1Davidca, paita catij macanajuj runacunata tandachishpami, huarangacunata mandachun, patsajcunata mandachun churarca.
2Chai jipami Davidca, macanajuj runacunataca quimsapi chaupirca. Shuj chaupitaca, Joab runa mandachun, shuj chaupitaca, Sarvia shuti huarmipaj churi Joab runapaj huauqui Abisai shuti runa mandachun, shuj chaupitaca, geteopura Itai shuti runa mandachunmi cacharca. Shinallata jatun mandajca, tucuicunamanmi:
“Ñucapash cangunahuanmi, macanajuiman llujshigrini” nirca.
3Ashtahuangarin gentecunaca, cashnami ninajurca:
“Na llujshinachu cangui. Ñucanchi pacajushpa calpajpica na catingachu. Shinallata, shuj chaupi huañujpipash, imapash na cangachu. Ashtahuangarin, canga ñucanchihuan ricujpica, chunga huaranga runacunashnami cangui. Shinamanda canga, cai pueblomandallata imashnallapash yanapashpami ali canguiman” ninajurca.
4Shina nijpimi, jatun mandajca:
“Cangunapaj ima ali cashcata rurashallami” nirca.
Chai jipami jatun mandajca, puebloman yaicuna pungu yaicunapi shayarishpa saquirirca. Chaitami patsajpi, huarangapi shicanyachishpa churashca tucuilla macanajuj runacunaca llujshinajurca.
5Chaipimi jatun mandajca, Joab, Abisai, Itai shuti runacunataca, cashna nishpa mandarca: “Ñucata juyashpaca, Absalón huambragutaca ali ricushpa na llaquichinachu canguichi” nirca. Macanajuj runacunata mandajcunaman, Absalondaca na llaquichinachu canguichi nijujtaca, tucui gentecunami uyarca.
6Chashnami paicunaca, Israelcunahuan macanajungapa llujshishpaca, quirucuna shayanajuj Efraín shuti pambapi macanajui callarirca.
7Chaipimi Israelcunaca, Davidta catij runacuna mishajpi, chai punllapica ninandapacha huañuchijpi, ishcai chunga huaranga runacuna huañurca.
8Chai macanajuipica, tucuilla chai llactapimi caipi chaipi macanajunajurca. Chai punllapica, espadahuan huañuchishcatapash ashtahuan yalimi, quirucuna shayanajuj pambapi llaqui apashpa ashtahuan huañunajurca.
9Absalonga, mulapi tiyarishca rijushpami, Davidta catijcunahuan tuparirca. Chaimandami chai mulaca, malqui junda encina shuti quiru ucuman yaicurca. Chaipimi Absalonga, shuj quiru parcapi cunga churajurijpi huarcuriyaj saquirirca. Pai rijushca mulaca, saquishpa calparcallami.
10Chaita shuj runa ricushpami, cashna nishpa Joabman villarca:
“Absalondaca, encina quirupi huarcuriyajujtami ricurcani” nirca.
11Shina villajpimi Joab runaca, chai villaj runataca cashna nirca:
“Chashna cajta can ricushpaca, ¿imashpata na chaipillata huañuchishpa alpaman shitarcanguiyari? Can chashna rurashca cajpica, cushijuihuanmi patsaj chunga chuscu gramota pezaj culquita, cara chumbitapash canman cuiman carcani” nirca.
12Shina nijpimi chai runaca, Joab runataca cashna nirca:
“Chunga shuj kilo chuscu patsaj gramota pezaj culquita ñucaman cujpipash, jatun mandajpaj churitaca na huañuchimanllu. Candapash, Abisai shuti, Itai shuti runacunatapash, jatun mandajca cashna mandajtami uyarcanchi: ‘Absalón huambragutaca, maijambash tacaritallapash ama tacarichun ricuriapanguichi’ nijtami uyarcanchi.
13Ñucallata huañungapami, chashnaca ruraiman carcani. Jatun mandajpaj ñaupajpica, imatapash na pacai ushanichu. Canllatapashmi, ñucataca llaquichinguiman carca” nirca.
14Shina nijpimi, Joab runaca:
“Candaca, na ashtahuan uyangapa munanichu” nirca.
Shina nishpami quimsa flechata japishpa, Absalonbaj shungupi cacharigrirca.
Absalonga, encina shuti quiru chaupipi huarcuriyajushpapash, nara huañushcachu carca.
15Chaipimi, Joab runapajta ruraj chungapura huambracunaca, Absalonbaj muyundipi shayarishpa huañuchinajurca.
16Shina huañuchijpimi Joab runaca, trompetata huacachirca. Chaita uyashpami, Israelcunata catinajushcatapash saquishpa tigrarca. Joab runallatami gentecunataca jarcarca.
17Chai jipaca, Absalonda japishpami, quirucuna shayanajuj pambapi tiyaj, shuj jatun utujuman shitarca. Paipaj jahuapica, rumicunata mundunashpami saquinajurca. Chai jipami Israelcunaca, tucuicuna paicunapaj huasicunaman pacajungapa calpanajurca.
18Absalón causajushpallatami, jatun mandajpaj pambapi shuj torretashnalla rumicunahuan rurachishca carca. Paica: “Ñuca shutita yarinajuchunga, churitallapash na charinichu” nishpami, shina rurachishca carca. Chai torretashnalla rurashcataca, paipaj shutitami churarca. Chaitami cunangaman, “Absalonbaj torre” ninajun.
