2 TIMOTEO 2 - Quichua Imbabura 2016

Jesucristopaj alipacha macanajuj canamanda

1Canga ñuca churishnami cangui. Cristo Jesusmanda, Taita Dios caramushca juyaihuan, shinlli tucushpa catingui ninimi.

2Ñuca, canman ashtaca gentecunapaj ñaupajpi yachachishcataca, shujcunaman yachachishpa cati ushana, ali crijcunamanmi yachachina cangui.

3Canga, Jesucristopaj alipacha macanajuj runashnami llaquicunataca apajunalla cangui.

4Pipash macanajuj tucushpaca, na imatapash shujta rurashpami, paita agllaj alicachishpa chasquichun tucuita ruran.

5Shinallata, calpaj runapash, imashna calpachun mandashcata pactachishpallami mishai ushan.

6Shinallata, tarpuj runapash, granota japingapaca, alpatarami pundaca alichinata charin.

7Ñuca yachachishcataca aliguta uyangui. Apunchi Jesusmi canmanga, tucuita yuyaipi japichun ushaita caranga.

8Ñaupa taita Davidpaj mirai Jesucristomi, quishpirinamanda ñuca villashcashna, huañushcacunapaj chaupimanda causarirca. Chaitaca yarinami cangui.

9Chaita villajuimandami, huañuchij na ali runashna llaquicunata apashpa prezu tiyajuni. Shina cajpipash, Diospaj Shimitaca na prezui ushangachu.

10Dios agllashcacunata juyaimandami chashna llaquicunataca apajunilla. Paicunapash, Jesucristopaj ushaihuan quishpichijpi, causaita causagrinata charichunmi chashna llaquita apajunilla.

11Napacha llulla shimicunaca caicunami:

Paihuan huañushca cashpaca, Paihuanllatami causajgrishun.

12Llaquicunata apanajushpaca, Paihuanmi mandagrishun.

Paita na rijsinichu nijpica,

Paipash ñucanchitaca na rijsinichu ningami.

13Pai mandashcata ñucanchi na pactachijpipash,

Paica tucuita pactachijunllami.

Pai ari nishcataca tucuitami pactachinga.

Diospajta rurashpa alipacha pactachij canamanda

14Paicunataca, ama fiñanajushpa, ama rimarishpa causanajuchun, Diospaj ñaupajpi caita yarichishpa, shinllita rimashpa yachachingui. Chai rimarinacunaca, imapapash na ali cashpami, uyajcunataca chingaita chingaiman apanga.

15Taita Dios alicachishpa chasquichunmi, alitapacha yarishpa Paipajta rurana cangui. Shinallata, Paipaj ñaupajpi ama pingai tucungapami, Diospaj shimitaca aligutapacha yachachina cangui.

16Diosta na alicachishpa parlashcacunata, yanga parlocunataca amapacha uyanguichu. Chaicunaca, ashtahuan ashtahuanmi na aliman apanga.

17Chai na ali shimicunaca, ismuchij ungüishnami mirashpa catin. Himeneopash, Filetopashmi chashna llaqui tucushca.

18Paicunaca, na llullashpa villajuj Shimita saquishpami, “huañushpa causarinaca ñami pactashpa yalishca” nishpa, huaquin crijcunataca pandachinajun.

19Ashtahuangarin, Taita Diospaj Shimica, huasichingapa mulun rumishna shinlli cashpami, cashna sellashca tiyajun: “Taita Diosca, Paipaj huahuacunataca rijsinmi. Cristopaj shutipi rimajcunaca, na alita ruranamandaca tucuicunami anchurina canguichi” nijunmi.

20Shuj jatun huasipica, curita, culquita rurashcacuna tiyashpapash, alpata, caspita rurashcacunapashmi tiyan. Chaicunamanda huaquingunaca, ashtahuan ali ruraicunapajmi, cutin caishujcunaca, yangalla ruraicunapajmi.

21Shina cashcamanda, chai na alicunamanda anchurijcunaca, juyailla ruranacunapaj alipacha cajpi, Taita Dios shicanyachishcacunami canga. Paicunaca, tucui alita rurangapa alichishcami canga.

22Shinallata, chairalla viñaicuna na alita ruranamandaca anchurinami cangui. Shina cashpami, alitalla rurashpa, crishpa, juyaita charishpa, cushi causaita charishpa, ali shunguhuan, Apunchi Jesusta mañashpa causajcunahuan tandanajushpa catina cangui.

23Shinallata, imapapash na ali, yanga parlocunataca na uyanachu cangui. Chaicunaca, fiñanajuimanlla apaj cashcataca ña yachanguimi.

24Taita Diospajta rurashpa causajcunaca, pihuambash na fiñanajushpami, tucuicunahuan juyaita charishpa, Diospaj shimita yachachishpa, ima llaquicunatapash apashpa causanga.

25Na cazungapa munajcunatapash, ali shunguhuanmi yachachina cangui. Chashna yachachijpica, Taita Dios yarichijpi llaquirishpa, na llullaj Shimita crishpa yachajungapashchari.

26Shinallata, paipaj munashcata rurachun huatashcashna diablo charijujmanda quishpirichunmi chashna yachachina cangui.