HECHOS 15 - Quichua Imbabura 2016

Jerusalenbimi mandajpuralla tandanajushca

1Chai jipami Judea llactamanda huaquin crijcunaca, Antioquía puebloman shamushpa cashna yachachinajurca: “Circuncisionda rurachun Moisés mandashcata na pactachishpaca, na quishpiri ushanachu canguichi” ninajurcami.

2Chaimandami Pablopash, Bernabepash, paicunahuan ninanda fiñanajushpa rimarinajurca. Shina cajpimi, Pablotapash, Bernabetapash, huaquin crijcunatapash, Jerusalenman cachanajurca. Apostolcunahuan, ancianocunahuan parlarishpa chai llaquita alichinajuchunmi chashna cachanajurca.

3Tandanajuj crijcuna paicunata cachajpica, Fenicia, Samaria llactacunatami yalinajurca. Paicunaca: “Na Israelcunapash Diospajman tigrarishcami” nishpa villajpimi, tucui crijcuna ninanda cushijunajurca.

4Paicuna Jerusalenman chayajpica, tandanajuj crijcunapash, apostolcunapash, ancianocunapashmi, chasquinajurca. Taita Dios ushaita carajpi tucui imata rurashcatapashmi, paicunaman villanajurca.

5Chai jipami, fariseocunamanda huaquin crijcuna shayarishpa, cashna ninajurca:

“Chai crijcunataca: ‘Circuncisionda ruranapachami, Moisés mandashca shimitapash pactachinapachami’ nishpami yachachina” ninajurcami.

6Chai llaquita alichingapami apostolcunapash, ancianocunapash tandanajurca.

7Ña unaita rimarinajushca jipami, Pedroca shayarishpa cashna nijurca:

“Huauquicuna. Na Israelcunamambash quishpirinamanda ñuca villajpi, crishpa quishpirichunmi, Taita Diosca pundallata agllahuarca. Chaitaca, cangunallata yachanguichimi.

8Tucuicunapaj shunguta yachaj Taita Diosmi, na Israelcunatapash chasquirca. Chaita ricuchingapami ñucanchiman carashcashnallata, paicunamambash jucha illaj paipaj Espirituta cararca.

9Diosta crijpimi, paicunapaj shungumanda juchata anchuchishpa, paicunapash, ñucanchipash chashnallata cajta ricuchirca.

10Mandashca shimicunataca ñucanchipash, ñucanchi ñaupa taitacunapash na pactachi ushashpami causarcanchi. Shina cashpaca cunanga, ¿imashpata Jesusta catijcunatapash, yuguta apachijshna llaquichishpa, Taita Diosta fiñachingapa munanguichi?

11Ashtahuangarin, Apunchi Jesuspaj ninan juyaimandallami, ñucanchipash, paicunapash quishpirina cashcata crinchi” nijurcami.

12Shinallata, Bernabendi, Pablondi villanajujtaca tucuicunami upalla uyanajurca. Paicunaca, Taita Dios ushaita carajpi, na Israelcunapaj ñaupajpi, pipash na rurai ushashcacunata, jatun manllarinacunata rurashcatami villanajurca.

13Shina villashpa tucuchijpimi Jacoboca, cashna nirca:

“Huauquicuna, ñucata uyahuaichi.

14Taita Diosca, na Israelcunatapash, Paipaj huahua tucushpa causachun, imashna agllai callarishcatami, Simón Pedroca ña villarca.

15Profetacunaman, Diosllata quilcachishca Shimipipash, chashnallatami nijun:

16‘Cashna tucushca jipaca, ñuca tigramushpami,

Davidpaj jatun carpa urmashcatapash cutin alichisha.

Shina rurashpami, tucuilla urmashcatapash, alichishpa shayachisha.

17Shina rurajpimi shuj gentecunapash, Jatun Diosta mascanajunga.

Shinallata, na Israelcunapashmi ñuca shutipi crishpa mascanajunga.

18Ñaupa huatacunamandapacha tucuita villaj Jatun Diosmi, chashna nijun’ nircami.

19Shinamandami, Taita Diospajman tigrarij na Israelcunataca, na llaquichina canchi yanimi.

20Ashtahuangarin, cashnata quilcashpa cachashunchi: ‘Rurashcalla dioscunaman carashcacunataca micushpa, na mapayanachu, na huainayanachu canguichi. Shinallata, sipishpa huañuchishca aichatapash, yahuartapash na micunachu canguichi’ nishpa cachashunchi.

