OSEAS 2 - Quichua Imbabura 2016

Mandaj Dios, Paita na cazuj Israelcunata juyashcamanda

1“Cangunapaj huauquicunataca: ‘Ammi’ ninguichi.

Cangunapaj panicunataca: ‘Ruhama’ ninguichi.

2Cangunapaj mamataca, ninanda na alicachishpa rimaichiyari.

Paica, na Ñuca huarmichu, Ñucapash na paipaj cusachu cani.

Huainayashpalla causanataca saquinami.

Cazarashca jahua jatun na alita ruranataca saquinami.

3Na chashna rurajpica, churajushcata quichushpami,

huacharishca punllapishna lluchullata saquisha.

Jichushca pambatami saquisha.

Chaquishca alpamanmi tigrachisha.

Yacunayaimanda huañuchunmi saquisha.

4Paicunapaj huahuacunataca, huainayashpa charishca cashcamandami, napacha llaquisha.

5Paicunapaj mamami huainayarca.

Paicunata unguj mamaca, ninandami na alicachi tucushca.

Paica: ‘Ñucata juyajcunata catishpami risha.

Paicunami micunata, yacuta, milmata, linota, aceiteta,

ima ufianacunatapash carahuan’ nijurcami.

6Shina cashcamandami, pai purina ñandaca, cashacunahuan muyundi jarcasha.

Maitapash ama puri ushachunmi, muyundi jarcashpa saquisha.

7Paita juyajcunata catishpa rijushpapash, na japigringachu.

Mascashpapash na taringachu.

Shinamandami paica, cashna ninga:

‘Ñuca punda cusapajmanllata tigrashalla.

Cunanhuan ricujpica, aligutami causajurcani’ nijungami.

8Chai huarmica, trigota, vinota, aceiteta ñuca carajushcataca, yaritapash na yarircachu.

Ashtahuangarin, Ñuca carajpi mirachishca culquita, curitaca, Baal shuti diosmanmi cararca.

9Shinamandami, granota tandachina punlla pactajpica,

trigotapash, uvacunatapash, Ñucallata tandachingapa tigramusha.

Shinallata, pai lluchulla cajpi quilparichun,

Ñuca carashca, milmatapash, linotapashmi quichusha.

10Cunanga, paita juyajcunapaj ñaupajpi lluchullata saquishpami ninanda pingaichisha.

Paitaca, Ñuca maquimandaca, pipash na cacharichi ushangachu.

11Pai cushijushpa causanatapash,

jatun micui punllacunatapash, llullu luna punllacunatapash,

samana punllacunatapash, tucuitami tucuchisha.

12Paicunapaj uvacunata, paicunapaj higocunatapashmi chingachisha.

Chaicunataca: ‘Ñuca juyashcacuna ñucaman cushcami’ nijurcami.

Chai pambacunataca, Na ali jihuacunatalla jundachishpami,

sacha animalcuna micuchun saquisha.

13Baal shuti rurashcalla dioscunaman inciensota cushnichishcamandaca llaquichishami.

Juyaillagu ricuringapa zarcillocunata, juyailla ima huatarinacunata huatarishpami, paita juyajcunapajman rirca.

Ñucata cungashpa chashna rurashcamandami chashna llaquichisha” ninmi Mandaj Diosca.

14“Ashtahuangarin paitaca juyaillaguta rimashpami,

jichushca pambaman pushashpa, shunguman chayajta rimasha.

15Shinallata, uva tarpushca paipaj pambacunatapash cutinmi cusha.

Acor shuti pugru pambatapash, imagutapash shuyana yuyaihuan yaicuna pungutami rurasha.

Chaipimi paica, chairalla viñai cashpa candashcashna candajunga.

Egipto llactamanda vichai shamujushca punllapishnami candanga” ninmi.

16Mandaj Diosca, cashnatapashmi nin:

“Chai huatacunapica, Ñucataca Ishi nihuangami.

Ima punllapash Baali shutihuanga na rigsihuangachu.

17Baal dioscunapaj shuticunata rimanatapash cungachishami.

Chai rurashcalla dioscunapaj shuticunataca, ima punllapash na ashtahuan rimangachu.

18Chai huatacunapica, canguna ali causachunmi,

sacha animalcunatapash, jahuata rij alasyu animalcunatapash,

alpata llucashpa purij animalcunatapash, ama llaquinajuchun ari nichisha.

Cai llactamandaca, arcota, espadata, jatun macanajuita anchuchijpimi,

imatapash na manllashpa cungashca puñungui.

19Cutin canhuan cazarashpami, causaita causaicaman cambaj cusa casha.

Chashnami, tucuita ali rurashpa, tucuita pactachishpa, ninanda llaquishpa, imatapash juyaihuan rurashpa causachun cazarasha.

20Tucuita pactachingapami, canhuanga cazarasha.

Shina rurajpimi, Mandaj Dios cajtaca rijsihuangui” ninmi.

21Mandaj Diosca cashnami nin:

“Chai huatacunapica, jahua pacha imatalla mañashcatami tigrachisha.

Cai pacha mañashcataca, jahua pachami tigrachinga.

22Shinamandami, alpapica trigopash, uvapash, olivopash fucunga.

Tucui chai granocunataca, Jezreel pambapimi fucuchisha.

23Israelcunataca, Ñucapaj cachunmi, tarpujshna cai llactapi churasha.

Shina churashpami, Lo-ruhamataca llaquisha.

Lo-ammitaca: ‘Canga, Ñuca agllashcami cangui’ nishami.

Paica: ‘Ñuca Taita Diosmi cangui’ nihuangami ninmi” nircami.