1Cunanga, Jerusalén pueblopi mascagrichi.
¿Shuj runallapash, na llullashpa, alita ruraj tiyangapashchari?
Plazacunapi mascashpa, alitalla ruraj runata, shujllatapash tarijpica, Jerusalendaca quishpichishami.
2Maijan cashpapash: “Mandaj Dios ricujujpimi, alitalla rurashpa causajuni” nijushpapash llullashpami chashna nijun.
3Mandaj Dioslla, na llullashpa causachunmi munangui.
Paicunaca, ninanda llaquichijpipash, napacha cazurcachu.
Ashtahuan ninanda llaquichijpipash, napacha ali tucurcachu.
Rumitapash yali shinlli shungucuna cashpami, cambaj ñaupajman tigraringapaca napacha munarca.
4Shina cajpimi cashna yarircani:
“Cai na cazuj gentecunaca, Mandaj Dios mandashcatapash na cazushpami causanajun.
Dios mandajujtapash napacha cazungapa munashpami causanajun.
5Chaimandami, mandajcunapajman rishpa rimagrini.
Paicunaca, Mandaj Dios mandashcatapash, jipa punllapi Dios tapuchishpa llaquichinataca yachangami” yarcanimi.
Ashtahuangarin, Dios mandashcatapash na cazushpami, imata pactachinatapash yangapi churanajurca.
6Chaimandami paicunataca, sachapi causaj leonguna huañuchinga.
Jichushca pambapi causaj atujcuna shamushpami tucuchinga.
Leopardocunami, pueblomanda llujshijta chapariyashpa micunga.
Paicunaca, Diosta na cazushpami, ashtahuan juchata rurashpa causanajun.
7“Paicunapaj huahuacunapash, rurashcalla dioscunata juyangapami juramenturca.
Paicunaman tucuita carajpipash, Ñucataca na yarircachu.
Tandanajushpami, culquimanda huainayaj huarmicunapajman rinajurca.
Chai juchacunamandaca, ¿imashnata na llaquichishpa saquishayari?
8Alipacha micuchishca caballocunashnami, huacashpa shujcunapaj huarmicunata catinajurca.
9Chashna na alicuna cashcamandaca, ¿nachu llaquichina cashcani?
Chai llactapi, na ali causanajujtaca ¿nachu ninandapacha llaquichina cani? nircami Mandaj Diosca.
10Uva chagraman yaicushpa tucuchigrichi.
Shina cashpapash, na tucuillata tucuchinachu canguichi.
Uva yuracunapaj malquicunataca, tucuilla fitishpa tucuchigrichi,
Chaicunaca na Mandaj Diospaj cashcamandami chashna tucuchina canguichi.
11Israel ayllucunapash, Judá ayllucunapash, ishcandillatami Ñucataca na cazurca” ninmi Mandaj Diosca.
12Mandaj Diosta na cazushpami, cashna ninajun:
“Diosca, na imatapash rurangachu. Ninan macanajuipash, ninan yarjai punllacunapash napacha tiyangachu.
13Profetacunaca, yangatami chashna villanajun.
Paicunataca, na Dios cachamushcachu” ninajunmi.
14Shinamandami, tucuita Mandaj Diosca, cashna nin:
“Paicuna chashna nishcamandami, Can rimashca shimicunaca, rupajuj ninashna cachun, canman ushaita cuni.
Chai gentecunaca, rupana yamdashnami canga.
Can rimashca shimicunami, paicunataca tucuchinga” ninmi.
15Mandaj Diosca, cashnatapashmi nin:
“Israel gentecunalla. Cangunata llaquichinajuchunga, caru llactamanda runacunatami pushamugrini.
Paicunaca pundamandapacha, ninan shinlli runacunami.
Canguna na uyashca rimaita rimajcunami.
Chaimandami, paicuna imata rimajtapash na yachai ushanguichi.
16Paicunaca, tucuicunami ninan shinllicuna.
Paicunapaj flechacunaca, huañuchishpa tucuchina ushaitami charin.
