NEHEMÍAS 5 - Quichua Imbabura 2016

Huajchacunata yanapashcamanda

1Chai punllacunapimi, Judá llactapi causaj paicunapaj huauquicunata ninanda fiñashpa, huarmicunandi caparinajurca.

2Huaquinguna caparishpaca: “Ñucanchica, churicunandi, ushicunandica, ashtacamari canchi. Chaimandami, micuna tiyachun granocunata mañarcanchi” ninajurcami.

3Cutin shujcunaca: “Ñucanchica, micunata randingapami, ñucanchi alpacunata, uva chagracunata, huasicunata culquita mañashpa curcanchi” ninajurcami.

4Ashtahuan shujcuna: “Ñucanchi alpacunamanda, uva chagracunamanda, jatun mandajman cuna cashcata cungapami culquita mañarcanchi.

5Shinallata, ñucanchica, ayllupura cashpapash, ñucanchi huahuacunapash, shujlla taitapaj huahuacunashna cajpipash, ñucanchi churicunata, ushicunatami gañan causachun jatushcanchi. Alpacunapash, uva chagracunapash, shujcunapaj maquipi cajpimi, ñucanchi huahuacunataca cutin randishpa cacharichitaca na ushanchi” ninajurcami.

6Paicuna chashna caparinajujta uyashpami, ninanda fiñarircani.

7Chaimandami, alicachi tucushca gentecunatapash, mandajcunatapash, aligutapacha yarishpa, shinllitapacha rimashpa cashna nircani: “¿Imamandata cangunapaj huauquicuna mañashcamandapash, mirachishpa cuchun nircanguichi?” nircanimi. Chai jipami imata ruranatapash ricungapa tucuilla Israelcunata tandachircani.

8Chaipica cashnami nircani: “Ñucanchica, ñucanchi usharishcaguta rurashpami, Judá llactapi causaj cangunapaj huauquicunata, shuj llactapi causajcunaman jatushcamanda, randishpa llujchimurcanchi. Shina cajpipash cangunaca ¿cutinllu ñucanchi randichun munanguichi?” nircanimi. Shina nijpimi paicunaca, upalla saquirirca.

9Cashnatapashmi nircani: “Cangunaca, na alitami rurashpa causanguichi. Shuj llactacunapi causajcuna na alicachishpa ricuchunmi, Taita Diostaca na manllashpa causanguichi.

10Ñucapash, ñuca huauquicunapash, ñucapajta rurajcunapash tucuicunami, culquita, trigota, mañachircanchi. Chashna mañashpa llaquichinataca saquinami canchi.

11Shinallata cunanga, paicunapaj alpacunata, uva chagracunata, olivo tarpushca pambacunata, huasicunataca tigrachipaichi nipanimi. Granomanda, vinomanda, aceitemanda cashpa, patsajmanda shujguta mirashca culquita canguna japinajushca cashpapash, tigrachinami canguichi” nircanimi.

12Shina nijpimi paicunaca, cashna ninajurca: “Can nishcashna, ñucanchica imatapash na nishpa, tucuilla tigrachishunllami” ninajurcami. Shina nijpimi, sacerdotecunata cayashpa paicunapaj ñaupajpi chashnatapacha rurachun juramentuchircani.

13Shinallata ñuca churajushcata chafsirishpami, cashna nircani: “Caita na pactachijcunataca paipaj huasimandapash, pai imata charishcamandapash, Taita Diosca cai churajunata chafsinshna, imapash illajta saquichun” nijpimi, tandanajushca gentecunaca: “¡Chashna cachun!” nishpa, Mandaj Diostaca alicachinajurca. Chaimandami gentecunaca paicuna ari nishcata pactachinajurca.

14Judá llactata jatun mandaj Artajerjes runa, ishcai chunga huatata mandajushpa, ñucata mandachun churajpica, quimsa chunga ishcai huatata pai mandangacamanmi ñucaca mandajurcani. Chai huatacunapica ñucapash, ñuca llacta huauquicunapash, mandajcuna imamanda japina cashcataca, chunga ishcai huatatami imatapash na japircanchi.

15Ashtahuangarin ñucapaj punda mandajcunaca, micunamandapash, vinomandapash, chaupi kilo yali culquitami mañashpa, Israelcunataca llaquichishpa causanajurca. Shinallata rurashpami paicunapajta rurarajcunapash, llaquichinajurca. Ñucallami, Taita Diosta manllashpa na chashna rurarcani.

16Shinallata, ñucapajta rurajcunandimi, ñuca rurana cashcataca rurashpa pactachircanchi. Shinallata, pipaj alpacunatapash na randishcachu canchi.

17Ashtahuangarin, patsaj picha chunga judio gentecunapash, ñucapajta rurajcunapash, ñucanchi muyundi llactacunata mandaj runacuna shamushpapash, ñucahuanmi micunajurca.

18Punllandimi shuj ali huagrata, sucta ali llamacunata huañuchishpa micunajuj carcanchi. Ñucamambash, atalpacunatami huañuchishpa yanun carca. Vinotapash, chunga punlla chayashcapimi, ninanda ufianajun carcanchi. Shina cashpapash, gañan tucushpa llaquipi causanajujpimi, mandajcuna imata japina cashcataca na mañarcani.

19“Ñuca Dioslla, cai llactapi causajcunaman alita rurashcamandaca, ñucamambash alita rurahuangui” nircami.