JEREMÍAS 3 - Quichua Imbabura 2016

1Paicunaca cashnami ninajun: “Maijambash paipaj huarmita jichujpica, chai huarmica, shicanyarishpa shuj jarihuanmi causanga.

Shina cajpica, ¿punda cusaca chai huarmihuan cutin ali tucungallachu?

Chashna rurashpaca ¿nachu chai llactatami huaglichinga nijun?

Cangunacarin, ashtaca jaricunahuanmi huainayashpa causashcanguichi.

Chashna causashpatachu ¿Ñucapajman tigramungapa munangui? ninmi Mandaj Dios.

2Jahua lomata vichai ricuyari. ¿Maipita na huainayarcangui?

Cambaj juyashcacunahuan tuparingapami, jichushca pambapi, árabe runashna, ñangunapi chapashpa tiyajurcangui.

Chashna na alita rurashpami, tucui llactacunapi causajcunata mapayachircangui.

3Chashna rurashcamandami, punda tamiapash, jipa tamiapash chingarca.

Canga, culquimanda huainayaj huarmishnami, napacha pingai tucungapa munarcangui.

4Shina cashpapash Ñucataca: ‘Ñuca Taitalla, chairalla viñajujpica, canmi Ñucata pushashpa purircangui’ nihuanguimi

5Ashtahuangarin: ‘Diosca, ¿causaita causaicaman fiñajungallachu? Ali tucungallami’ yashpami, na alitalla rurashpa causajungui” ninmi.

Mandaj Diosca, Israelcunata, Judá llactapi causajcunatapash, Paipajman tigrarichunmi yarichishca

6Mandaj Diosca, jatun mandaj Josías mandajui punllacunapimi, cashna nihuarca: “¿Chai na cazuj Israel gentecuna imatalla rurajtaca ricunguichu? Paica, tucui loma jahuacunapi, fanga junda quiru ucucunapimi huainayanshna na alita ruranajun.

7Chashna cashpapash: ‘Chai tucuita rurashca jipaca, Ñucapajman cutin tigramungami’ yarcanimi. Ashtahuangarin napacha Ñucapajman tigramurcachu. Chaitaca, na cazuj Judá llacta gentecunapash ricurcami.

8Chai na cazuj Israelcuna chashna na alita rurashcamanda, Ñuca jichushpa saquingapa cartata quilcashpa cushcatapash, paica ricurcami. Chaita ricushpapash, Judá llacta gentecunaca na manllarcachu. Ashtahuangarin paipashmi, chashna na alicunata rurajurca.

9Chaimandami paica, shuj dioscunahuan chashna na alita rurashpapash, imapash na canllu yajurca. Rumi dioscunata, caspi dioscunata mañajushpami cai tucui llactata mapayachirca.

10Tucui chashna na alita rurashpapash, Judá llactapi causaj gentecunaca, na tucui shunguhuan Ñucapajman tigrarircachu. Ashtahuangarin yangatallami tigrarij tucurca” nihuarcami Mandaj Diosca.

11Mandaj Diosca, cashnatapashmi nihuarca: “Chai na cazuj Judá llactahuan chimbapurashpa ricujpica, na cazuj chai Israel llactaca, ima na alitapash na rurashcami ricurirca.

12Shina cashcamanda, janajman ricushpa, cai shimicunata villagri:

‘Mandaj Diosca, cashnami nin:

Na cazuj Israelcuna, Ñucapajman tigrarimuichi.

Ñucaca, na ashtahuan fiñarishpa llaquichishachu.

Ñucaca, llaquijmari cani, na causaita causaicaman fiñashachu’ ninmi Mandaj Diosca.

13Mandaj Diosca cashnatapashmi nin:

‘Canda Mandaj Dios Ñucatami, yachashca jahua na cazurcangui.

Chashna na alita rurashcata yarishpa llaquirina cangui.

Fanga junda quiru ucucunapimi, na rijsishcacunahuan huainayanshna na alita rurarcangui.

Ñuca cayajujpica, napacha uyahuarcanguichu ninmi’ nihuarcami.

14Mandaj Diosca, cashnatapashmi nin: ‘Na cazuj huahuacuna, Ñucapajman tigrarimuichiyari. Ñucami, cangunapaj cusa cani. Ñucaca, cangunataca tucui pueblomanda shujllata, tucui huasi ucupuramanda ishcaita japishpami, Sión pueblopi causanajuchun churasha.

15Chaipi cangunata michinajuchunga, Ñuca agllashca michijcunatami churasha. Paicunami ali yuyaihuan, ali yachachishpa michinajunga’ ninmi.

16Mandaj Diosca, cashnatapashmi nin: Canguna mirashpa, cai llactapi ashtaca jundanajui punllacunapica, cashnami tucunga: Chaipica: ‘Mandaj Diospaj arcami’ nishpaca na parlanajungachu. Chai arcataca, na yarishpa, na llaquishpami, shujtacarin na ruranga.

17Ashtahuangarin chai punllacunapica, Jerusalendaca: ‘Mandaj Dios mandashpa tiyarina pueblomi’ ninajungami. Tucui llactacunamanda Jerusalenman shamushpami, Mandaj Dios Ñucata, Ñuca shutipi mañanajunga. Paicunaca, na ashtahuan paicunapaj shinlli shungu munashcata ruranajungachu.

18Chai huatacunapica, Judá ayllupash, Israel ayllucunahuanmi tandanajunga. Shina tandanajushpami, janaj llactamandaca, cangunapaj ñaupa taitacunaman, Ñuca carashca llactaman tandanajushpa shamunajunga.

19Ñucaca cashnami yajurcani: ‘¿Imashnata cangunamanga, Ñuca huahuacunapacha tucujpi,

tucui llactacunata yali juyailla llactata carashayari?’ yajurcanimi.

Chashna rurajpica: ‘Ñucataca: Ñucanchi Taitalla nishpa ñucamandaca, na anchuringachu’ yajurcanimi.

20Ashtahuangarin cusata na juyashpa jichuj huarmishnami,

can Israelcunaca Ñucataca yachashca jahua na cazushpa jichuhuarcanguichi.

Mandaj Dios Ñucami, chashna nini.

21Lomacunapica, Israelcuna huacashpa caparinajujmi uyarirca.

Ali causanata saquishpami, paicunapaj Mandaj Dios Ñucata cunganajushca.

22Na cazuj huahuacuna, Ñucapajman tigrarimujpica, canguna na alita rurashcataca cungashallami” ninmi.

Shina nijpimi, cashna ninajurca: “Canga ñucanchita Mandaj Taita Diosmi cangui.

Chaimandami cunanga, cambajman tigramupanchi.

23Lomacunapi, urcucunapi ninanda caparishpa mañagrinaca yangapachami cashca.

Ñucanchi Israelcunataca, ñucanchita Mandaj Diosllami quishpichi ushan.

24Ñucanchi taitacuna imata rurashpa charishcatapash,

chairalla viñaicuna cashcamandapacha pandashpa causashpami, tucuillata tucuchishcanchi.

Paicunapaj llamacuna, huagracuna, churicuna, ushicunapashmi tucurishca.

25Ñucanchica pandarishpami, urmashcanchi.

Ñucanchi juchata rurashcallatami, quilpashcashna charijun.

Mandaj Taita Diostaca, na cazushpami juchata rurashcanchi.

Ñucanchipash, ñucanchi taitacunapash, chairalla viñaimandapachami, cai punllacaman fiñachishcanchi.

Shinallata ñucanchita Mandaj Dios rimashcatapash, na uyashpami causashcanchi” ninajurcami.