1Mandaj Dioslla, ñucanchi llaquita apashcataca yaripanguiyari.
Ñucanchita na alicachishpa rimanajujtaca ricupanguiyari.
2Ñucanchi alpataca, na rijsishca gentecunami apashca.
Ñucanchi huasicunatapash, shuj gentecunami apashca.
3Taita mama illaj jichushca, huahuacunashnami canchi.
Ñucanchi mamacunapash, sapalla huarmicunashnami saquirishca.
4Ñucanchica yacutapash, culquipa randishpami ufianchi.
Yamdatapash culquipami randinajunchi.
5Ñucanchitaca catiriyashpami, ninanda llaquichinajun.
Maipi samaitapash na ushashpami ninanda, shaijushca purinajunchi.
6Micunagutapash, Egipto llacta gentecunata, Asiria llacta gentecunatami,
maquita vichai churashpa mañanajunchi.
7Ñucanchi taitacunaca, juchata rurashcamandami huañushca.
Paicunamandami, ñucanchipash llaquita apanajunchi.
8Ñucanchi gañangunara, mandajpimi causanajunchi.
Paicunapaj maquimanda cacharichingapaca, pipash na tiyanllu.
9Huañuchinalla ñangunatami, micunaguta aparishpa shamunchi.
Jichushca pambacunapi causajcunapaj chaupitami yalimunchi.
10Yarjaimanda tulluyashpami chaquirinajurcanchi.
11Sion pueblomanda huarmicunataca ninandami llaquichirca.
Judá llactamanda cuitsacunatapash, chashnallatami llaquichirca.
12Cati mandajcunataca, maquicunata huatashpami huarcurca.
Rucu taitacunatapash, ninandami llaquichirca.
13Chairalla viñaicunataca, rumicunapi cutashpa causachunmi aparca.
Huambracunapash, yamdata aparinajushpallatami huañurca.
14Pueblo pungucunapica, pushaj rucucunapash illarcami.
Chairalla viñaicuna taquinapash tucurircami.
15Ñucanchi cushijushpa causanaca tucurircami.
Ñucanchi cushijushpa tushunapash tucurircami.
16Mandangapa umapi churajushca coronapash urmarcami.
¡Aij, ñucanchica, imashpacha juchata rurashpa causarcanchi!
17Chaimandami ninan llaquicunahuan causanajunchi.
Ñucanchi ñavicunapash, ninan llaquicunahuanmi ñausashna canchi.
18Sion lomapash shitashcami saquirishca.
Atujcunallami chaipica causanajun.
19Mandaj Dioslla, Canmi causaita causaicaman mandajungui.
Can mandashpa tiyajunaca, napacha tucuringachu.
20¿Imamandata ñucanchitaca, cashna shitashpa saquingui?
¿Imamandata cai tucui huatacunataca jichushpa saquingui?
21Mandaj Dioslla, ñucanchitaca cambajman tigrachun, cutin cayashpa chasquihuailla.
Ñucanchitaca punda juyashpa chasquishcashna, cutin juyashpa chasquihuailla.
22Ñucanchitaca shitashpami saquishcangui.
Ñucanchitaca ninandapacha fiñashpami shitashcangui.
Who We AreWhat We EelieveWhat We Do
2025 by iamachristian.org,Inc All rights reserved.
