ISAÍAS 21 - Quichua Imbabura 2016

Babilonia llactata llaquichinata villashcamanda

1Mama cucha manñapi, chaquishca pambapi causajcunata llaquichinatami villashca.

Neguev shuti chaquishca pambamanda, ninan acapana shamujshnami, manllachishpa tucuchij shamunga.

2Muscuipishnami ninan llaqui tiyanataca ricurcani.

Na cazuj runaca, ashtahuanmi na cazushpa catin.

Huañuchij, runapash ashtahuanmi, huañuchishpa catin.

“Elam shuti llactapi, Media shuti llactapi causajcunapash, macanajungapa richilla.

Paicuna, ashtahuan caparinajuchunga na saquishachu” nihuarcami.

3Chaimandami, ninanda llaquirini.

Ungunalla huarmita nanai japijpishnami, llaquita apajuni.

Chai llaquicunata uyashpa, ricushpami, ninandapacha manllarini.

4Shungumandapachami, ninanda llaquirishcani.

Tutacunapash na samai ushashpami, manllaihuan pacarijuni.

5Jatun micuipica, micunata churanatapash, gentecuna tiyarinatapash juyaillami alichin.

¡Jatun mandajcuna, macanajuipi jarcarina jirrucunataca aligutami punchayachina canguichi!

6Jatun Diosmi, ñucataca: “Tucuita ricushpa, ñucaman villachunmi, shuj runata churana cangui” nihuarca.

7Chai runami: Burrucunapi, camellocunapi, tiyarishca runacuna shamunajujta ricurca.

Shinallata, carretacunata, ishcai caballocuna aisashpa shamunajujtami, cutin cutin ricurca.

8Paimi, leonshna caparishpa cashna nirca:

“Jatun Dioslla, caipimi tutapash, punllapash chapashpa shayajuni.

9Shina cashpami, caballocunapica, ishcai ishcai tiyarishca runacuna shamujujta ricuni” nircami.

Chai jipami, cashnatapash nirca: “Babilonia puebloca urmarcami, urmarcami.

Rurashcalla dioscunapash, alpaman urmashpami ñuturirca” nircami.

10Shina nijpimi cashna nircani: “Ñuca llactapi, llaquihuan causaj gentecunalla;

Israelcunata Mandaj Dios rimashcatami, cangunamanga villarcani” nircanimi.

Duma shuti llactata llaquichinata villashcamanda

11Duma shuti llactata llaquichinata villashpami: Seir shuti llactamandaca cashna nishpa caparirca:

“Ricushpa shayajuj runa, ¿ñachu punllayamun? ¿ñachu punllayamun?” nirca.

12Shina nijpimi, ricushpa shayajuj runaca: “Ñami punllayamun, ashtahuangarin ñapashmi tutayanga.

Tapungapa munashpaca, cutin tapuj shamunguilla” nirca.

Arabia llactata llaquichinata villashcamanda

13Arabia llactata llaquichinata villashpami, cashna nirca:

Dedán shuti llactamanda shamushcacuna:

Cangunaca Arabia llactapimi, sacha yura chaupicunapi pacarina canguichi.

14Tema shuti llactapi causajcunaca, yacuta apashpami tuparigrina canguichi.

Pacajushpa rinajuj gentecunaman, micunata carangapami tuparigrina canguichi.

15Paicunaca, espadahuan huañuchingapa catinajujpimi pacajushpa calpanajun.

Arcocunapi flechacunata churashpa catinajujpimi, llujshishpa rinajun.

Macanajuita manllashpami calpanajun.

16Mandaj Diosca, cashnami nihuarca:

“Cunanmanda huata jipaca, Cedar shuti runamanda miraicunaca,

tucuicuna alicachijpi causashca cashpapash, ninanda llaquichijpimi tucuringa.

17Cedar shuti runapaj miraicunaca, arcohuan macanajungapa, alipacha shinlli cashpapash, huaquinllami puchunga” nircami.

“Caitaca, Israelcunata Mandaj Diosmi”, chashna nirca nijurcami.