1Filisteocuna, Israelcunahuan macanajungapa shamujpimi, Israelcunaca, filisteocunata pacajushpa calpanajurca. Israelcunataca Gilboa shuti lomapimi huañuchinajurca.
2Filisteocunaca, Saultapash, paipaj churicunatapash catishpami Jonatán, Abinadab, Malquisúa shuti, Saulpaj churicunata huañuchirca.
3Saúl runahuan ninandapacha macanajushpami, Saultaca, flechata cacharijcuna chugrichirca.
4Chaimandami Saulca, macanajushpa jarcarina jirruta apaj runataca: “Cambaj espadahuan huashaman yalijta tujsishpa huañuchihuailla. Circuncisionda na rurashca chai runacuna shamushpa, asishpa ricunajuchunga na munanichu” nirca. Ashtahuangarin, macanajushpa jarcarina jirruta apaj runaca, ninanda manllashpa na huañuchingapa munajpimi, Saulca, paipaj espadata japishpa, chai espada pundapi shitarirca.
5Saúl huañunta ricushpami, jarcarina jirruta apaj runapash, paipaj espada pundapi shitarishpa huañurca.
6Chashnami Saulpash, quimsa paipaj churicunapash, tucuilla paipaj huasi ucupurapash huañurca.
7Pugru pambapi causanajuj Israel gentecunaca, Israelcuna pacajungapa calpanajujta, Saultapash, paipaj churicunapash huañushcata ricushpami, paicuna causanajuj pueblocunata saquishpa rinajurca. Shinamandami, filisteocunaca, chai pueblocunaman shamushpa, chaipi causanajurca.
8Chashna tucushca cayandi punllami filisteocunaca, huañushcacunapaj tucui imalla charishcacunata apangapa shamushpa, Saultaca, paipaj churicunandi, Gilboa urcupi huañushca sirinajujta tarirca.
9Macanajungapa jahualla churajunata llujchichishca jipami, Saulpaj umata fitishpa, paipaj macanajunacunatapash apanajurca. Chai jipaca, filisteocunapaj tucui pueblocunapimi, rurashcalla dioscunapaj huasicunapi, tucui gentecunamambash villachun cachanajurca.
10Shinallata, Saulpaj macanajuna jirrucunataca, paicunapaj dioscunapaj huasipimi churanajurca. Saulpaj umatapash, Dagón shuti diospaj huasipimi huarcunajurca.
11Saulta, filisteocuna chashna rurashcataca, Galaad llacta Jabes pueblopi tucui causajcunami yachaj chayarca.
12Chaimandami, ninan shinlli tucuilla runacuna shamushpa, Saulpaj cuerpotapash, paipaj churicunapaj cuerpotapash, Jabes puebloman apamunajurca. Chaiman apamushpami paicunapaj tullucunataca, chai pueblo canllapi shayajuj encina shuti quiru ucupi pambarca. Chai jipaca, canchis punllacamanmi na micushpa tiyanajurca.
13Mandaj Diosta na cazushpa fiñachishcamandami, Saulca chashna huañurca. Paica, Mandaj Dios mandashca shimicunata na cazushpami, yachaj huarmitara tapugrishca carca.
14Paica, Mandaj Diosta na tapugrishpa juchata rurashcamandami, paipaj causaita quichushpa, Isaí runapaj churi David mandachun curca.
Who We AreWhat We EelieveWhat We Do
2025 by iamachristian.org,Inc All rights reserved.
