1Jatun mandaj Davidca, ña ashtaca huatacunata charij rucugu cajpi, churajunacunahuan quilpajpipash, na cunujyanllu carca.
2Chaimandami, paipajta rurajcunaca, cashna ninajurca: “Jatun mandajta ricushpa, paihuan puñushpa cunuchijuchunga, jarihuan nara tacarishca cuitsagutami, ñuca amu jatun mandajman mascana canguichi. Shinami, ñuca amu jatun mandajca cunujyanga” ninajurcami.
3Shina nijpimi, tucuilla Israel llactapica, shuj juyailla cuitsaguta mascashpa, sunamitapura Abisag shuti cuitsaguta tarishpa, jatun mandajman apamunajurca.
4Chai cuitsaguca, juyaillagumi carca. Paimi, jatun mandajtaca cunuchishpa, paipajta rurashpa causajurca. Shina cajpipash jatun mandajca, chai cuitsagutaca na tacarircachu.
Adonías runaca, jatun mandaj tucungapami munashca5Haguit shuti huarmipaj churi Adonías runaca: “Ñucami mandaj cagrini” nishpami, na cazushpa purijurca. Shina nishpami, carretacunata, caballopi purij runacunata, paipaj ñaupajpi calpachun, picha chunga macanajunata yachaj runacunatapash tandachirca.
6Shina cajpipash paipaj taitaca: “¿Imashpata chashna rurangui?” nishpaca napacha jarcarcachu. Adonías runaca, juyailla runami carca. Paitaca, Absalonbaj catimi charishca carca.
7Paica, Sarvia shuti huarmipaj churi Joab runahuan, sacerdote Abiatarhuan yachachirishpa, shujlla yuyai tucushcami carca. Paicunami, Adoniastaca yanapan carca.
8Shina cajpipash, sacerdote Sadocpash, Joiada shuti runapaj churi Benaía shuti runapash, profeta Natanbash, Simei shuti, Rei shuti runacunapash, Davidpaj cati mandajcunapash Adoniastaca na catircachu.
9Ashtahuangarin Adonías runaca, Rogel shuti yacu pugyu chayanapi tiyaj, Zohelet shuti jaca rumi quimiriapimi, llamacunata, huagracunata, ashtahuan virayashca shuj animalcunatapash huañuchishpa, jatun micuita rurajurca. Chai micuimanmi, jatun mandajpaj churi tucuilla paipaj huauquicunata cayarca. Shinallata jatun mandajpajta ruraj, Judá llactamanda tucuilla runacunatapashmi cayarca.
10Shina cayashpapash, profeta Natán runata, Benaía shuti runata, Davidpaj cati mandajcunata, paipaj huauqui Salomondapash na cayarcachu.
11Chaimandami Natán runaca, Salomonbaj mama Betsabé huarmitaca cashna nijurca:
“Ñucanchita mandaj Davidpash na yachajta, Haguit shuti huarmipaj churi Adonías runa mandajujtaca, ¿nachu uyashcangui?
12Cunanga cambash, cambaj churi Salomonbash, ama huañuchi tucungapaca ñuca nishcata uyapai.
13Chai jipaca, jatun mandaj Davidpajman rishpa cashna nigringui: ‘Ñucata jatun mandajlla. ¿Nachu cambajta ruraj ñucataca, cashna nishpa juramenturcangui: Ñucapaj catica, cambaj churi Salomonmi jatun mandaj tucunga. Paimi, ñuca mandashpa tiyajushcapica tiyaringa nijurcangui? Shina cashpaca, ¿imashpata Adonías runara mandajun?’ nigringui.
14Jatun mandajhuan can chashna parlajujpillatami, ñucapash canda catishpa yaicumusha. Chaipimi, can imashna nijushcapash chashnapacha cajta villasha” nijurcami.
15Shina nijpimi Betsabé huarmica, jatun mandaj Davidpaj ucuman yaicurca. Jatun mandajca, ña rucugupachami carca. Shina cajpimi, sunamitapura Abisag shuti cuitsagu paitaca ricushpa causajurca.
16Betsabé huarmica, jatun mandajta cazushcata ricuchingapami, paipaj ñaupajpi cungurirca. Chaimandami jatun mandajca:
“¿Imatata ningui?” nishpa tapurca.
17Shina tapujpimi Betsabé huarmica, cashna nirca:
“Ñucata mandajlla, cambajta ruraj ñucamanmi, canda Mandaj Taita Diospaj shutipi, cashna nishpa juramenturcangui: ‘Cambaj churi Salomonmi, ñucapaj catica mandanga. Paimi, ñuca mandashpa tiyajushcapica tiyaringa’ nircanguimi.
18Cunanga Adonías runami mandajun. Chaitaca, ñucata jatun mandajca, cunangaman nara yachapanguichu.