21Moisesca, ñaupa huatacunapillatami, tucui pueblocunapi tiyaj sinagogacunapi villachun mandashca. Chaitaca, samana punllacunapimi quilcacatishpa uyachinajun” nijurcami.

22Shina nijpica, apostolcunapash, ancianocunapash, tandanajushca tucui crijcunapashmi alicachinajurca. Shina cashpami, Pablota, Bernabeta cumbashpa Antioquía puebloman richunga, Barsabás nishca Judastapash, Silastapash, agllanajurca. Paicunaca, tucui crijcunapurapica ali pushajcunami carca.

23Paicuna apachunga, cashna nishpami quilcarca:

“Apostolcunapash, ancianocunapash, tucui crijcunapashmi, Antioquía pueblopi, Siria shuti, Cilicia shuti llactacunapi causajcunamanda crijcunataca: ‘Alillachu capanguichi’ nipanchi.

24Ñucanchipuramanda huaquingunami, ñucanchi na cachajpita cangunapajman rishcata uyarcanchi. Paicunaca: ‘Circuncisiondapash, Moisés mandashca shimicunatapash pactachinami canguichi’ nishpa pandachishpami llaquichinajushca.

25Chaimandami cashna yarinajushpa, tucuilla shujlla yuyaita japircanchi. Ñucanchi juyashca Bernabeta, Pablota cumbashpa richunmi, cai huauquicunataca agllarcanchi.

26Paicunaca, huañuchi tucunatapash na manllashpami, ñucanchi Apunchi Jesucristopaj shutipi villanajurca.

27Ñucanchi parlashcata cangunaman villachunga Judastapash, Silastapashmi cachamupanchi.

28Jucha illaj Diospaj Espíritu aliguta yarichijpimi, cashna ruranataca yarircanchi. Cangunata ama ashtahuan llaquichingapami, caicunatalla pactachipaichi ninchi:

29‘Rurashcalla dioscunaman carashcacunataca micushpa na mapayanachu, na huainayanachu. Shinallata, sipishpa huañuchishca aichatapash, yahuartapash na micunachu canguichi, caicunata pactachishpaca, aligutami ruranguichi’ nishca jipaca, cayacaman” nishpami, quilcashpa cacharca.

30Shina cachajpimi, Antioquía puebloman apashpa urai rinajurca. Chaipica, crijcunata tandachishpami, chai quilca fangataca cunajurca.

31Chaita quilcacatishca jipaca ninandami cushijunajurca.

32Judaspash, Silaspash profetacuna cashpami, crijcuna shinlli catinajuchun, ninanda yachachishpa cushichinajurca.

33Ña tauca punllacuna yalishca jipaca, paicunata cachamujcunapajman tigrachunmi, “aliguta ripanguichi” nishpa, chai crijcunaca cachanajurca.

34(Ashtahuangarin Silas runaca, “chaipi saquirinaca alimi” yajurcami).

35Pablopash, Bernabepash, Antioquía pueblopimi saquirirca. Paicunaca, shuj crijcunandimi, Jatun Diospaj Shimita yachachishpa, quishpirinamandapash villanajurca.

Pabloca, Bernabeta saquishpami shuj llactacunapi villangapa cutin rirca

36Tauca punllacuna jipami Pabloca, Bernabetaca cashna nirca:

“Apunchi Jesusmanda ñucanchi villanajujpica, tauca pueblocunapimi crirca. Chai crijcuna imashna catinajujta, tucuilla pueblocunapi cutin ricungapa tigrashpa ripashun” nircami.

37Shina nijpimi Bernabeca, Marcos ni tucushca Juandapash pushangapa munarca.

38Ashtahuangarin Pabloca, nara villashpa tucuchijpillata, Panfilia shuti llactapi paicunata saquishpa rishcamandami na pushangapa munarca.

39Paicunapura shujlla yuyaita napacha japi ushashpami, ishcandimanda shicanyarirca. Chaimandami Bernabeca, Marcosta pushashpa Chipre llactaman barcopi chimbarca.

40Pabloca, Silastami pushangapa agllarca. “Jatun Diospaj juyaihuan pushachun” nishpa, crijcuna cachajpimi rinajurca.

41Paicunaca, Siria, Cilicia llactacunapi tandanajuj crijcuna shinlli catinajuchun yachachishpandimi rinajurca.