JEREMÍAS 20 - Quichua Imbabura 2016

Pasur shuti sacerdoteta llaquichinamanda

1Imer runapaj churi Pasur shuti sacerdotemi, Mandaj Diospaj huasipica, tucuita mandajurca. Paipashmi, Jeremías villajujtaca uyarca.

2Chaita uyashpami Pasur shuti runaca, profeta Jeremiastaca astirca. Chai jipami, Benjamín shuti pungupi tiyajuj shuj caspi utujucunapi canichishpa, prezu churarca. Chai pungutami, Mandaj Diospaj huasimanga yaicuna carca.

3Chai cayandi punllami Pasur shuti runaca, chai caspipi Jeremiasta churashcamandaca cacharichirca. Chai jipami Jeremiasca: “Mandaj Diosca, candaca na Pasur ningachu, ashtahuangarin Magor-misabib nishpami rimanga.

4Mandaj Diosca, cashnami nin: ‘Cambash, cambaj cumbacunapash, ninan manllaihuanmi causanguichi. Cambaj cumbacunataca, fiñaj runacuna, cambaj ñaupajpillata huañuchintami ricungui. Judá llactapi causajcunatapash, Babilonia llactata jatun mandajpaj maquipimi churagrini. Paimi, Babilonia llactaman prezu apashpa huañuchinga.

5Shinallata, cai pueblopi causajcuna, imata rurashpa tucui ima juyailla charishcacunatami apanga. Judá llactata jatun mandajcuna tucui charishcacunatapashmi, paicunata fiñajcunaman cusha. Paicunami quichushpa, Babilonia llactaman apanajunga.

6Pasur runapash, cambaj huasipi tucui causajcunapashmi, Babilonia llactaman prezu apai tucunguichi. Cambash, cambaj cumbacunandi chai llactapi huañushpami, pambai tucunguichi. Can llullashpa villashcamandami chashna tucunguichi’ ninmi” nircami.

Jeremías ninanda llaquirishcamanda

7Mandaj Dioslla, ninandami umachihuashcangui.

Ñucaca, Can umachijpimi causashcani.

Canga ninan ushaita charishpami, mishahuashcangui.

Punllandimi, asishpa ricunajun.

Tucuicunami na alicachishpa ricunajuhuan.

8Maipi imata ningapa shayarishpapash:

“Llaquichishpa tucuchingapa ñami shamunajun” ningapallami shimitaca pascajuni.

Mandaj Dioslla, Cambaj Shimita villajpica, punllandimi rimashpa, asishpa ricunajuhuan.

9Shinamandami: “Diostaca, na ashtahuan yarishachu” yajurcani.

“Paipaj shutipipash, na ashtahuan villashachu” nijurcanimi.

Shina yarijujpipash, ñuca shungu ucupimi Cambaj Shimica, nina rupajujshna yarichijurca.

Chaita jarcaringapa munashpapash, napacha usharcanichu.

10Tucuicunami ñucataca, fiñashpa na alicachishpa, maipi cashpapash rimanajujta uyani.

Paicunaca: “Jacuchi, juchachishpa villagrishunchi” ninajunmi.

“Ñuca cumbacunapash, chaitaca saquingami yashpami ricunajurca.

Paicunaca, pandaringami yashpami ñucataca ricunajurca.

Shinallata, paitaca mishashpa llaquichishunmi” ninajurcami.

11Ashtahuangarin Mandaj Diosca, ninan shinlli macanajuj runashnami ñucataca yanapajuhuan.

Catiriyashpa ñucata llaquichijcunaca, ninanda pandarishpami, na mishai ushahuanga.

Imata ruraitapash na ushashpami, ninandapacha pingai tucunajunga.

Tucui causaipimi paicunaca, pingai tucushpalla causanajunga.

12Tucuita Mandaj Dioslla, Canga alitalla rurashpa causajcunataca ricuriajunguimi.

Yuyaicunatapash, shungupi imata yarijujtapash, tucuitami yachangui.

Na ali gentecunata llaquichijujta ricungapami munani.

Ñuca causaitaca, Cambaj maquipimi churarcani.

13Mandaj Diostaca, ninanda alicachishpa candaichiyari,

Paimi, huajcha runagutaca, na alita ruraj runacunapaj maquimanda quishpichirca.

14Ñuca huacharishca punllapash, na alicachi tucushca cachun.

Ñuca mama ñucata ungushca punllapash, na alicachi tucushca cachun.

15“Cunanga, jari huahuagutami ungushca” nishpa,

ñuca taitaman villaj runapash na alicachi tucushcamari saquirishca.

Chashna villajpica, ñuca taitaca cushijushcangami.

16Chai runaca, na llaquishpa, Mandaj Dios llaquichishpa tucuchishca pueblocunashna cachun.

Tutamandapash, chaupi punllapash, ninan llaquihuan caparinajuj uyarichun.

17¿Imashpashi ñuca mamapaj vijsapillata na huañuchihuarca?

Shina cajpica, ñuca mamapaj vijsapillatami huañushpa saquiriman carcani.

Ñuca mamapaj vijsamandaca napacha llujshimanllu carcani.

18Mamapaj vijsamandaca, ¿imapashi huacharircani?

¿Na alicachi tucushpa, rimajpi pingai tucushpa, llaquinayaita causangapachu huacharishcani?