19Paica huagracunatapash, ashtahuan ali virayashca shuj animalcunatapash, ashtaca llamacunatapash huañuchishpami, shuj jatun micuita rurashca. Chai micuimanmi, can jatun mandajpaj tucuilla caishuj churicunatapash, sacerdote Abiatartapash, macanajuj runacunata mandaj Joab runatapash cayashca. Ashtahuangarin cambajta ruraj Salomondaca, na cayashcachu.
20Shina cashcamanda, ñucata jatun mandajlla, tucui Israelcunami ñucata jatun mandaj mandashpa tiyajushcapi cambaj randica, maijan mandashpa tiyarinatapash villachun shuyanajun.
21Can na chashna rurajpica, ñucata jatun mandaj huañushpa, cambaj ñaupa taitacunahuan tandanajugrishca jipami, ñucapash, ñuca churi Salomonbash juchachi tucushun” nircami.
22Jatun mandajta, Betsabé chashna nijujpillatami, profeta Natanbash ñapash shamurca.
23Pai ña chayamujpica: “Profeta Natanmi shamushca” nishpami, jatun mandajman villanajurca. Pai ña yaicushpaca, jatun mandajpaj ñaupajpi cungurishpami, alpaman chayajta urai cumurirca.
24Chai jipami, Natán runaca cashna nirca:
“Ñucata jatun mandajlla, ¿canllu cashna nircangui?: ‘Ñucapaj catica, Adonías runami jatun mandaj tucunga. Paimi, ñuca mandashpa tiyajushcapica tiyaringa’ ¿nircanguichu?
25Cunanmi paica huagracunata, virayashca shuj animalcunata, ashtaca llamacunatapash huañuchishpa, jatun micuita rurangapa urai rishca. Chai micuimanmi, can jatun mandajpaj tucuilla caishuj churicunata, macanajuj runacunata mandajcunata, shinallata sacerdote Abiatartapash cayashca. Ricui, paicunaca paipaj ñaupajpimi micushpandi, ufiashpandi: ‘¡Jatun mandaj Adonías runaca causajuchunlla!’ nishpa caparinajun.
26Shina cashpapash, cambajta ruraj ñucata, Sacerdote Sadocta, Joiada shuti runapaj churi Benaía shuti runata, cambajta ruraj Salomondaca na cayashcachu.
27¿Chashna rurachunga, can jatun mandajllatachu mandarcangui? Can jatun mandaj mandashpa tiyajushcapi, cambaj cati maijan tiyarina cajtapash, cambajta rurancunaman ¿na villashpachu chashna rurarcangui?” nircami.
Salomondami, Davidca jatun mandaj cachun churashca28Shina nijpimi, jatun mandaj Davidca, Betsabé huarmita cayachun cachajpi, paica, jatun mandajpaj ñaupajman yaicushpa shayarirca.
29Chaipimi jatun mandajca, cashna nishpa juramenturca:
“Tucui llaquimanda ñuca almata quishpichij, Mandaj Diosca ricujumbachami.
30Ñucaca, Israelcunata Mandaj Taita Diospaj shutipimi, cashna nishpa juramenturcani: ‘Ñucapaj randica, cambaj churi Salomonmi jatun mandaj tucunga. Paimi, ñuca mandashpa tiyajushcapica tiyaringa’ nircanimi. Chashna nishcatami, cunanga pactachigrini” nircami.
31Shina nijpimi Betsabé huarmica, jatun mandajpaj ñaupajpi cungurishpa, pai jatun mandajta cazushcata ricuchingapa, alpaman chayajta urai cumurishpa, cashna nirca:
“Ñucata jatun mandaj Davidca, causaita causaicaman causajuchunlla” nircami.
32Chai jipami, jatun mandaj Davidca cashna nirca:
“Sacerdote Sadocta, profeta Natán runata, Joiada shuti runapaj churi Benaía shuti runatapash cayamupaichi” nircami.
Shina cayamujpi, jatun mandajpaj ñaupajman ña yaicujpimi,
33jatun mandajca cashna nijurca:
“Cunanga, cangunata mandaj ñucapajta rurajcunata tandachishpa, ñuca churi Salomondaca, ñuca tiyarina mulapi tiyachishpa, Gihón shuti pugyuman pushaichi.
34Chaipimi sacerdote Sadocpash, profeta Natanbash Salomondaca, Israelcunata jatun mandaj cachun aceiteta talishpa javinga. Shinallata trompetatapash huacachishpami: ‘¡Jatun mandaj Salomonga causajuchunlla!’ nishpa caparina canguichi.
35Chai jipaca, paita catiriyaj shamunguichilla. Pai shamushpami, mandashpa tiyarinapi tiyarishpa, ñucapaj randi mandanga. Paitami Israel llactata, Judá llactata mandaj cachun agllarcani” nijurcami.
36Shina nijpimi, Joiada shuti runapaj churi Benaía runaca, jatun mandajtaca cashna nirca:
“Chashna cachun. Ñucata jatun mandajta Mandaj Taita Diospash, chashnallata nishpami ali canman.
