Psalms 92 - Quichua Imbabura 2016

Taita Diosta alicachishpa candashcamandaSamana punllapi candana Salmomi.

1Mandaj Dioslla,

Canda alicachinaca aligumari.

Jahua pacha Dioslla,

Cambaj shutitaca salmocunahuanmi alicachishun.

2Tutamandatami, Can ninanda juyajujtaca villajusha.

Tutacunami, Can tucuita pactachij cajtaca villajusha.

3Decacordiohuan, salteriohuambashmi alicachisha.

Arpahuan juyaillaguta taquishpami alicachisha.

4Mandaj Dioslla,

Canmi tucuita rurashpa cushichihuashcangui.

Cambaj maquihuan rurashcata ricushpami, ninanda cushijuni.

5¡Mandaj Dioslla,

Can imata rurashcacunaca ninan juyaillagumari!

Cambaj yuyaicunaca, pipash na yachai ushanallamari.

6Shinlli shungu runaca, caicunataca napacha yachai ushangachu.

Juizu illaj runaca, chaitaca napacha yuyaipi japi ushangachu.

7Diosta na manllaj gentecunaca, jihuashnami mirashca.

Na alita ruraj gentecunaca sisajunshna, tucuipimi ali rinajun.

Paicunaca, causaita causaicamanmi tucuchi tucunga.

8Ashtahuangarin Mandaj Dioslla,

canga causaita causaicaman, jahua pacha Diosmi capangui.

9Mandaj Dioslla,

Canda fiñajcunaca caipimi causanajun.

Paicunaca, huañushpami tucuringa.

Na alita rurajcunaca, caita chaitami calpachi tucunga.

10Ashtahuangarin, búfalo huagramanshnami ushaita caragrihuangui.

Mushuj aceiteta talishpami javi tucusha.

11Ñucata fiñajcuna mishai tucujtami ricusha.

Ñucata fiñashpa jatarijcuna, manllarishpa caparijtami uyasha.

12Alitalla ruraj runaca, palmera quirushnami sisajunga.

Líbano urcupi tiyaj cedro quirushnami viñajunga.

13Paicunaca, Mandaj Diospaj huasipi tarpushcashnami canga.

Ñucanchi Taita Diospaj huasi patiocunapi sisajujshnami canga.

14Ña rucugu cashpapash, fucujujlla yurashnami canga.

Paicunaca shinllipacha, verde yuracunashnami canga.

15Paicunaca: “Mandaj Diosca, ñucanchita shinllichij,

alitalla ruraj Diosmi” ninajungami.