1Canaán llactamanda, Arad llactata jatun mandajca, Neguev shuti pambacunapimi causajurca. Paica: “Atarim shuti puebloman rina ñandami Israelcunaca, macanajungapa shamunajun” nijtami uyarca. Chaiman llujshishpa macanajushpami, huaquin Israelcunataca prezu japirca.
2Shinamandami Israelcunaca, Mandaj Diospaj ñaupajpi pactachingapa cashna ninajurca: “Cai gentecunata ñucanchi maquipi churajpica, tucuilla pueblocunatapash tucuchishpami chingachishun” ninajurcami.
3Israelcuna mañanajujta, Mandaj Dios uyashpami, Canaán gentecunataca paicunapaj maquipi churarca. Chaimandami, chai pueblocunatapash, chaipi causajcunatapash tucuillata tucuchirca. Shinamandami chai llactataca Horma shutita shutichirca.
Bronce culebrata rurashcamanda4Chai jipami Israelcunaca, Hor shuti urcumandaca, Edom llactata muyushpa, Puca Cuchaman rina ñanda rinajurca. Paicunaca chai ñanda rinajushpami, ninanda shaijushca cashpa na ashtahuan ringapa munanajurca.
5Chashna cashpami Taita Diostapash, Moisestapash fiñashpa cashna rimanajurca:
“¿Imashpata ñucanchitaca cai jichushca pambapi huañuchun, Egipto llactamandaca vichai pushamurcangui? Caipica yacupash, micunapash na tiyanllu. Ñucanchica cai yanga tandatalla micushpaca, ña amishcami canchi” ninajurcami.
6Shina ninajujpimi Mandaj Diosca, huañuchijlla millai culebracunata, Israelcunapaj chaupiman cachamurca. Chai culebracuna canijpimi, Israelcunaca ashtacacuna huañurca.
7Shina tucujpimi Israelcunaca, Moisespajman shamushpa cashna ninajurca:
“Ñucanchica, Mandaj Diostapash, candapash fiñashpa rimashpami juchata rurashcanchi. Cunanga, cai culebracunata ñucanchimanda anchuchipachun, Mandaj Diosta ninanda mañapai” ninajurcami.
Shina nijpimi Moisesca, Israelcunamanda mañarca.
8Chaimandami Mandaj Diosca, Moisestaca cashna nirca:
“Huañuchijlla millai culebratashna broncemanda rurashpa, caspipi huarcungui. Maijandapash culebra canijpica, chai rurashca culebrata ricushpami na huañunga” nircami.
9Shina nijpimi Moisesca, bronce culebrata rurashpa caspipi huarcurca. Maijandapash culebra canijpica, chai bronce culebrata ricushpami na huañunajurca.
Israelcunaca, Moab shuti llactata muyushpa rinajushcamanda10Chaimanda Israelcuna rishpaca, Obot shuti pushtupimi carpacunata shayachishpa causanajurca.
11Obot shuti pushtumanda rishpaca, Moab shuti llacta chimbapurapi tiyajuj Ije-abarim shuti chaquishca pambapimi, carpacunata shayachishpa causanajurca. Chai pambaca indi llujshimujmanmi tiyajun.
12Ije-abarim shuti pambamanda rishpaca, Zered shuti pugru pambapimi carpacunata shayachishpa causanajurca.
13Zered shuti pugru pambamanda rishpaca, Arnón shuti jatun yacuta chimbashpa chaquishca pambapimi, carpacunata shayachishpa causanajurca. Chai jatun yacuca, amorreo gentecunapaj llactamandami llujshimujun. Arnón shuti jatun yacumi, Moab llactahuan, amorreo gentecunapaj llactahuan mujunda yalijun.
14Shinamandami, Mandaj Diospaj jatun macanajuicunamanda, quilcashcapica cashna nijun:
“Puca Cuchapi imata rurashcatapash,
Arnón yacu manñapipashmi rurarca.
15Larca yacucunapash tandanajushpami,
Ar shuti pushtucaman chayanajun,
Moab llacta manñapi saquirinajun” nijunmi.
16Arnón yacu manñamandaca, Beer shuti pushtumanmi shamunajurca. Chaipimi Mandaj Diosca Moisesmanga: “Israelcunata tandachimui, caipimi pugyumanda yacuta ufiachun caragrini” nirca.
17Shinamandami Israelcunaca, cashna nishpa candanajurca:
“Pugyu yacugulla, llujchimupailla.
Pugyu yacuta alicachishunchiyari.
18Taitacuna allashca pugyugulla.
Pueblota mandajcunami allanajushca.
Alicachi tucushcacunami varacunahuan allanajushca” nishpami candanajurca.
Israelcunaca chaquishca pambamandami, Matana shuti pushtuman shamunajurca.
19Matana pushtumandaca, Nahaliel pushtumanmi shamunajurca. Nahaliel pushtumandaca, Bamot pushtumanmi shamunajurca.
