JEREMÍAS 15 - Quichua Imbabura 2016

Judá llacta gentecunata, Taita Dios ninandapacha fiñarishcamanda

1Mandaj Diosca, cashnami nihuarca: “Moisespash, Samuelpash, paicunamanda Ñucata mañangapa shamujpica, cai gentecunahuanga napacha ali tucushachu. Paicunataca, Ñuca ñaupajmanda llujshishpa cachai nishami.

2‘¿Maimanda rishunyari?’ nijpica, cashna ningui:

Mandaj Diosca, cashnami nin:

‘Huañuna cashpaca huañungami.

Espadahuan huañuchi tucuna cashpapash, espadahuan huañuchi tucungami.

Yarjaimanda huañuna cashpapash, yarjaimandami huañunga.

Prezu apai tucuna cashpapash, prezu apai tucungami’ ninmi ningui” nihuarcami.

3Mandaj Diosca, paicunamanga chuscu jatun llaquicunatami cachamugrini ninmi: Espadahuan huañuchi tucuchun, alcucunahuan pilai tucuchun, jahuata rij alasyu animalcuna micuchun, sacha animalcuna micuchunmi cachamugrin.

4Shinallata tucui shuj llactacunapi mandajcunata ricushpa, ninanda manllanajuchunmi saquigrini. Paicunataca, Ezequiaspaj churi Manasés, Judá llactata jatun mandaj cashpa, Jerusalenbi na alita rurashpa causashcamandami, chashna tucuchigrini.

5Shina cashpaca, “Jerusalén pueblotaca, ¿pita llaquingayari?

Chashna llaquita apajujpica, ¿pita ali causaita charishcanman yashpa, llaquishpa ricujunga?” ninmi.

6Mandaj Diosca, cashnatapashmi nin:

“Cangunami, Ñucata jichushpa saquihuarcanguichi.

Chaimandami, cangunataca ninanda llaquichishpa tucuchigrini.

Cangunataca, llaquijushpapash, ña shaijunimi.

7Ñuca agllashcacunaca, shuj llactacunaman caita chaita cachajpipash,

huahuacuna illajta saquijpipash, tucuillata tucuchijpipash,

na alita ruranataca napacha saquinllu.

8Mama cucha manñapi t'iyu alpatapash yalimi, cusa illaj huarmicunaca miranajurca.

Mamacunatapash, huahuacunatapash chaupi punllapi huañuchinajuchunmi saquircani.

Chai pueblopica, cungashcapi jatun llaquicuna japichunmi saquircani.

9Canchis huahuacunata charij huarmipash, huañungashnami tucurca.

Paica ninan llaquihuan cashpami, punllapash yana tutapishna causajurca.

Paica imatapash na rurai ushashpami, ninanda llaquirijurca.

Paipaj huahuacuna puchushcatapash, fiñajcuna espadahuan huañuchijunajuchunmi saquisha” ninmi Mandaj Diosca.

10¡Ñuca mamitalla, imashi tucusha!

Ñucataca, tucui llactapi causajcunahuan fiñanajushpa causachunmi charihuashcangui.

Ñucaca, imatapash na mañachishcanichu.

Ñucapash na imatapash mañashcanichu.

Ashtahuangarin ñucataca tucuicunami, ima llaquipash japishpachari ali canman ninajuhuan.

11¡Mandaj Dioslla, ñucata fiñajcuna ninan llaquihuan cajpi,

paicunamanda ñuca na mañashca cajpica,

ñucata fiñajcuna ñucata llaqui japichun nishcashna pactashca cachun!

12“Janaj llactamanda shamunajuj, jirrushna, bronceshna gentecunataca,

¿pipash mishashpa tucuchi ushangachu?

13Can imatalla charishcacunatapash shuhuashpa apanajuchunmi saquisha.

Cai llactapi, canguna juchata rurashcamandami chashna llaquichisha.

14Cangunata fiñajcunapaj gañan tucushpa causachunmi caru llactaman cachagrini.

Cangunataca, ninandapacha fiñarishpami, nina rupajujshna tucuchigrini” ninmi.

Mandaj Dios, Jeremiasta shinllichishcamanda

15Mandaj Dioslla, ñucataca yarishpa ricuj shamuhuayari.

Ñucata fiñajcunataca, ñucata llaquichishcashnallata llaquichipayari.

Ama ashtahuan fiñashpa llaquichihuaichu.

Canda catijuimanda, llaquita apajujtaca yachapanguimi.

16Can rimajujta uyashpaca, tucuita pactachingapami chasquircani.

Cambaj rimashca Shimicunami, ñucataca ninandapacha cushichihuarca.

Tucuita Mandaj Dioslla, Can ñucata agllashcamandami, chashna cushijuni.

17Na alicachishpa rimajcunahuanga, na tandanajurcanichu.

Can ima nishcata villaj cashcamandapash, na jariyarcanichu.

Can ninanda fiñarishcatapash yacharcanimi.

18¿Imashpata cai nanaihuanlla causajuni?

Ñuca nanaipaca, ¿Nachu jambi tiyanga?

¿Ñucapaca, yacu ricurishpa chinganshnachu cagringui? nircanimi.

19Shina nijpimi Mandaj Diosca, cashna nihuarca:

“Ñucata tucui shunguhuan catijpimi, candaca alichisha.

Chaita pactachishpaca, Ñuca ñaupajpimi causangui.

Yanga parlocunata saquishpa, ali shimicunatalla parlashpaca, Ñuca ima nishcatapash cutin villanguimi.

Canga, na paicunata catinachu cangui. Paicunami, cambajman tigramunga.

20Candaca, cai gentecunapaj ñaupajpica, broncehuan rurashca jatun pircashna cachunmi churasha.

Canhuan macanajungapa shayarishpapash, napacha mishai ushangachu.

Canda yanapangapaca Ñucallatami canhuan casha. Mandaj Dios Ñucami, chashna nini.

21Na alita ruraj runacunamandaca, huacaichishami.

Ninanda llaquichij runacunapaj maquimandaca quishpichishami” nihuarcami.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help