ESTER 8 - Quichua Imbabura 2016

Jatun Mandaj Asuero, Judá llacta gentecunapaj alita rurashcamanda

1Jatun mandaj Asuero runaca, chai punllallatami Judá llacta gentecunata fiñashca Amán runapaj huasitaca, jatun mandaj Esterman curca. Shinallata, Mardoqueotaca, Esterpaj ayllupura cashcata jatun mandaj yachashpa cayachun cachajpimi, Mardoqueoca, jatun mandajpajman shamurca.

2Chaipimi jatun mandajca, Amán runaman cushca surtijata japishpa, Mardoqueoman curca. Shinallata, Esterca, Mardoqueotami, Amán runapaj huasita ricuchun churarca.

3Esterca, jatun mandajhuan cutin parlangapa tigrashpami, paipaj ñaupajpi huacashpa cungurirca. Shina cungurishpami, Judá llacta gentecunata huañuchingapa munashpa, Agag shuti runapaj mirai Amán runa na alita yarishpa mandashcataca anchuchipai nishpa mañarca.

4Shina nijpimi jatun mandajca, pai charijushca curi varata Esterpaj ñaupajman chutajpi paica, jatun mandajpaj ñaupajpi shayarishpa,

5cashna nijurca:

“Can jatun mandajpaj ñaupajpi ali cajpi, ñuca ali ricurishca cajpi, can jatun mandajpaj ali cana cajpi, can ñucata juyashpaca, Judá llacta gentecunata tucuchinajuchun mandashpa quilcachishpa cachashcata anchuchingapa, shujta quilcashpa cachapailla. Chaitaca, Agag shuti runapaj mirai Hamedata shuti runapaj churi Amán runami, can jatun mandajpaj tucui marcacunapi causajcunaman cacharca.

6Ñuca llacta gentecunata llaquichinajuchunga, ¿imashpata saquipashayari? Ñuca huasi ucupuracunata huañuchishpa tucuchinajuchunga ¿Imashpata saquipashayari?” nijurcami.

7Shina nijpimi jatun mandaj Asuero runaca, jatun mandaj Estermambash, Judá llactamanda Mardoqueomambash, cashna nirca:

“Amán shuti runapaj huasitaca, ñucami Esterman curcani. Chai runataca, Judá llacta gentecunata huañuchingapa munajushcamandami, sipina caspipi huarcuchun mandarcani.

8Judá llacta gentecunapaj ima ashtahuan ali cana cajpipash, jatun mandaj ñuca shutipi cangunallata quilcanguichilla. Chaitaca, jatun mandaj ñucapaj surtijahuan sellanguichilla. Imata rurachun mandashcata jatun mandaj ñuca shutipi quilcashpa, jatun mandaj ñucapaj surtijahuan sellashcataca, pipash na shujman tigrachi ushangachu” nircami.

9Chaimandami, Siván shuti quimsa quillapaj, ishcai chunga quimsa punllapica, jatun mandajpaj quilcajcunata cayarca. Chai runacunaca, Mardoqueo runa imashna mandashcashnami quilcanajurca. Judá llacta gentecunaman, sátrapa mandajcunaman, macanajuj runacunata mandajcunamanmi, India llactamanda, Etiopía llactacaman, patsaj ishcai chunga canchis marcacunaman quilcanajurca. Tucui marcacunamanmi, paicunapaj rimaipi quilcanajurca. Judá llacta gentecunamambash, paicunapaj rimaipimi quilcanajurca.

10Jatun mandaj Asuero runapaj shutipi quilcashpami, pai jatun mandajpaj surtijahuan sellarca. Chai cartacunataca, jatun mandajpaj michina pambacunapi purinajuj, ninanda calpaj caballocunapi tiyarishpa saquigrichunmi cacharca.

11Chai cartacunapica, jatun mandajca tucui pueblocunapi causanajuj, Judá llacta gentecunatami, paicunata ama huañuchinajuchun, jarcaringapa tandanajuchun mandarca. Maijan pueblomanda, marcacunamanda cashpapash, huañuchingapa shamujcunataca, huahuacuna, huarmicuna cajpipash, huañuchishpa tucuchishpa, paicuna imata charishcacunatapash japinguichilla nishpami mandarca.

12Chaitaca shuj punllapillami, jatun mandaj Asuero mandajuj tucui marcacunapica, Adar shuti chunga ishcai quillapaj, chunga quimsa punllapi chashna rurana carca.

13Mandashpa quilcashcata shujman yalichishpa quilcashcataca, tucui gentecuna yachachunmi, imatalla rurachun mandashpa tucui marcacunaman cacharca. Chai mandashcapica, Judá llacta gentecunaca paicunata fiñajcuna llaquichishcashna llaquichingapa, chai punllapaj alichirishcalla cachun nishpami mandarca.

14Jatun mandaj cachajpimi, cartacunata apajcunaca ninanda calpashpa purij caballocunapi tiyarishpa llujshinajurca. Chai mandashpa quilcashcataca, Susa shuti pueblopipashmi cunajurca.

15Mardoqueo runaca, jatun mandajpaj ñaupajmandaca, jatun mandajcuna churajuna, azulhuan, yurajhuan churajunata churajushca, jahualla churajunatapash lino puchata rurashca yana puca churajunata churajushca, umapipash, jatun curi coronata churajushcami llujshirca. Chashnata ricushpami, Susa shuti pueblopi causajcunaca, ninandapacha cushijunajurca.

16Chaimandami Judá llacta gentecunaca, michata ricujshna ninanda cushijunajurca.

17Tucui marcacunapi, pueblocunapi jatun mandaj mandashca maimanlla chayashcapimi, Judá llacta gentecunaca jatun micui punllacunata rurashpa, ninanda cushijunajurca. Chai llactacunapi causaj ashtaca gentecunaca, Judá llacta gentecunata ninanda manllashpami, paicunapash Judá llactapuracuna tucunajurca.