COLOSENSES 2 - Quichua Imbabura 2016

1Ashtahuangarin caitami yachachun munani: Cangunamandapash, Laodicea pueblopi causajcunamandapash, ñucata na rijsijcunamandapashmi, ninanda macanajujshna imatapash rurajuni.

2Paicunapaj shungupica tucuicunallata cushijushpa, shujllashnalla juyarishpa causashpami, tucui alipacha yachajunatapash chasquinga. Chashnami, Taita Diospash, Cristopash, tucuita pacalla charijushcataca, tucuitapacha ali yachajuita ushanguichi.

3Cristopimi, tucui juyailla yachajushpa, alipacha yachanaca pacashca tiyajun.

4Caitaca, pipash juyailla shimicunahuan ama cangunata pandachinajuchunmi cashna nijuni.

5Ñucapacha cangunahuan na chaipi cajpipash, ñuca espirituca cangunahuanmi. Shina cashpami, canguna, Cristota shinllipacha crishpa catinajujta, tucuita aliguta pactachinajujta yachashpa cushijuni.

6Shinamandami, Apunchi Jesucristota chasquishca cashpa, Paihuanlla causana canguichi.

7Alipacha sapiyashca, shinllipacha huasichishcashnami, Jesucristotaca aliguta crishpa catina canguichi. Cangunaman yachachishcataca, na cungashpami Diosta “pashi” nishpa causana canguichi.

Mushuj causaitaca Cristomi caran

8Ricuichi pipash, runacunalla yachachishcahuan, yanga rimashcacunahuan cangunata pandachinman. Paicunaca, Cristomandaca na yachachishpami, ñaupa taitacuna imatalla rurashpa causashcacunata, cai pachapi imata ruranatalla catishpa yachachinajun.

9Taita Dios, imashna cajtaca Cristomi tucuitapacha ricuchijun.

10Cangunapash, Cristohuan shujlla tucushcamandami, shinallata cana canguichi. Cristomi, mandajcunatapash, ushaita charijcunatapash, tucuita umashna mandajun.

11Cristohuan shujlla tucushca cashpami cangunaca, maquihuan circuncisionda rurashcacunaca na canguichi. Ashtahuangarin, Cristomi circuncisionda rurashpa cangunapaj aicha munaicunataca anchuchirca.

12Bautizarishpaca, Cristohuanmi pambai tucurcanguichi. Huañushcacunapaj chaupimandaca, Taita Diosmi ninan ushaihuan Cristotaca causachirca. Chaita crishcamandami cangunapash Cristohuan causarishcanguichi.

13Cangunaca, aichapi circuncisionda na rurashca cashpa juchapi huañushcashna causanajujpimi. Ashtahuangarin, Diosmi cangunapaj juchacunata perdonashpa, Cristota crishcamanda mushuj causaita cararca.

14Chaimandami, mandashca shimicunapi ñucanchita juchachijushcataca yangapi churashca. Chaitaca, Cristota cruzpi chacatajpimi, Diosca tucuilla anchuchishca.

15Cristoca, cruzpi chacatai tucushpami, jahua huairapi mandajcunatapash, ushaita charijcunatapash, yangapi churashpa, tucuicunapaj ñaupajpi mishashpa pingaichirca.

16Shina cashcamanda, cangunataca, imata micunatapash, imata ufianatapash, cushijui punllacunapi, llullu luna punllacunapi, samana punllacunapipash, “cashnami, chashnami rurana” nishpaca, ama pipash mandachun ninimi.

17Chai tucui ruranacunaca, jipaman ali causai shamunatami, ashata pacashcashnalla ricuchijushca. Ashtahuangarin, Cristomi tucuita pactachingapa shamurca.

18Cangunaca na pandarinachu canguichi. Chai gentecunaca: “Ñucanchimi ali shunguhuan catinchi, angelcunahuan parlanchi, ñucanchimi muscuipishna ricurcanchi” ninajungami. Paicunaca, aicha munai yarichijpillami, ninanda jariyashpa chashna purinajun. Chaicunataca napacha catinachu canguichi.

19Paicunaca, umashna mandajuj Cristotaca na catinajunllu. Cristo shinlliyachijpimi, cuerpopica, mucucuna, angucuna huatarishcashna cashpa, Taita Dios viñachijpi, Pai munashcashna miranajun.

20Cai pachapajtalla rurashpa catinamandaca, ñami Cristohuan huañushcashna canguichi. Shina cashpaca, ¿imashpata cai pachapajtalla rurashpa cazujcunashna cangunapash chashna catinguichi?

21Cashna nishpami mandanajun: “Ama caitaca japinguichu, ama chaitaca micunguichu, ama chaitaca tacaringuichu” nijunmi.

22Chai mandashcacunaca, runacunalla yachachishca cashpami, yangata tucuringalla. ¿Chaitaca, nachu yachanguichi?

23Chaicunata yachajunaca: Diosta ashata yaringapa, na jariyashpa causangapa, cuerpota llaquichingapa, alishnallami ricurin. Chashna cashpapash chaicunaca, aicha munaicunataca na jarcai ushanllu.