1 SAMUEL 18 - Quichua Imbabura 2016

Jonatanhuan, Davidhuan ali cumba cashcamanda

1Davidhuan Saulhuan tucuita parlashpa tucuchinhuanmi, Jonatanbaj Davidpaj shungucunaca shujllashnalla causangapa yari callarirca. Shina cashpami Jonatanhuan, Davidhuanga shujllashnalla juyarishpa causaj callarirca.

2Saulca, chai punllamandapachami Davidtaca, paipajta rurashpa causachun churashpa, paipaj taitapaj huasimanga na tigrachun saquirca.

3Chaipimi Jonatanga, ali cumbacuna cangapa nishpa, Davidhuan ari nirinajurca. Jonatanhuan, Davidhuanga shujllashnalla juyarishpami causanajurca.

4Chai jipami Jonatanga, jahualla pai churajushcata llujchishpa, Davidman cararca. Ashtahuan shuj churajunacunatapash, paipaj espadatapash, pai macanajuna arcotapash, pai chumbilirina caratapashmi cararca.

5Davidca, Saúl maiman cachajpipash rinllami carca. Pai imata ruranapipash, aligutapacha yarishpa pactachijpimi, Saulca, macanajuj runacunata mandaj cachun churarca. Shinamandami Davidca, tucui gentecunapipash, Saulman rurajcunapaj ricuipipash, alipacha ricurirca.

Davidta, tucuicuna juyajpi Saúl fiñarishcamanda

6Chai filisteo runata David huañuchishca jipa tigramujpimi, Israel llactapi causaj huarmicunaca, taquishpa, tushushpa, jatun mandaj Saulta chasquingapa llujshinajurca. Paicunaca panderocunahuan, cushijushpa taquicunahuan, shuj taquinacunahuanmi llujshinajurca.

7Taquishpa, tushushpami, chai huarmicunaca cashna ninajurca:

“Saulca, huaranga runacunatami huañuchishca.

Davidca, chunga huaranga runacunatami huañuchishca” ninajurcami.

8Chashna ninajujta Saúl uyashpami, ninandapacha na alicachishpa, fiñarishpa cashna nijurca: “Davidtaca, chunga huaranga runacunata huañuchishca ninajunmi. Ashtahuangarin ñucataca, shuj huaranga runacunatalla huañuchishca ninajunmi. Chashna ninajushpaca, ñallami llactata mandachun churanga” nijurcami.

9Chai punllamandami Saulca, Davidtaca fiñashpa ricui callarirca.

10Cayandi punllami: Taita Diosllata saquijpi, shuj na ali espíritu Saultaca japirca. Chaimandami Saulca, pai mandashpa tiyajuj huasi ucupica, muspashpa, maitapash nirijurca. Chaimandami Davidca, caishuj punllacunashnallata arpata taquijurca. Ashtahuangarin Saulca, tucsina jirruta chaririyajmi tiyajurca.

11Saulca, tucsina jirruhuan shitashpa, pircaman yalijta Davidta cusha yashpami, shitarca. Ashtahuangarin Davidca, ishcaicamanmi anchurishpa yalichirca.

12Ashtahuangarin Saulca, Mandaj Dios paimanda anchurishpa, Davidhuan cajta ricushpami, manllarca.

13Chaimandami Saulca, Davidtaca paipaj ñaupajmanda caruyachun nishpa, huaranga macanajuj runacunata mandaj cachun churarca. Shina churajpimi Davidca, gentecuna ricujta rishpa, cutin tigramushpa purijurca.

14Davidca, tucuitami alipacha yarishpa pactachin carca. Shinallata Mandaj Diospash, paihuanmi carca.

15Imata ruranapipash alipacha yarishpa rurajujta Saúl ricushpami, Davidtaca ashtahuan manllajurca.

16Ashtahuangarin tucui Israelcunapash, Judá llactapi causajcunapashmi, Davidtaca juyan carca. Paica, paicuna ricujta rishpa cutin tigramushpami purijurca.

