pipash na ricushcachu.
13Jatun mandaj Salomonga, Sabá llactata jatun mandaj huarmi tucui imata munashcata carashpami, pai apamushcatapash ashtahuan yalishpa cararca. Chai jipami chai huarmica, paipajta rurajcunandi paipaj llactaman tigrarca.
Salomonga ninan charij cashpami, ashtahuan rijsi tucushca(2 Crón. 9:13-24)14Salomonga huatandimi, chuscu patsaj picha chunga ishcai quintal, chuscu chunga chuscu kilo curita japijun carca.
15Mishquilla ashnajuncunata caru llactamanda apamushpa jatujcuna, Arabia llactata tucui jatun mandajcuna, pai mandajuj llactapi churashca mandajcuna cuna cashcataca, na yupashcachu carca.
16Jatun mandaj Salomonga, ishcai patsajta macanajushpa jarcarinacunatami, curita tacashpa rurachirca. Tucui chaicunapimi, sucta kilo chaupita pezaj curita churarca.
17Shinallata curita tacashpami, quimsa patsaj macanajuipi jarcarinacunata rurachirca. Chaicunapica tucuipillatami, quimsa libra curita churarca. Jatun mandajca, Líbano urcu caspicunahuan rurashca huasipimi alichirca.
18Jatun mandajca, mandangapa tiyarinatapash marfilhuanmi rurachirca. Chaitaca, ashtahuan ali curihuanmi jahualla quilparca.
19Chai tiyarinaman vichai ringapaca, sucta gradacunami carca. Chai tiyarina huashaca, redondollata rurashcami carca. Rigrata samachishpa tiyajungapapash, ishcandimanmi rurashca carca. Chai samachinacunapica, leonshnallacunata rurashcami carca.
20Chai sucta gradaspipash, chunga ishcai leonshnallacunatami, ishcandi manñaman churashca carca. Mandangapa tiyarinataca, maijan llactapipash na chashna rurashcachu carca.
21Jatun mandaj Salomón ufiana vasocunapash, curita rurashcami carca. Shinallata, Líbano urcu caspicunahuan shayachishca huasipi tiyaj platocunapash, ashtahuan ali curita rurashcami carca. Salomón mandajui punllacunapica, culquica na yapa ali cajpimi, culquimandaca imatallapash na rurachirca.
22Jatun mandaj Salomonga, Tarsis pueblomanda paipaj jatun barcocunatami, Hiram runapaj barcocunahuan mama cuchapi charirca. Chai barcocunapica, Tarsis pueblomanda curita, culquita, marfilta, monocunata, pavo realcunata apamushpami, quimsa huatapi muyumunajun carca.
23Chashnami jatun mandaj Salomonga, charij cangapapash, ashtahuan alipacha yachajushca cangapapash, shuj llacta jatun mandajcunataca, tucuita yalipacha carca.
24Tucui llactacunapi causajcunami, Salomonbaj ñavita ricungapa munaj carca. Paipaj shungupi ali yachaita Taita Dios carashcahuan parlajta uyangapami, chashna munanajuj carca.
25Tucuicunami paiman carangapaca, curita, culquita rurashca juyailla charishcacunata, churajunacunata, macanajunacunata, mishquilla ashnajuncunata, caballocunata, mulacunata, huatapi huatapi apamunajun carca.
Caballocunata, carretacunatami, Salomonga randishpa jatujushca(2 Crón. 1:14-17; 9:25-28)26Salomonga, macanajuna carretacunata, caballopi tiyarij macanajuj runacunatami tandachirca. Paica, huaranga chuscu patsaj carretacunata, caballocunapi tiyarij chunga ishcai huaranga macanajuj runacunatami charirca. Paicunatami huaquingunataca, macanajuna carretacunata tandachishpa charina pueblocunapi, shujcunataca pai jatun mandajpaj Jerusalen pueblopi churarca.
27Jatun mandaj Salomonga, culquitaca rumitashnami Jerusalenbica charirca. Cedro caspicunatapash, Sefela pambacunapi tiyaj sacha higo yuracunatashnami ashtacatapacha charirca.
28Caballocunata, telacunataca, Egiptomandami Salomonman apamunajun carca. Jatushpa randishpa purijcunami, caballocunata, telacunata Jatun mandajman apamunajun carca.
29Egiptomandaca, shuj carretatallami, sucta patsaj culquipaj randishpa apamunajun carca. Caballotaca, patsaj picha chunga culquipajmi randinajun carca. Salomonbaj chai runacunallatami, heteocunata jatun mandajcunamambash, Siria llactata jatun mandajcunamambash jatunajurca.
Who We AreWhat We EelieveWhat We Do
2025 by iamachristian.org,Inc All rights reserved.