17Paicunami, cangunapaj granocunata, llamacunata, huagracunata, uvacunata, higocunata micushpa tucuchinajunga.
Shinallata, cangunapaj churicunatapash, ushicunatapashmi huañuchinga.
Chashna rurashpami, canguna yariashpa causashca jatun pircacunata pueblocunata tucuchinga” ninmi.
18Mandaj Diosca, cashnatapashmi nirca:
“Chai punllacuna chayamujpipash, tucuillataca na tucuchishachu.
19Chai punllacunapica: ‘Ñucanchita Mandaj Taita Diosca, ¿imamandata ñucanchitaca cashna llaquichin?’ ninajungami.
Shina nijpica, cashna ningui: ‘Cangunallatami Mandaj Diosta saquishpa,
cangunaman pai carashca llactapi shuj dioscunatara catircanguichi.
Chashnallatami cangunaca, na rijsishca runacunapajta rurashpa, na rijsishca llactapi causagringuichi’ ningui” nircami.
20Caitaca, Jacobpaj miraicunaman villagringui.
Judá llactapi causajcuna uyachun, cashna nigringui:
21Cunanga, caita uyaichiyari: “Juizu illaj, shungu illaj gentecuna.
Cangunaca, ricuitapash na ricuj, uyaitapash na uyajcunami canguichi”.
22Mandaj Diosca, cashnami nin:
“Ñucataca, ¿nachu manllanguichi?
Ñuca ñaupajpica, ¿nachu ninandapacha manllarina canguichi?
Ñucami t'iyu alpataca, causaita causaicaman tiyachun, mama cucha manñapi churarcani.
Ñuca mandashpa churashcamandaca, napacha yalingachu.
Ninan huairahuan yacu jatarishpapash, t'iyu alpamandaca, na yalingachu.
23Ashtahuangarin cai gentecunaca, na cazuj, na ali shungucuna cashpami,
Ñucamanda anchurishpa maitapash rinajurca.
24Cangunapaj shungupica:
‘Cunanga, ñucanchita Mandaj Taita Diosta manllashpa causashunchi.
Paimi, punda tamiatapash, jipa tamiatapash, tamiana punllacunapillata cachamun.
Granocunata tandachina tiyachumbash, Paillatami rupai punllacunata cachamun.
Chaicunataca cangunaca, yaritapash na yarishpami causarcanguichi.
25Canguna, chashna na alicunata rurashcamandami, ñucanchi ali causanaca jarcarishca.
Cangunapaj juchallatami, chai alicunataca cangunamanda anchuchirca’ nichiyari.
26Ñuca agllashca gentecunapillatami, Ñucata na manllajcuna tiyarca.
Pandachishpa urmachingapami, paicunaca pacalla chapanajurca.
Runacunata huañuchingapami, pacalla imatapash churanajurca.
27Paicunapaj huasiman shuhuashpa apashcacunaca,
alasyu animalcuna paicunapaj huasipi jundashcashnami.
Chashna cashpami, ninanda charijyanajurca.
28Paicunaca ninanda micushpami, virayanajurca.
Paicunaca, tucuitapacha yalishpami na alita ruranajurca.
Taita mama illaj huahuacunatapash, na llaquircachu.
Huajchacunatapash, na llaquircachu.
Paicunaca, charijyana yuyailla jundami causanajurca.
29Shina rurashcamandaca, ¿nachu llaquichina cani?
Chashna gentecunataca, ¿nachu paicuna na alita rurashcamandallata, ninandapacha llaquichina cani?
Mandaj Dios Ñucallatami, chashna nini.
30Cai llactapica, ninan manllarinayai, na ricunayai na alitami ruranajurca.
31Profetacunapash, llullashpallami villanajurca.
Sacerdotecunapash, paicuna munashcatami ruranajurca.
Ñuca agllashca gentecunapash, chaitami alicachinajurca.
Shina cashcamandaca, llaqui chayamui punllapica, ¿imatashi ruranguichi?” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
