1Mandaj Diosca, cashnami nin:
“Ali yuyaita Ñuca cushcata na chasquishpa, na cazungapa munajcunaca, ¡aij imachari tucunga!
Paicunaca, Ñuca Espíritu yarichijujtapash na cazushpami, pacajunajun.
Chashnami, ashtahuan juchata rurashpa catinajun.
2Ñucataca na tapushpami, Egiptoman urai rinajun.
Faraonbaj ushaihuanmi shinlli tucushun,
Egiptopi causajcunami yanapanga” yashpami, chashna rinajun.
3“Ashtahuangarin Faraonga, shinllichinapa randica, pingaipimi churanga.
Egiptopi causajcuna yanapangami yajpica, ashtahuanmi pandachinga.
4Mandajcuna, Zoán shuti puebloman chayashpapash,
jatun mandajpaj randi parlajcuna Hanes shuti puebloman chayashpapash, pingaichi tucungami.
5Imapallapash na alicuna cajpimi chai gentecunataca, pingaichinga.
Paicunapaca, na ali ricurijpimi na yanapanga.
Ashtahuangarin, na alicachishpa asishpami, pingaichinajunga” ninmi.
6Neguev shuti chaquishca pambapi tiyaj animalcunamandami Diosca, villajun:
“Llaqui japinalla, manllanayai chaquishca pambapimi,
Leonguna, culebracuna, millai culebracuna causan.
Chai pambatami, imatalla juyailla charishcacunata,
burrucunaman, camellocunaman apachishpa,
imapapash na ali pueblocunaman apashpa rinajun” ninmi.
7Egiptopi causaj runacunaca, yangallatami yanapangapa shamunga.
Chaimandami paicunataca: “Ama shamushpa, chaipillata saquirichilla” nishpa caparircani.
8Cunanga, Ñuca rimashcataca,
paicunapaj ñaupajpillata shuj tablapi, shuj libropi quilcagri.
Chashna rurajpimi, jipa punllapajpash, causaita causaicamambash tiyanga.
9Cai gentecunaca na cazuj, llullacunami.
Mandaj Dios Ñuca mandashcatapash, na uyangapa munaj gentecunami carca.
10Paicunaca: “Dios ricuchishcata villachunga, na munashpami jarcanajun.
Shinallata, profetacunatapash, llullashpa villachunmi mandanajun.
Ashtahuangarin, paicuna uyangapa munashcatallami villachun mandanajun.
11Ali ñanmanda, ali causanamandaca anchurinami canguichi.
Israelcunapaj jucha illaj Diosmandaca, na ashtahuan ñucanchiman villanachu canguichi” ninajunmi.
12Chaimandami, Israelcunapaj jucha illaj Diosca, cashna nin:
“Cangunaca, Ñuca jarcashpa rimashcataca na cazushpami,
jatun na alita rurashpa, pitapash ninandapacha llaquichinatalla yariaj causanajunguichi.
Chashna na alita rurashpami, cushijunajunguichi.
13Shinamandami chai juchaca, jatun pata chaupirishpa ña urmashpa tucurinashna tiyajun.
Chai pata chaupirishpa urmashpaca, tucuillatami llapinga.
14Cangunataca, alpa platota faquinshnami, na llaquishpa ñutunga.
Plato ñuturishpaca, tulpamanda ninata surcungapallapash na puchunllu.
Na cashpaca, pugyumanda yacuta surcungapapash na puchunllu” ninmi.
15Israelcunata Mandaj, jucha illaj Jatun Diosca, cashnami nirca:
“Ñuca quishpichishpa ali causaita cujpimi samanguichi.
Ñucata yariashpa causashpami, shinlli tucunguichi nircanimi.
Shina nijpipash, na munashpami causanajunguichi.
16Ashtahuangarin cangunaca: ‘Caballocunapi calpashpa quishpirishunllami’ nircanguichimi.
Canguna nishcashnallata, pacajushpapash calpanguichimi.
Shinallata: ‘Ninanda calpaj caballocunapi calpashunllami’ nircanguichimi.
Ashtahuangarin cangunata catijcunaca, ashtahuan ali calpajcunami canga.
17Shuj runallami cangunataca, huaranga cajpipash manllachishpa calpachinga.
Picha runacunalla manllachijpimi, cangunaca tucuilla calpanguichi.
Urcu pundacamanmi tucuilla calpanguichi.
