Psalms 85 - Quichua Imbabura 2016

Israelcunata llaquipai nishpa, Diosta mañashcamandaCandajcunata pushaj candachijuchun, Coré shuti runapaj miraicunaman rurashca Salmomi.

1Mandaj Dioslla,

Cambaj llacta gentecunaman alita rurangapami shuyajungui.

Jacobpaj miraicunataca prezu causanajujtami tigrachimushcangui.

2Can agllashca gentecunapaj juchataca perdonarcanguimi.

Paicunapaj tucui juchatami anchuchircangui. Selah

3Ninanda fiñarishcatapash cungarcanguimi.

Ninanda fiñarishca cashpapash, cutinmi ali tucurcangui.

4Ñucanchita quishpichij Taita Dioslla,

cutin ali causaita carahuayari.

Ñucanchi fiñachishcataca, cungapailla.

5¿Ñucanchihuanga, causaita causaicamanllu fiñarishca causagringui?

¿Ñucanchipaj, miraicunatapashchu fiñashpa catigringui?

6¿Nachu ali causaita cutin caragringui?

Can agllashca gentecuna, Canhuan cushijushpa causachunga,

¿nachu cutin ali causaita caragripangui?

7Mandaj Dioslla,

Cambaj ninan juyaita ricuchipayari,

Ñucanchita quishpichihuayari.

8Mandaj Taita Dios rimashcataca uyapashami.

Pai agllashca gentecunamanmi, cushijushpa aliguta causanamanda villashca.

Paicunamanga, ima na alitapash ama rurachun chashna villashca.

9Paita cazushpa causajcuna quishpirina punllami chayamujun.

Paipaj ninan ushai, cai pachapi ricurichunmi chashna tucunga.

10Diospaj ninan juyaica, alita rurajcunahuanmi canga.

Alitalla ruranapash, ali causanapashmi chayamushca.

11Na llullashpa causanami cai pachapica callaringa.

Alitalla ruranami, jahua pachamandaca shamunga.

12Mandaj Diosmi, cai pachataca bendicianga.

Cai pachapica, tucuimi aliguta fucunga.

13Alitalla ruranata yachachishpami pushanga.

Pai ñaupashpami, imashna ali causanatapash yachachinga.