1Ñuca Taita Dioslla,
ñuca Taita Dioslla,
¿imashpata ñucatalla saquihuanguiyari?
¿Imashpata ñuca caparijujta ama uyangapa, caruman rishcanguiyari?
2Ñuca Dioslla,
punllacuna mañajpipash, na uyahuanguichu.
Tutacuna mañajpipash na uyajpimi, na samai ushani.
3Canmi, jucha illaj capangui.
Canga, Israelcuna alicachinajun chaupipimi causajungui.
4Ñucanchi ñaupa taitacunaca, Candami shuyanajurca.
Canda shuyanajujpimi, paicunataca quishpichircangui.
5Canda caparishpa mañajpimi, cacharichircangui.
Canda yariashpa causajcunaca, na pingai tucurcachu.
6Ñucaca runa cashpapash, jurushnami cani.
Gentecunapi na alicachishpa rimai tucushca, na ricunayachi tucushcami cani.
7Ñucataca tucuicunami, asishpa ricunajun.
Shimita vishtushpa, umatapash muyuchishpami, cashna ninajun:
8“Cai runaca, Mandaj Diostami mañashpa causarca.
Chai Diosllata, paitaca cacharichishca cachun.
Mandaj Dioshuanmi causarca.
Paillata quishpichishca cachun” ninajunmi.
9Ashtahuangarin canmi, mamapaj vijsamanda huacharichun saquihuarcangui.
Canmi ñucataca, mamapaj migllapi cajpillata, huacaichihuarcangui.
10Nara huacharijpillatami, Cambaj maquipi mingahuarca.
Ñuca mamapaj vijsapi cashcamandallatami, ñuca Dios cangui.
11Ñucataca ama shitahuaichu, ninan llaquitami apagrijuni.
Pipash ñucata yanapangapaca, na tiyanllu.
12Ñucataca, ashtaca huagracunashnami chaupipi churashca.
Basán llactamanda, millai huagracunashnami chaupipi churashca.
13Millai león huacajunshnami, ñucata llaquichingapa shimita pascashca.
14Yacu talirinshnami tucurijuni.
Ñuca tullucunapash, mucucunapash, tucuillami llujshishca.
Ñuca shungupash, vira yacuyanshnami tucurijuni.
Ñuca vijsa ucupimi chashna tucurijuni.
15Ñuca cungapash chaquishca callanashnami tucushca.
Ñuca jallupash, chaquishpami shimi jahuaman llutarishca.
Ñucataca, huañushpa ñutu alpa tigrachunmi saquishcangui.
16Alcucunashnami, tandanajushpa ñuca muyundipi shayanajun.
Ashtaca na ali gentecunami chaupipi churahuashca.
Maquitapash, chaquitapashmi utujuhuarca.
17Ñuca tullucunapash, yupanallami saquirishca.
Shina cajpimi, paicunaca asishpa ricunajurca.
18Ñuca churajunataca, paipurami chaupirinajurca.
Pipaj urmajta ricungapa rurashpami chaupirinajurca.
19Mandaj Dioslla, ama jichuhuaichu.
Ninanda shinllichishpa, ñucata jarcangapa ucha shamupailla.
20Espadahuan huañuchinamanda, ñucataca cacharichihuai.
Alcushna na ali gentecunapaj maquimanda, ñuca causaitaca cacharichihuai.
21Leonbaj shimimandashna quishpichihuai.
Búfalo huagracunapaj cachucunamandashna quishpichihuai.
22Cambaj shutitaca, tucuicunamanmi villasha.
Paicunapaj chaupipimi, Candaca alicachisha.
23Mandaj Diosta manllajcunaca, Paitami alicachina canguichi.
Jacobmanda miraicunaca, Paitami alicachina canguichi.
Israelmanda miraicunaca, Paitami manllana canguichi.
24Paica, llaquihuan cajpipash, na yangapi churashpa millanayachircachu.
Llaquihuan cashpa mañajpipash, uyahuarcallami.
Paita ninanda mañajpica, yanaparcallami.
25Jatun tandanajuipica, candami jatunyachisha.
Canman cushpa pactachinataca, canda manllajcunapaj ñaupajpimi pactachisha.
26Na jariyashpa causajcunami, na munajta micunajunga.
Mandaj Diosta mascajcunami, jatunyachinajunga.
Paicunami, causaita causanajunga.
27Tucui cai pachapi causajcunami, Mandaj Diosta mascashpa tigrarinajunga.
Cai pachapi causajcunaca, Canda alicachishpami cungurinajunga.
28Tucuita mandanaca, Mandaj Diospajmi.
Cai pachapi causajcunataca, Paimi mandajunga.
29Cai pachapi ninan charijcunami, jatun micuita rurashpa, Paitaca alicachinajunga.
Huañushpa ñutu alpa tigrangapa rijcunapash,
tucuicunami paipaj ñaupajpi cungurinajunga.
Ña huañugrijunpashmi, cunguringa.
30Jipa miraicunami, Mandaj Diospajta ruranajunga.
Mandaj Dios imata rurashcataca, jipa miraicunamanmi villanajunga.
31Pai imatalla alita rurashcatami villanajunga.
Pai tucuita rurashcataca, jipa huacharishca gentecunamanmi villanajunga.
Who We AreWhat We EelieveWhat We Do
2025 by iamachristian.org,Inc All rights reserved.