17Chaimandami Saulca, Davidtaca cashna nirca: “Ricui, Merab shuti ñuca paya ushitaca, cambaj huarmi cachunmi cugrini. Canga, shinllipacha shayarishpami, Mandaj Diosmandaca macanajuna cangui” nircami. Saulca: “Davidtaca, ñuca maquihuanga na huañuchishachu, ashtahuangarin filisteocunapaj maquipimi huañunga” yashpami, chashna nijurca.

18Shina nijpimi Davidca, Saultaca cashna nirca: “Jatun mandajpaj masha tucungapaca, ¿ñucaca pita cani? ¿Na cashpaca, ñuca causaipash, ñuca taitapaj ayllupash, Israelpurapica imata capan?” nircami.

19Ashtahuangarin Saulpaj ushi Merab shuti cuitsata, Davidhuan cazarachina punlla pactajpica, Davidhuanga na cazarachishpami, Mehola shuti pueblopi causajuj Adriel shuti runahuan cazarachirca.

20Shina cajpipash, Saulpaj jipa ushi Micalmi, Davidtaca ninanda juyan carca. Chaita Saulman parlajpimi, shina cashpaca alimi yajurca.

21Chaimandami Saulca: “Cunangarimbash, filisteocunapaj maquipi churangapa cazarachishallami” yajurcami. Chaimandami cutinllata Saulca, Davidtaca: “Cunan punllami, ñuca masha tucugringui” nirca.

22Saulca, paipajta rurajcunatami, cashna nigrichun yachachirca: “Davidhuan cashna nishpa pacalla parlagrichi: ‘Ricui, jatun mandajpash candaca juyanmi, tucuilla paipajta rurajcunapashmi candaca ninanda juyanchi. Jatun mandajpaj masha tucuilla’ nigrichi” nirca.

23Saulpajta rurajcunaca, cai shimicunatami Davidman parlagrirca. Chaita parlajpimi paica cashna nirca: “¿Jatun mandajpaj masha tucunaca, na imapash canllu yashpachu shamunguichi? Ñucaca, imagutapash na charij, pipash na alicachijpi causajuj runamari cani” nircami.

24Shina nijpimi, Saulpajta rurajcunaca: “Davidca, cashnami nirca” nishpa, Saulman villanajurca.

25Shina villajpimi Saulca, cashna nirca: “Davidtaca cashna nichi: ‘Jatun mandajca, shuj huarmimanda imatalla carana cashcataca na mañajunllu. Ashtahuangarin, jatun mandajta fiñajcuna llaquichishcamanda, chashnallata llaquichingapaca, patsaj filisteocunata huañuchishcata yachangapa, capashcata apamuchunmi mañajun’ nigrichi” nijurcami. Ashtahuangarin Saulca, Davidtaca filisteocuna huañuchinajuchun yashpami, chashna nijurca.

26Saulpajta rurajcuna, Davidman villashca shimicunaca, alimi uyarirca. Chaimandami, jatun mandajpaj masha tucusha yajurca. Chaita rurachun, Saúl mandashca punlla nara pactajpillatami,

27Davidca, paipaj macanajuj runacunata pushashpa rirca. Shina rishpami Davidca, ishcai patsaj filisteocunata huañuchishpa, chaita yachachun, capashcata apashpa shamurca. Chaicunataca, tucuillatami jatun mandajman curca. Davidca, jatun mandajpaj masha tucungapami, tucuita pactachirca. Chaimandami Saulca, paipaj ushi Micalhuan cazarachirca.

28Ashtahuangarin Saulca, Davidtaca, Mandaj Dios paihuan cajtapash, paipaj ushi Micalpash ninanda juyajtapashmi ricurca.

29Shinamandami Davidtaca, ashtahuan manllarca. Saulca, tucui paipaj causaipimi Davidtaca ninanda fiñashpa ricurca.

30Filisteocunata mandajcunami, macanajungapa llujshimurca. Ima punlla macanajungapa chashna llujshimujpipash, Saulpajta ruraj caishuj runacunatapash yalimi Davidca, tucuita mishaj carca. Chaimandami paitaca, tucuicuna ashtahuan alicachij carca.