20Bamot pushtumandaca, Moab llactapi tiyajuj pugru pambaman chayashpami, Pisga urcu jahuaman chayanajurca. Chaimandaca, chaquishca pambata ricunallami carca.
Israelcuna, Sehón shuti jatun mandajta mishashcamanda(Deut. 2:26-37)21Israelcunaca, amorreo gentecunata jatun mandaj Sehón shuti runataca, paicunapaj randi rimajcunatami cashna nigrichun cacharca:
22“Ñucanchimi cambaj llactata yalingapa munapanchi. Tarpushca pambacunapipash, uva chagracunapipash na yaicupashunllu. Yacuta llujchingapa allashca pugyucunapipash na tacaripashunllu. Cambaj llactataca, ñandallami yalipashun” nichunmi cacharca.
23Ashtahuangarin mandaj Sehón runaca, Israelcuna yalichun na saquircachu. Ashtahuambash, mandaj Sehón runaca, pueblopi causajcunata tandachishpami, Jahaza shuti jichushca pambaman chayamushpa Israelcunahuan macanajurca.
24Chaipimi Israelcunaca, chai jatun mandajta espadahuan huañuchishpa, paipaj llactata mishashpa japinajurca. Arnón shuti yacumandaca, Jaboc shuti yacucamanmi japinajurca. Chaipica Amón shuti runapaj miraicunami causanajurca. Chai llactaca alipacha jarcashcami carca.
25Israelcunaca, cai tucuilla pueblocunata japishpami, amorreo gentecunapaj tucuilla pueblocunapi causanajurca. Shinallata, Hesbón shuti pueblopipash, chai pueblo muyundi uchilla llactacunapipashmi causanajurca.
26Hesbón shuti puebloca, amorreo gentecunata mandaj Sehón shuti runa causajuj pueblomi carca. Paimi pundaca, Moab llactata jatun mandajhuan macanajuita charishca carca. Shina macanajushpami, pai mandajushca tucui llactataca, Arnón shuti yacucaman quichushca carca.
27Chaimandami, candanacunata quilcajcunaca cashna ninajun:
“Hesbón shuti puebloman shamuichi.
Jatun mandaj Sehón shuti runapaj pueblotaca,
cutin alichishpa, cutin shayachipaichi.
28Hesbón shuti pueblomandaca, ninami llujshirca.
Sehón shuti runapaj pueblomandami chashna llujshirca,
Chai ninaca, Moab llactapi tiyaj Ar shuti pueblotami tucuchirca.
Arnón shuti yacu jahua lomacunapi, causanajuj mandajcunatapashmi huañuchirca.
29¡Aij Moab llactalla, imachari tucungui!
Quemos shuti diosta mañashpa causajcunaca, tucurircanguichimari.
Cambaj churicunaca pacajungapami calpanajurca.
Cambaj ushicunapash gañanmanmi tigrarca.
Amorreo gentecunata Mandaj Sehón runami chashna llaquichirca.
30Paicunapaj llactataca tucuillami tucuchircanchi.
Hesbón shuti pueblomandaca, Dibón shuti pueblocamanmi tucurirca.
Nofa shuti pueblomandaca, Medeba shuti pueblocamanmi tucuchircanchi” ninajunmi.
Israelcuna, Basán llactata mandaj Og shuti runata mishashcamanda(Deut. 3:1-11)31Chashnami Israelcunaca, amorreo gentecunapaj llactapi causanajurca.
32Moisesca, Jazer shuti pueblotapashmi ricugrichun cacharca. Chai pueblotapash, muyundi uchilla llactacunandi quichushpami, chaipi causanajuj amorreo gentecunataca llujchishpa cacharca.
33Chaimanda tigrashpami, Basán llactaman rina ñanda vichai rinajurca. Chaita rinajujpimi, Basán llactata mandaj Og shuti runaca, Israelcunahuan, Edrei shuti pueblopi macanajungapa, paipaj gentecunahuan llujshirca.
34Chaipimi Mandaj Diosca, Moisesta cashna nirca: “Ama manllaichu. Ñucami chai jatun mandajtaca, paipaj tucuilla gentecunandi, paipaj tucuilla llactandi, cambaj maquipi churarcani. Paicunataca, amorreo gentecunata mandashpa, Hesbón shuti pueblopi causajushca mandaj Sehón shuti runata imashna rurashcashnami rurana cangui” nircami.
35Shina nijpimi Israelcunaca, Og shuti jatun mandajtaca, paipaj churicunandi, tucuilla paipaj gentecunandi, shujllatapash causajtaca na saquishpa huañuchinajurca. Shina huañuchishpami, paicunapaj llactataca japinajurca.
Who We AreWhat We EelieveWhat We Do
2025 by iamachristian.org,Inc All rights reserved.
