ÉXODO 10 - Quichua Imbabura 2016

Langosta jurucunahuan llaquichishcamanda

1Mandaj Diosca, Moisestaca cashnami nirca:

“Faraonbaj ñaupajman ringui. Ñucami, paipaj shungutapash, paipaj cati mandajcunapaj shungutapash shinlliyachircani. Pipash na rurai ushanallacunata ashtahuan rurashpa ricuchingapami, chashna rurarcani.

2Cangunapaj huahuacunaman, cangunapaj churicunapaj huahuacunamambash, Egiptopi Ñuca imatalla rurashcacunata villanajuchunmi chashna rurarcani. Mandaj Dios cajta yachachunmi chashna rurarcani” nircami.

3Shina nijpimi Moisespash, Aaronbash, Faraonbajman shamushpa cashna ninajurca:

“Hebreocunata Mandaj Taita Diosca cashnami nijun: ‘¿Ima punllacamanda Ñucataca na manllashpa, na cazugringui? Ñuca agllashcacunataca, Ñucata alicachingapa richun saquilla.

4Paicunata na cacharijpica caya punllallatami, cai llactamanga langosta jurucunata cachamusha.

5Chai langosta jurucunami, tucuilla llactapica alpapash na ricuringacaman quilpanga. Chaicunami rundu na tucuchijpi puchushcacunatapash micunga. Shinallata, pambapi ali fucuj yuracunatapashmi micushpa tucuchinga.

6Cambaj huasicunapipash, cambaj cati mandajcunapaj huasicunapipash, Egipto llactapi causajcunapaj huasicunapipashmi jundanga. Chashnataca cangunapaj taitacunapash, cangunapaj taitacunapaj punda taitacunapash, paicuna cai llactapi tiyai callarishcamandapacha cunangaman napacha tiyashcachu carca’ ninmi” ninajurcami.

Chai jipami Faraonbaj ñaupajmandaca llujshishpa tigranajurca.

7Shinamandami Faraonbaj cati mandajcunaca, Faraondaca cashna ninajurca:

“¿Ima punllacamanshi cai runaca, ñucanchita llaquichishpa purijunga? Cai runacunataca, paicunata Mandaj Taita Diosta alicachingapa richun saquilla. Egipto llacta ña tucurishcataca, ¿nachu ricunguiyari?” ninajurcami.

8Shinamandami Moisestapash, Aarondapash, cutin cayajpi, paicuna shamujpica, Faraonga cashna nirca:

“Cangunata Mandaj Taita Diosta alicachingapa richilla. ¿Picunallata rina canguichiyari?” nirca.

9Shina nijpimi Moisesca cashna nirca:

“Ñucanchica, huahuacunatapash, rucu taitacunatapash, ñucanchi churicunatapash, ushicunatapash, ñucanchi llamacunatapash, huagracunatapash apashpami rina canchi. Mandaj Diosta yarishpa ninan cushijuita charingapaca chashnami rina canchi” nircami.

10Shina nijpimi Faraonga cashna nirca:

“¡Cangunata Mandaj Dios, cangunata ricujujtaca yachanimi! Shina cajpipash ¿imashpata cangunapaj huahuacunandi richun saquishayari? ¡Ricuichi, canguna na alita yarinajujtaca yachanimi!

11Chaica napacha pactangachu. Cunanga Mandaj Diosta alicachinapacha cashpaca, jaricunalla richilla. Chaitami cangunaca munarcanguichi” nircami.

Chai jipami, Faraonbaj ñaupajmanda llujchishpa cachanajurca.

12Shinamandami Mandaj Diosca, Moisestaca cashna nirca: “Egipto llactaman langostacunata cachamungapa, cai Egipto llactaman ricuchishpa cambaj maquita chutai. Chai langostacuna shamushpami, rundu na tucuchijpi puchushcacunataca, cai llactapica tucuillata tucuchinga” nircami.

