JEREMÍAS 31 - Quichua Imbabura 2016

1Mandaj Diosca, cashnatapashmi nin:

“Chai huatacunapica, Ñucaca tucui Israel ayllucunapaj Taita Diosmi casha.

Paicunaca, Ñuca agllashca gentecunami canga.

2Huañunamanda pacajushpa calpaj Israel gentecunaca, jichushca pambapimi cushijuita tarirca.

Paicunaca, samanata mascangapa rinajushpami, chashna tarirca” ninmi Mandaj Diosca.

3Mandaj Diosca, punda huatacunapi ricurishpami cashna nihuarca:

“Candaca, ninanda juyashpami charishcani.

Candaca, causaita causaicamanmi llaquijushalla.

4Israelcunalla, cangunaca chaira cuitsagushnami canguichi.

Cangunataca, Ñuca ushaihuanmi shinlliyachisha.

Cangunaca, juyaillata alichirishpami, panderota huactashpa, cushijushpa, tushungapa llujshinguichi.

5Samaria urcu alpacunapipash, uva yuracunata tarpunguichirami.

Tarpushcacuna fucujpimi, micushpa cushijunajunga.

6Efraín urcupi ricuriashpa tiyajcunapash:

‘Ñucanchita Mandaj Taita Diospajman jacuchi.

Sion lomaman vichai rishunchi’ nishpa,

ninanda caparina punllacunapash chayangami” nihuarcami.

7Mandaj Diosca, cashnami nin:

“Jacobpaj miraicunamandaca, ninanda cushijushpa caparichiyari.

Tucui llactacunata, umashna mandajujtaca, jatun cushijuihuan candaichiyari.

Tucuicuna uyajta alicachishpa, cashna nichiyari:

‘Mandaj Dioslla, Can agllashcacunamanda, puchushca Israelcunata quishpichipailla’ nichiyari.

8Ñucami paicunataca, janaj llactamandaca tigrachimusha.

Cai pacha tucuri llactacunamandami tandachimusha.

Paicunapurapica, ñausacuna, suchucuna, vijsayu huarmicuna,

huahuata ungushca huarmicunapash, ashtacapacha tandanajushcami tigramunga.

9Paicunaca, huacashpami rinajurca.

Ashtahuangarin, ninanda llaquishpami tigrachimusha.

Jatun larca yacu manñacunata, ima nitijanapash illaj, ali ñandami pushamusha.

Ñucami, Israelcunapaca Taita cani.

Efraín ayllucunaca, Ñuca punda churimi” ninmi.

10Llactacunapi causajcunalla, Mandaj Dios rimashcata uyaichiyari.

Chaita uyashpaca, mama cucha manñacunapi tiyaj, caru llactacunapipash, cashna nishpa villaichiyari:

“Israelcunata llujchishpa, caita chaita cachaj Diosca, cutinmi paicunataca tandachimunga.

Shina tandachimushpaca, llamata michij runa, paipaj llamacunata ricujshnami ricuriajunga” nichiyari.

11Mandaj Diosmi, Jacobpaj huahuacunataca quishpichirca.

Paicunata yali, ninan shinlli runapaj maquimandami cacharichirca.

12“Paicunaca, ninanda cushijushpa caparishpa candashpami, Sion lomaman vichai shamunajunga.

Mandaj Dios carashca alicunata japingapami calpanajunga.

Micunata, vinota, aceiteta, llamacunata, huagracunata chasquingapami shamunajunga.

Punllandi yacuta jichashpa tarpushca pambashnami canga.

Paicunaca, ima punllapash na llaquihuan causangachu.

13Shinamandami, chairalla viñajuj cuitsashna tushushpa cushijunga.

Chairalla viñaicunapash, rucucunapash tandanajushpami cushijunga.

Paicuna huacanajushcataca, cushijuimanmi tigrachisha.

Jatun llaquihuan causashcamanda samachishpami, cushijuita carasha.

14Sacerdotecunatapash ninandami bendiciasha.

Ñuca agllashca gentecunamambash, tucui alicunatami carasha” ninmi Mandaj Diosca.

15Mandaj Diosca, cashnatapashmi nin:

“Ramá shuti pueblopica, ninanda caparishpa, ninan llaquihuan huacajujmi uyarirca.

Raquel huarmimi, paipaj huahuacunamanda ninanda huacajurca.

Ama yapa huacaichu nijpipash, paipaj huahuacuna huañushcamandaca huacajurcallami” ninmi.

16Mandaj Diosllatami, cashna nin: “Ama ashtahuan huacaichu.

Cambaj ñavimanda, viquitaca ama ashtahuan jichaichu.

Chashna llaquita apajushcamandaca, alitami cusha.

Fiñaj runapaj llactamandaca tigramungami” ninmi Mandaj Diosca.

17Mandaj Diosca, cashnatapashmi nin:

“Cambaj huahuacunaca tigramungami.

Paicunapaj alpamanllatami, cutin tigramunga.

18Efraín ayllucunataca, cashna caparishpa huacantami uyarcani:

‘Canmi, Ñucataca astihuarcangui.

Millai huagrashna cashcamandami, llaquichi tucurcani.

Cambajman cutin tigrachihuayari, Ñucaca cambajman tigrarishallami.

Canmi, ñucata Mandaj Dios capangui.

19Canmanda anchurishca jipami, ninanda llaquirircani.

Ñucallata na alita rurashcata yarishpami, ninanda llaquirircani.

Chairalla viñajushpa juchata rurashcamandami, chashna pingai tucushpa musparijurcani’ nijujtami uyarcani.

