NEHEMÍAS 8 - Quichua Imbabura 2016

Esdrasca, Dios mandashcata uyachun quilca catishpa Israelcunaman uyachishcamanda

1Shina cashpami, Israel gentecunaca, yacuman llujshina pungu chimbapura plazapi tandanajurca. Chaipi cashpami, quilcaj Esdrastaca, Moisés mandashpa quilcashca shimicunata apamuchun mañarca. Chaitaca, Mandaj Diosmi Israelcunaman cushca carca.

2Shina nijpimi, sacerdote Esdrasca, tandanajushca jaricunapaj, huarmicunapaj, yuyaita charij tucui gentecunapaj ñaupajman, chai mandashca Shimitaca, canchis quillapaj callari punllapi apamurca.

3Esdras runaca, yacuman llujshina pungu chimbapurapi, paicuna tandanajushca plaza ñaupajpi shayarishpaca, yurajlla punllayajujmanda chaupi punllacamanmi librotaca, yuyaita charij tucuilla gentecunapaj ñaupajpi quilca catirca. Chaitaca, tucuicunami aligutapacha uyanajurca.

4Quilcaj Esdrasca, caspicunahuan rurashca jahuapi shayarishpami, chai librotaca quilca catijurca. Paihuanga, Matatías, Sema, Anías, Urías, Hilcías, Maasías shuti runacunami shayanajurca. Shinallata, Pedaías, Misael, Malquías, Hasum, Hasbadana, Zacarías, Mesulam shuti runacunapashmi shayanajurca.

5Esdrasca, ashtahuan jahuapi shayajushpami, chai librotaca tucuicuna ricujta pascashpa quilca catijpi, tucui gentecuna aliguta uyanajurca.

6Esdrasca, Mandaj jatun Diostami alicachirca. Chaita ricushpami gentecunaca maquita vichai churashpa: “¡Chashna cachun! ¡Chashna cachun!” nishpa, alpapi cungurishpa llaquirishpa, Mandaj Diostaca ninanda alicachinajurca.

7Levitapuramanda: Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán, Pelaía shuti runacunaca, chai mandashcata Israelcunaman aliguta yachachinajujpimi, shuj pushtupilla shayarishpa aliguta uyanajurca.

8Taita Dios mandashcata quilcashca librota, aligutapacha quilca catinajujpimi, tucuicuna yuyaipi japishpa, aligutapacha yachajunajurca.

9Chaita uyashpa, tucui gentecuna huacanajujpimi, mandaj Nehemiaspash, quilcaj Esdraspash, yachachij levitacunapash, cashna ninajurca: “Cunanga, ñucanchita Mandaj Taita Diosman shicanyachishca punlla cashcamandami, na llaquirina, na huacana canguichi” ninajurca.

10Chai jipami, paicunataca cashnatapash nirca: “Cunanga, ñucanchi Jatun Dios, Paipajlla cachun shicanyachishca punlla cashcamanda, vira ali aichata micungapa richi, ali mishqui vinotapash ufiagrichi. Micuna illaj huajchacunamanbash caranami canguichi. Ashtahuangarin, Mandaj Dios ushaita carashcamandami, cushijushpa na llaquirina canguichi” nirca.

11Levitacunapashmi, tucui gentecunata: “Cunanga, Mandaj Dios shicanyachishca punllami. Ama llaquirishpa, upalla caichilla” ninajurca.

12Paicunaman yachachishca shimicunata ali yachajushpami, tucui gentecuna micushpa, ufiashpa, shujcunamambash carashpa ninanda cushijungapa rinajurca.

13Chai cayandi punllami, tucui gentecunapaj huasi ucupuracunata mandajcuna, sacerdotecuna, levitacunaca, mandashca shimicunata ali yachajungapa, quilcaj Esdraspajman tandanajurca.

14Paicunaca, Moisesman Mandaj Dios mandashpa quilcachishcapi, cashna nishcatami tarirca: “Israelcunaca, canchis quillapi jatun cushijuita rurashpaca, malquicunahuan chugllacunata rurashpami causana canguichi” nishcatami ricunajurca.

15Shinallata tucuilla pueblocunapi, Jerusalenbi causajcuna yachachun, cashna nishpa villachun mandashcatami ricunajurca: “Mandashcapi quilcashcashna, chugllacunata rurangapa urcuman llujshishpa, sacha olivo malquicunata, arrayán malquicunata, palmera malquicunata, fanga junda tucui yuracunamanda malquicunata apamuchun” nishcatami ricunajurca.

16Shinamandami gentecuna llujshishpaca, malquicunata apamushpa chugllacunata ruranajurca. Tucuicunami, huasi jahua patiocunapi, huasi patiocunapi, Diospaj huasi patiocunapi, yacuman llujshina pushtupi, Efraín shuti yaicunapipash chugllacunata ruranajurca.

17Chai tucuilla tandanajushcacunaca, prezu apai tucushcamanda tigramushcacunami, chugllacunata rurashpa, chaicunapi tiyanajurca. Israelcunaca, Nun shuti runapaj churi Josué causajui punllacunamanda, cunanbi cutin ruranajushpami ninandapacha cushijunajurca.

18Taita Dios mandashcata quilcashca librotami Esdrasca, callari punllamandapacha canchis punllacaman, punllandi quilca catijurca. Chai jatun cushijuitaca, canchis punllacaman rurashpami, ña pusaj punllapica, imashna rurachun mandashcashna, jatun tandanajuita ruranajurca.