JUECES 10 - Quichua Imbabura 2016

Tola shuti, Jair shuti runacunami, Israelcunata mandanajushca

1Abimelec shuti runapaj jipaca, Isacar ayllupura Fúa shuti runapaj churi Tola shuti runami, Israelcunata cacharichingapa jatarirca. Fúa shuti runapaj taitaca, Dodo shutimi carca. Paica, Efraín urcupi Samir shuti pueblopimi causajurca.

2Tola shuti runaca, Israelcunataca ishcai chunga quimsa huatatami mandajurca. Pai huañujpica, Samir shuti pueblopimi pambarca.

3Paipaj catica, Galaad llactapi causaj Jair shuti runami, Israelcunataca ishcai chunga ishcai huatata mandajurca.

4Paica, quimsa chunga churicunata, quimsa chunga burrucunatami charirca. Paipaj churicunaca, chai burrucunapimi tiyarishpa purinajuj carca. Shinallata Galaad llactapipash, quimsa chunga pueblocunatami charirca. Chaicunaca, cunangamanmi Jair shuti runapaj shutihuanllata tiyanajun.

5Jair shuti runa huañujpica, Camón shuti pueblopimi pambarca.

Jefté shuti runami, Israelcunataca cacharichishca

6Israelcunaca, cutinmi Mandaj Diospaj ñaupajpi na alita ruranajurca. Paicunaca, Baal shuti, Astarot shuti dioscunatami alicachinajurca. Shinallata, Siria shuti, Sidón shuti, Moab shuti, Amón shuti llacta dioscunatapash, filisteo gentecunapaj dioscunatapashmi alicachinajurca. Mandaj Diosta cungashpami, Diospajta ruranatapash saquinajurca.

7Chaimandami Mandaj Diosca, ninandapacha Israel gentecunata fiñarishpa filisteo gentecunapaj, Amón llacta gentecunapaj maquipi churarca.

8Paicunami, Israelcunataca, pusaj huatacaman ninanda llaquichishpa causanajurca. Jordán yacu chimbaman tiyaj Galaad llactapi amorreocuna causanajuj tucui Israelcunatapash llaquichishpami charirca.

9Amón llacta gentecunaca, Judapaj, Benjaminbaj, Efrainbaj ayllucunahuan macanajungapami, Jordán yacuta chimbanajurca. Shinami Israelcunaca, ninandapacha llaquichi tucunajurca.

10Chaimandami Israelcunaca, Mandaj Diosta cashna nishpa caparishpa mañanajurca: “Ñucanchica canda na cazushpami, juchata rurashcanchi. Ñucanchi Taita Diosta saquishpami, Baal shuti dioscunatara alicachishpa causashcanchi” ninajurcami.

11Mandaj Diosca, Israelcunataca cashnami nirca: “Egiptopi causajcuna, amorreo gentecuna, Amón llacta gentecuna, filisteocuna,

12Sidón pueblopi causajcuna, amalec shuti llacta gentecuna, Maón shuti pueblopi causajcuna, llaquichinajujpi Ñucata mañajpica, ¿nachu paicunapaj maquimanda quishpichircani?

13Ashtahuangarin, Ñucata saquishpami, shuj dioscunatara alicachircanguichi. Chaimandami, ñucapash cangunataca na cacharichisha.

14Cunanga, cai llaquimanda cacharichichunga, canguna agllashca dioscunata caparishpa mañagrichilla” nircami.

15Israelcunaca, Mandaj Diostaca, cashnami ninajurca: “Juchatami rurashcanchi. Ñucanchitaca, cambaj ima ali cajpipash, chaita rurapailla. Ashtahuangarin, cunanllami, cai llaquimanda cacharichihuai nipanchi” ninajurcami.

16Israelcunaca, paicuna charishca shuj dioscunata anchuchishpami, Mandaj Diospajta ruranajurca. Shinamandami, Israelcuna llaquita apanajujta ricushpa, Taita Diosca llaquirirca.

17Amón llacta gentecunaca, Galaad llactapimi, carpacunata shayachishpa tandanajushpa tiyanajurca. Shinallata, Israelcunapash tandanajushpami, Mizpa shuti pueblopi carpacunata shayachishpa tiyanajurca.

18Chaipimi, Israelcunata mandajcunahuan, Galaad llactapi causajcunahuanga, caishuj chaishuj cashna ninajurca: “Amón llacta gentecunahuan macanajuita maijan callarishpapash, Galaad llactapi causanajuj tucui Israelcunapaj mandajmi tucunga” ninajurcami.