20Efraín ayllucunaca, ¿nachu Ñucapaca, juyailla huahuashna capan?

¿Nachu Ñucata ninanda cushichij huahua capan?

Paimanda imata nijushpapash, paitaca yarijunillami.

Ñuca paita yarijushpaca, shungu jundami llaquirircani.

Paitaca llaquishapachami, ninmi Mandaj Diosca.

21Can maita rishpapash, carumanda ricunalla rumicunata ñangunapi churashpa ringui.

Maijan ñanda rijushpapash, aliguta yarishpa ringui.

Israelcunaca, chairalla viñajuj cuitsashnami canguichi.

Cambaj pueblocunamanllatami tigramuna cangui.

22Shinlli shungu tucushca ushigulla,

¿Ima punllacamanda urai, vichai purijugringuilla?

Mandaj Dios Ñucami cai llactapica, mushujta rurasha.

Huarmica, cusahuanmi pacta causanga” ninmi.

23Tucuita Mandaj, Israelcunapaj Taita Diosmi, cashna nin:

“Prezu apai tucushcacunata Ñuca tigrachimujpica,

Judá llactapipash, chai llactapi tiyaj pueblocunapipash, cashnami ninajunga:

‘Alitalla rurashpa causana pueblolla, Diospajlla lomalla, candaca Mandaj Dios bendiciachun’ ninajungami.

24Chaipica, Judá llacta gentecunami causanajunga.

Tucui chai pueblocunapica, tarpujcuna, animalta michijcunapashmi causanajunga.

25Shaijushcacunatapash, samachishami.

Llaquilla causajcunamambash, cushijuita carashami” ninmi.

26Shina nijta uyashpaca, rijcharircanillami. Ñucaca juyailla muscuitami charishcarcani.

Mushujta ari nishcamanda

27Mandaj Diosca, cashnami nin: “Shamui punllacunapica, Israel ayllupipash, Judá ayllupipash, gentecunata, animalcunataca ninandami mirachisha.

28Imashnami paicunataca, calpachishpa, urmachishpa, ninanda llaquichishpa tucuchircani, chashnallatami, cutin alichishpa, shinlliyachishpa mirachisha” ninmi Mandaj Diosca.

29“Chai punllacunapica: ‘Taitacuna jayaj uvata micushcamandami, huahuacunaca quirucunata nanachinajun’ nitaca, na ashtahuan ningachu.

30Ashtahuangarin juchata rurashcamandaca, paillatami huañunga. Maijambash jayaj uvata micushpaca, paillatami quirucunataca nanachinga” ninmi.

31Mandaj Diosca, cashnatapashmi nin: “Israel ayllupi, Judá ayllupi causajcunahuan mushujta rurangapa ari ninajuna punllacunami chayamugrijun.

32Paicunapaj taitacunata, Egipto llactamanda llujchimujui punllapi, ari ninajushcashnaca na rurashachu. Ñuca, paicunapaj cusa cajpipash, ñucahuan ari ninajushcataca, yangapi churashpami, na cazunajurca” ninmi Mandaj Diosca.

33Mandaj Diosca, cashnatapashmi nin: “Shamui punllacunapica, Israelcunahuan imatalla rurangapa ari ninajushpaca, cashnami rurasha: Ñuca mandashca Shimicunata paicuna yachajuchunmi, paicunapaj shungupi quilcashpa churasha. Shina rurashpami Ñucaca, paicunapaj Taita Dios casha, paicunapash Ñucapajlla gentecunami canga.

34Chaipica, paicunapaj cumbacunata, paicunapaj huauquicunata cashpapash: ‘Mandaj Diosta rijsinami cangui’ nishpaca, pipash na yachachijungachu. Ñucataca, tucuicunami, uchillamanda callarishpa, rucucaman rijsihuanga. Ñucallatami, paicuna na alita rurashcataca cungasha. Paicunapaj juchataca, napacha cutinga yarishachu” ninmi Mandaj Diosca.

35Mandaj Diosca, punllata punchayachijuchunga inditami churarca.

Tutata punchayachijuchunga, lunata, luzerocunatami churarca.

Mama cucha yacutapash, Paimi caiman chaiman cuyuchijun.

Paica, tucuita Mandaj Diosmi. Paimi cashna nin:

36“Tucui cai mandashcacuna na pactajpica,

Israelcunapaj miraicunapash, causaita causaicaman, na Ñuca agllashcacuna cangachu.

37Mandaj Diosca, cashnatapashmi nin:

Maijambash jahua pacha maicaman cajta yachai ushajpi,

cai pacha ucumambash, maicaman cajta yachai ushajpica,

Ñucapash, Israelcunataca, tucui na alita rurashcamandaca shitashallami” ninmi Mandaj Diosca.

38Mandaj Diosca, caitapashmi nin: “Shamui punllacunapica, Jerusalén puebloca Hananeel shuti torremandaca, pirca tigranapi tiyaj pungucamanmi, Mandaj Dios Ñucapajlla canga.

39Chai pungumandaca, Gareb shuti lomacaman, chaimandaca, Goa shuti pambacamanmi canga.

40Huañushcacunata pambana pugru pambapash, uchufata shitana pambapash, chai tucui pugru pambacunapash, Cedrón shuti jatun larca yacucaman, indi llujshimujman tiyajuj, caballocuna yaicuna pungu tigranacamanmi, Mandaj Dios Ñucapajlla shicanyachishca pueblo canga. Shinamandami, caimandaca napacha cutin llujchishpa cachai tucunga. Paicunaca, napacha tucuchi tucungachu” ninmi.