37Mandaj Diosca, imashnami ñucata jatun mandajta bendiciajurca, chashnallata Salomondapash rurapachun. Pai mandanataca, ñucata jatun mandaj David mandajushcatapash ashtahuan yali jatunyachishca cachun” nircami.
38Chai jipaca, Sacerdote Sadocpash, profeta Natanbash, Joiada shuti runapaj churi Benaía shuti runapash, cereteo, peleteo runacunapash urai rishpami, Salomondaca jatun mandaj David tiyarina mulapi tiyachishpa, Gihón shuti pugyuman pushanajurca.
39Chaipica, Sacerdote Sadocmi, Diospaj jatun carpamanda apashca cachumanda aceiteta talishpa Salomondaca javirca. Chai jipaca, trompetata huacachinajujpimi: “¡Jatun mandaj Salomonga causajuchunlla!” nishpa, tucuicuna caparinajurca.
40Chai jipaca, tucuicunami candashpa, gaitacunahuan taquishpa, ninanda cushijushpa, Salomonda catishpa vichai rinajurca. Alpa mamapash cuyunatashnami, ninandapacha caparinajurca.
41Adonías runapash, jatun micuiman tucuilla pai cayashcacunapash ña micuita tucuchishca jipami, trompetata huacachinta uyarca. Shina uyashpami, Joab runaca:
“¿Imashpata pueblopica, ninanda caparinajun?” nirca.
42Pai shina nijujpillatami, sacerdote Abiatarpaj churi Jonatán chayamujpimi Adonías runaca, cashna nirca:
“Yaicumuilla, canga imatapash na manllaj runami cangui. Canga, ali villanatami apamujungui” nirca.
43Shina nijpimi Jonatanga, Adoniastaca cashna nijurca:
“Na llullashpami nini. Ñucanchita jatun mandaj Davidca, Salomondami jatun mandaj cachun churarca.
44Jatun mandaj Davidca, Sacerdote Sadocta, profeta Natán runata, Joiada shuti runapaj churi Benaía runata, cereteo, peleteo runacunatapashmi, Salomonhuan cacharca. Paicunami Salomondaca, jatun mandajpaj mulapi tiyachirca.
45Shinallata, Sacerdote Sadochuan, profeta Natán runahuanga, Gihón shuti pugyuman chayanapimi Salomondaca, jatun mandaj cachun aceiteta talishpa javirca. Chaimandami paicunaca, ninanda cushijushpa vichai rirca. Pueblopipash ninandami caparinajun. Chai caparinajujtami, cangunaca uyashcanguichi.
46Shinallata Salomonbash, mandangapa tiyarinapimi ña tiyarirca.
47Jatun mandajpajta rurajcunapashmi, ñucanchita jatun mandaj Davidta, cashna nishpa bendiciangapa shamunajurca: ‘Taita Diosca, Salomonbaj shutitaca, cambaj shutitapash ashtahuan yali rijsinajuchun rurashpami ali capanman. Shinallata pai mandanatapash, can mandajushcataca ashtahuan yali jatunyachishpami ali capanman’ ningapami shamunajurca. Chaimandami jatun mandajca, paipaj sirijushca pushtupillata Diosta ninanda alicachijurca.
48Jatun mandajca, cashnatapashmi nirca: ‘Israelcunata Mandaj Taita Diosca, alicachi tucushca cachun. Paillatami, ñuca mandashpa tiyajushcapi, tiyarishpa mandajujta ricuchun charihuashca’ nircami” nijurcami.
49Chashna villajpimi micuiman Adonías runa cayashcacunaca, manllarishpa chujchunajurca. Chaimandami, paicunaca jatarishpa tucuicuna paicunapaj ñanda japishpa rinajurca.
50Ashtahuangarin Adonías runaca, Salomonhuan tuparingapa manllashpami, Diospaj carpaman rishpa, chaipi tiyajuj altar cachucunapi charirishca shayajurca.
51Chaitami cashna nishpa, Salomonman villanajurca:
“Adonías runaca, can jatun mandaj Salomonda manllashpami, altar cachucunapi charirishpa cashna nijun: ‘Jatun mandaj Salomonlla. Cambajta ruraj ñucataca, espadahuan na huañuchishachu nishpa, cunanda juramentuhuayari’ nijunmi” ninajurcami.
52Shina villajpimi Salomonga, cashna nirca:
“Pai alita ruraj runa cajpica, paipaj umamandaca shuj ajchallapash na urmangachu. Ashtahuangarin, na alita rurashca ricurijpica, huañungapachami” nircami.
53Jatun mandaj Salomón, Adonías runata pushamuchun cachajpimi, altarmanda pushamurca. Adonías runa ña chayamushpami, jatun mandaj Salomonbaj ñaupajpi urai cumurirca. Chaipimi Salomonga:
“Cambaj huasiman rilla” nishpa cacharca.
Who We AreWhat We EelieveWhat We Do
2025 by iamachristian.org,Inc All rights reserved.