13Shina nijpimi Moisesca, paipaj vara caspitaca, Egipto llactaman ricuchishpa chutarca. Shina rurajpimi Mandaj Diosca, tucui chai punllapash, tucui chai tutapash, indi llujshimujmanda huairata chai llactaman cachamurca. Chai cayandi pacaripaca, indi llujshimujmanda huairami langostacunata apamurca.

14Langostacunaca, tucuilla Egipto llactamanmi vichai shamurca. Shina shamushpami tucuilla Egipto llactapica, pundacunapash na tiyashcata, jipamambash na tiyanata ninanda jundamurca.

15Chai tucuilla llactata quilpajpi, ninanda amsayashpami, alpapash na ricurijurca. Shinallata alpapi jihuacunata, quirucunapi fucushcacunata, rundu na tucuchijpi puchushca tucui granocunatapashmi tucuchirca. Shinamandami Egipto llactapica, tucuilla quirucunapash, pamba jihuacunapash chaquirca.

16Chaimandami Faraonga, Moisestapash, Aarondapash ucha cayachun cachashpa cashna nijurca:

“Cangunata Mandaj Taita Diostapash, cangunatapash fiñashpami juchata rurapashcani.

17Ashtahuangarin cunanga, juchata ñuca rurashcataca cutinllata cungapaichi nipanimi. Shinallata, cai huañuchina llaquitapash, ñucamanda anchuchihuachun, cangunata Mandaj Taita Diosta mañapaichi” nijurcami.

18Shina nijpimi Moisesca, Faraonbaj ñaupajmanda llujshishpa, Mandaj Diosta mañarca.

19Shina mañajpimi Mandaj Diosca, indi huashajunmanda ninan shinlli huairata cachamurca. Chai huaira shamushpami, langostacunataca Puca Cuchaman shitarca. Tucui Egipto llactapica, shuj langostallapash na puchurcachu.

20Ashtahuangarin Mandaj Diosllata, Faraonbaj shunguta shinlliyachijpimi, Israelcuna richunga na saquirca.

Yana yana tutahuan llaquichishcamanda

21Mandaj Diosca, Moisestaca cashnami nirca:

“Egipto llactapi yana yana tuta tucuchun, cambaj maquita jahua pachaman vichai churangui. Chai yana yana tutaca, maijan cashpapash tacarinashnami canga” nircami.

22Shina nijpimi Moisesca, jahua pachaman maquita vichai churarca. Shina rurajpimi tucuilla Egipto llactapica, quimsa punllacaman yana yana tuta tucurca.

23Shina tucujpimi, paipurallatapash na ricui usharca. Quimsa punllacamanmi, paicunapaj huasimandaca pipash na llujshi usharca. Ashtahuangarin tucuilla Israelcunapaj huasicunapica, punchallami carca.

24Chaimandami Faraonga, Moisesta cayachun cachashpa cashna nirca:

“Mandaj Diosta alicachingapa richilla. Cangunapaj llamacuna, huagracunallami saquiringa. Cangunapaj huahuacunatapash pushashpa richilla” nircami.

25Shina nijpimi Moisesca cashna nirca:

“Cambashmari, animalcunata huañuchishpa, Mandaj Taita Diosman cushpa, tucuillata rupachinajuchun carashpa cachana cangui.

26Ñucanchi animalcunataca apashpami rishun. Ñucanchi animalcunamandaca, shuj sillullapash na saquiringachu. Chai animalcunamandami, ñucanchita Mandaj Taita Diosta alicachingapaca japina canchi. Mandaj Diosta imashna alicachinataca, chaiman chayashpami yacharinga” nircami.

27Ashtahuangarin Mandaj Diosllata, Faraonbaj shunguta shinlliyachijpimi, paicuna richunga na saquirca.

28Faraonga cashnami nirca:

“Caimanda anchurishpa ri. Ñuca ñavipica amapacha ashtahuan ricurihuaichu. Ima punllapash cutin tigramujpica huañuchishapachami” nircami.

29Shina nijpimi Moisesca cashna nirca:

“Alitami nihuangui, cutinga na cambaj ñavipi ricurimushachu” nircami.