19Chai jipami, Sadoc shuti sacerdotepaj churi Ahimaas shuti runaca, cashna nirca:
“Cunanga: ‘Mandaj Diosca, ñamari canda llaquichingapa munajcunataca tucuchishca’ nishpa, ¿nachu jatun mandajman villangapa calpasha?” nirca.
20Shina nijpimi Joab runaca, cashna nirca:
“Cunanga na villagrinachu cangui. Shuj punlla villagringuillami. Jatun mandajpaj churimi huañushca. Chaitaca, cunanga na villagrinachu cangui” nirca.
21Shina nishpapash Joab runaca, Etiopía llactamanda shuj runatami cashna nirca:
“Imata cashpapash can ricushcata, jatun mandajman villangapa rilla” nijpimi, Etiopía llactamanda runaca, Joab runata cazushcata ricuchingapa, paipaj ñaupajpi urai cumurirca. Chai jipaca, villangapa calparcallami.
22Shinallata Sadoc shuti runapaj churi Ahimaas shuti runaca, cutinmi Joab runataca cashna nirca:
“Ima cachumbash, Etiopía llactamanda runata catishpa, cunanda calpagrinillami” nirca.
Shina nijpimi Joab runaca, cashna nirca:
“Ñuca huahualla, ¿imapata calpashpa risha ninguiyari? Can villashcamandaca, imatapash na japinguichu” nirca.
23Shina nijpimi, Ahimaas runaca:
“Ima cachumbash, ñucapash calpashpa rigrinillami” nijpimi, Joab runaca:
“Shina cashpaca, calpashpa rilla” nirca.
Shina nijpimi Ahimaas runaca, pugru pambata calpashpa rishpa, chai Etiopía llactamanda runataca yalishpa rirca.
24Davidca, puebloman yaicuna ishcai pungu chaupipimi tiyajurca. Shinallata chapaj runapash, pungu vichai jatun patapi tiyajuj torremanmi rishca carca. Chaimanda ricushpami, shuj runa calpashpa shamujujta ricurca.
25Chaita ricushpami, chapashpa shayajuj runaca, jatun mandajman caparishpa villarca. Shina villajpimi, jatun mandajca:
“Shujlla shamujushpaca, ali villanahuanmi shamujunga” nirca.
Calpashpa shamujuj runaca, ashtahuan quimirimujpimi,
26torrepi chapajuj runaca, cutin shuj runapash calpashpa shamujujta ricurca. Chaita ricushpami, torrepi chapajuj runaca cashna nirca:
“Shuj runapashmi, calpamujun” nishpa, pungupi ricushpa shayajuj runaman caparishpa villarca.
Shina villajpimi, jatun mandajca:
“Chai runapash villangapami shamujunga” nirca.
27Chai torremanda chapaj runaca, cutinmi cashna nirca:
“Pundapi calpashpa shamujuj runaca, Sadoc shuti runapaj churi Ahimaas shuti runami calpamujun yarin” nirca.
Shina nijpimi jatun mandajca, cashna nirca:
“Chai runaca alitallami villan, paica ali villanahuanmi shamujunga” nirca.
28Ahimaas runa chayamushpaca, caparishpami jatun mandajtaca:
“Ali causaiguta charipangui” nirca.
Chai jipami, jatun mandajpaj ñaupajpi cungurishpa, alpaman chayajta cumurishpa cashna nirca:
“Can jatun mandajta Mandaj Diosca, alicachi tucushca cachun. Paimi, ñucata jatun mandajta llaquichingapa jatarijcunataca, ñucanchi maquipi churashca” nirca.
29Shina nijpimi, jatun mandajca:
“¿Absalón huambraguca, alillachu capan?” nirca.
Shina nijpimi Ahimaas shuti runaca, cashna nirca:
“Cambajta ruraj Joab runa ñucata cachamujujpica, ninanda caparinajujtami uyarcani. Ashtahuangarin chaipi ima tucushcatapash na yachanichu” nircami.
30Shina nijpimi, jatun mandajca:
“Canga, caiman yalimushpa chaipi shayari” nijpi Ahimaas runaca, chaiman yalishpa shayarirca.
31Chai jipallami, Etiopía llactamanda runa chayamushpaca, cashna nirca:
“Jatun mandajlla, cai ali villaita chasquipai. Canda llaquichingapa munaj gentecunapaj maquimandaca, cunanmari Mandaj Diosca quishpichishca” nirca.
32Shina nijpimi jatun mandaj Davidca, Etiopía llactamanda runataca:
“¿Absalón huambraguca, alillachu capan?” nirca.
Shina nijpimi chai runaca, cashna nirca:
“Can jatun mandajta fiñajcunaca, chai huambrashna tucushpachari ali canman. Shinallata canda fiñashpa llaquichingapa tucui jatarijcunapash, chashnallata tucushpami ali canman” nirca.
33Shina nijta uyashpami, jatun mandaj Davidca ninanda manllarirca. Chaimandami, puebloman yaicuna pungu jahuapi tiyajuj jatun ucuman vichai rishpa huacajurca. Paica, chai ucuman rijushpami, cashna nishpa huacajurca: “¡Ñuca huahua Absalonlla, ñuca huahua, ñuca huahua Absalonlla! ¡Cambaj randica, ñuca huañushpachari ali caiman carcani! ¡Absalón, ñuca huahualla, ñuca huahualla!” nijurca.
Who We AreWhat We EelieveWhat We Do
2025 by iamachristian.org,Inc All rights reserved.
