1Taita Dioslla,
imashnami tarugacuna yacuta mascashpa huacanajun,
chashnallatami ñucapash Candaca, mascashpa caparijuni.
2Causaj Taita Diostaca, ninanda yacunayachijshnami mascajuni.
¿Ima punllashi Taita Diospaj ñaupajpi ricuringapa shamusha?
3Punllapash, tutapash, ninanda huacashpami viquita jichajurcani.
Tucui punllacunami: “¿Cambaj Taita Diosca, maipitayari?” ninajuhuan.
4Chaicunata yarishpami, shungu junda llaquirini.
Ashtaca gentecunata pushashpami, Diospaj huasiman chayajun carcani.
Ninan cushijuihuan alicachishpa caparinajujcunapaj chaupipimi, tucui gentecunahuan rijun carcani.
5¿Imashpata chashnapacha llaquirijuniyari?
¿Imashpata maitapash yarijuniyari?
Taita Dioslla,
Candaca alicachinarami cani.
Ñucata quishpichij, ñuca Taita Diosmi cangui.
6Ñuca Taita Dioslla,
ninanda shaijushcamari cani.
Jordán yacu manñapi shayajushpami, Candaca yarijusha.
Hermón urcumanda, Mizar lomamandami Candaca yarijusha.
7Faccha yacu urmamushpa huacanshnami, caita chaita uyarijun.
Chai yacu jatarinshnami ñucataca quilpahuashca.
8Mandaj Diosca, punllapimi, Paipaj ninan juyaitaca ricuchinga.
Tutacunaca, Canda alicachishpami candajusha.
Ñucaman causaita caraj Taita Diostami mañashpa causajusha.
9Taita Diostaca: “Jatun rumishna ñuca Dioslla,
¿imashpata ñucata cungahuangui?
¿Imashpata ñucata fiñaj runa llaquichijpi, ninanda llaquirishpa purijusha?” nishami.
10Ñuca tullucunata faquinshnami, ñucata fiñajcunaca llaquichinajun.
Paicunaca, punllandimi:
“¿Cambaj Taita Diosca maipitayari?” ninajun.
11¿Imashpata shaijushpa, ñuca shungupipash maitapash yarijuniyari?
Taita Dioslla,
Candaca alicachinarami cani.
Ñucata quishpichij, ñuca Taita Diosmi cangui.
Who We AreWhat We EelieveWhat We Do
2025 by iamachristian.org,Inc All rights reserved.