Lomapi bandera shayajujshna tucungacamanmi, chashna calpanguichi” nircami.
Israelcunataca, Taita Dios llaquina cashcamanda18Mandaj Diosca, ashaguta shuyashpami, cangunataca llaquinga. Shinamandami, Paica jatumbi churai tucunga. Mandaj Diosca, tucuita pactachij Taita Diosmi. Paita yariashpa causajcunaca, tucuicunami ninanda cushijunga.
19Gentecunaca, Sion lomapi tiyaj Jerusalén pueblopimi causanga. Chaipica, na ashtahuan huacai tiyangachu. Cangunata llaquij Diosca juyangami. Canguna huacashpa mañashcamandami llaquinga.
20Jatun Diosca, micunapaj randica ninan llaquita, yacupaj randica huacaita carashpapash, alipajmi chashnaca ruranga. Llaquichijushpapash, cangunata yachachijcunataca, na quichungachu. Ashtahuangarin yachachijcunaca, punllandimi cangunahuan canga.
21Shinamandami, cangunaca cashna nijta uyanguichi: “Cai ñandami catina canguichi. Caimandaca, alimambash, lluquimambash na anchurinachu canguichi” nijtami uyanguichi.
22Shinamandami, culquita rurashca dioscunatapash, curita yacuyachishpa rurashca dioscunapaj churajunatapash yangapi churanguichi. Shina rurashpami, mapa findutashna: “¡Caimanda llujshi!” nishpa, caruta shitanguichi.
23Shina rurajpimi Jatun Diosca, canguna tarpushca pambacunamambash tamiata cachamunga. Chai alpacunapica, juyailla granocunami ninanda fucunga. Chai huatacunapica, cangunapaj animalcunatapash, jihua junda pambacunapimi michinguichi.
24Pambapi yapuj huagracunapash, burrucunapash, palahuan huairachishca, jarnerohuan shushushca, mapa illaj granotami micunajunga.
25Ninanda llaquichijui punllapi torrecunata urmachijujpica, tucui urcu pundacunamanda, tucui jatun lomacunamandami, jatun yacucuna, larca yacucuna llujshishpa urai ringa.
26Lunapash, indishnami rupachijunga. Indipash, cunanbi ricushcamandaca, canchiscaman yalitami rupachijunga. Mandaj Dios agllashca gentecunata alichishpa, Paiman tigrachijui punllapimi, chashna tucunga.
Mandaj Dios, Asiria llactata llaquichinamanda27Mandaj Dios shamujujtaca, carumandami ricunga.
Paipaj ñavipash, tucuita rupachij ninashnami ricujun.
Paipaj shimihuan fiñarishpa rimashcapash, nina rupachishpa tucuchinshnami uyarijun.
28Paipaj samaica, jatun yacu jatarishpa rijujshnami ricurijun.
Paica, tucui llactacunapi causajcunatami, huairachishpa calpachinshna tucuchinga.
Llactacunapi causajcunata pandachingapami, caballocunapaj shimipi huascata churanshna maitapash cachanga.
29Ashtahuangarin cangunaca, pascua micuita rurashpa cushijujshnami, tutacuna candana canguichi.
Gaitata taquishpandi, Mandaj Diospaj lomaman shamujshnami, Israelcunapaj Diospaj ñaupajman shamunguichi.
30Chaipimi, Mandaj Dios shinllitapacha rimashcataca uyanguichi.
Paipaj ninan ushaitapash, chaipimi ricuchinga.
Paica ninanda fiñarishpami, tucuchij ninahuan,
jatun acapanahuan, shinlli tamiahuan, rumita tamiachimushpa tucuchinga.
31Ninanda llaquichishpa causaj Asiria llacta runacunataca,
Mandaj Dios rimashcahuanmi ninanda llaquichishpa tucuchinga.
32Mandaj Dios ninanda llaquichijujpica, tamborcuna, arpacuna huacanajujmi uyaringa.
Taita Diosca, jatun macanajuipimi, paicunahuan macanajunga.
33Asiria llactata jatun mandajta llaquichingapaca, pundamandapachami Tofet shuti jatun hornoshna alichishpa tiyajun.
Chai rupachina ucupica, ashtaca yamdata churashcallami tiyajun.
Mandaj Dios fucushpami chai hornotaca, azufretashna japichinga.
Who We AreWhat We EelieveWhat We Do
2025 by iamachristian.org,Inc All rights reserved.
