EZEQUIEL 4 - Quichua Imbabura 2016

Jerusalén pueblota chaupimi churanamanda

1Huañuna aichayuj runa, alpahuan rurashca adobeta japishpa, Jerusalén pueblo imashna cajta shuyungui.

2Chaipica, chai pueblota muyundi chaupipi churashpa shayanajujta rurangui. Shinallata, paicunahuan macanajungapa shinlli torretapash, chacanatashnapash rurangui. Chaipica, carpacunatapash, arietecunatapash, muyundi rurangui.

3Shinallata, shuj jirru tablata japishpa, chai pueblohuan, canhuan shicanyachijuchun, muyundi pircata churangui. Chai jirruca, muyundi jarcashca pircashnami canga. Chai jipaca llaquichingapa muyundi shayanajujta rurangui. Chaicunaca, Israel gentecuna ima tucunata ricuchingapami canga.

4Canga, Israelcuna na alita rurashpa causana cashcata ricuchingapa, lluquiman siriringui. Lluquiman mashna punllata puñushpapash, chashna punllatallatami Israelcunaca juchata ruranajunga.

5Paicuna juchata rurashca huatacunataca, quimsa patsaj iscun chunga punllacunatallami, canmanga ricuchircani. Chashnami canga, Israelcuna juchata rurashcataca ricuchina cangui.

6Ña chai punllacunata pactachishca jipaca, ali maquimanmi siririna cangui. Shina rurashpami, Judá llactapi causajcunapaj juchataca, chuscu chunga punllacaman ricuchingui. Shuj huatamandaca, shuj punllatami yupana cangui.

7Jerusalenda muyundi chaupipi churashpa shayajujta ali ricushpami, cambaj rigratapash pascashpa, ñuca ima nishcata villana cangui.

8Candaca Ñucallata huatashpa saquishca cajpimi, caiman, chaiman tigraritaca na ushangui. Can llaquichi tucuna punllacuna pactangacamanmi, chashna sirijungui.

9Shinallata, trigota, cebadata, jabasta, lentejata, saracunata, avenata tandachishpa, shuj fundupi churangui. Chaicunataca, can chashna sirijushca punllacunapimi, quimsa patsaj iscun chunga punllacaman, tandata rurashpa punllandi micuna cangui.

10Chai micunataca, micuna punllapillami, ishcai patsaj ishcai chunga pusaj gramotashna, punllandi micuna cangui.

11Yacutapash, chaupi litrotashnami punllandi ufiana cangui.

12Shinallata, gente ishpa chaquishcata rupachishpami, cebada tandata tucuicuna ricujta cusashpa micuna cangui” nihuarcami.

13Mandaj Diosca, cashnatapashmi nihuarca: “Israelcunata maijan llactacunaman Ñuca llujchishpa cachajpica, paicunaca cashna mapa micunatallami micunajunga” nihuarcami.

14Shina nijpimi ñucaca, cashna nircani: “¡Mandaj Jatun Dioslla! Ñuca shunguca na mapachu capani. Ñucaca, chaira viñaimandapacha, cunan punllacaman, paimandallata huañushca aichata, sacha animal huañuchishca aichataca napacha micushcanichu. Shinallata, ima shuj mapa aichatapash napacha malishcanichu” nircanimi.

15Shina nijpica, cashna nishpami tigrachihuarca: “Chai tandataca, gentepaj ishpa chaquishcahuan cusangapa randica, huagra huanu chaquishcahuan cusachunmi saquini” nihuarcami.

16Chai jipaca, cashnami nihuarca: “Huañuna aichayuj runa, Jerusalenbica micuna illajpimi, asha ashagulla manllaihuan micunajunga. Yacutapash, asha ashagullami, manllaihuan ufianajunga.

17Micunapash, yacupash tucurijpica manllarishpami, caishuj chaishuj ñavitalla ricurinajunga. Paicunallata na alita rurashcamanda llaquita apanajuchunmi, chashna rurasha” nircami.