1 PEDRO 2 - Quichua Imbabura 2016

1Shinamandami, tucui na alita ruranata, llullashpa umachinata, mishqui shimi jayaj shungu canata, shujcuna imata charishcata munanata, shujcunata na alicachishpa parlanatapash, tucuita saquishpa,

2llullu huahuacuna, na chapushca lecheta ninanda munajshna, imahuambash na chapushca Diospaj shimita mascana canguichi. Shina cashpami, quishpirishpa causaipi, ashtahuan viñashpa catinguichi.

3Apunchi Jesús ninanda juyajujta chasquishca cashpallami, chashna causaitaca ushanguichi.

Cristoca, causaj rumishna cashcamanda

4Causaita caraj rumi cajpimi, Jesuspajman quimirina canguichi. Gentecuna na ricunayachishpa shitajpipash, Taita Diosca ninanda alicachishpami agllarca.

5Cangunapash, causaj rumicunashnami canguichi. Dios causana huasita huasichina rumicunashna cashpami, jucha illaj sacerdotecunapash canguichi. Shina cashpami, Jesucristomandaca, cangunapash, Taita Dios alicachishpa chasquijpi causana canguichi.

6Chaimandami, Dios quilcachishcapipash cashna nijun:

“Agllashca juyailla rumitami,

Sion pueblopica, huasi pirca callari tigranapi churani.

Pipash, Paita crishpaca na pingaichi tucungachu” nijunmi.

7Cristota crijcunallami, chai rumi juyaillagu cajtaca yachanchi. Ashtahuangarin, Paita na crijcunapaca:

“Huasichijcuna na munashpa shitashca rumillatami,

huasi pirca tigranapi churana ashtahuan jatun rumi tucushca” nijunmi.

8Shinallata:

“Chai rumillatami, nitijachij rumishna cashpa,

urmachij jatun rumipash tucushca” nijunmi.

Na cazujcuna cashpami, Diospaj Shimihuanllata nitijajshna pandarinajun. Paicunataca, Diosllatami maiman rina cashcaman richun, chashna saquishca.

Taita Dios agllashcacunami canguichi

9Ashtahuangarin cangunaca, Dios agllashca miraicuna, Jatun Diospaj sacerdotecuna, jucha illaj llacta cachun Taita Dios randishcacunami canguichi. Yana tutapishna causanajushcamanda, juyailla punchapamba michaman llujshishpa,Taita Dios juyailla rurashcacunata villachunmi cangunataca cayarca.

10Cangunapash pundaca, na Diospaj huahuacunachu carcanguichi. Ashtahuangarin cunanga, Taita Diospaj huahuacunami canguichi. Pundaca, Diospash na llaquijpimi causarcanguichi. Ashtahuangarin cunanga, Dios ninanda llaquijpimi causanguichi.

Taita Diospajta ruranamanda

11Juyashca crijcuna, cangunataca, caru llactamanda shamushca gentecunatashna, ashacamanlla caipi causanajuj gentecunatashnami, cashna nijuni: Cangunapaj almata llaquichingapa na ali munaicuna shamujpica, mishanami canguichi ninimi.

12Diosta na cazujcunapaj ñaupajpica, aligutami causana canguichi. Cangunata na alicachij gentecuna, canguna alita rurashpa causajta ricushpa, Jatun Dios shamui punllapi, Paita ninanda alicachinajuchunmi, chashna causana canguichi.

13Apunchi Jesusta cazujcuna cashpami, cai pachapi mandashpa churashcatapash, jatun mandajtapash cazuna canguichi.

14Paicunaca, na alita rurajcunataca llaquinajuchun, alita rurajcunataca alicachinajuchunmi, cati mandajcunata churashca.

15Shinallata, canguna tucuita aliguta ruranajujpi, imatapash na yachaj, na cazungapa munaj gentecuna, cangunata ama imatapash ni ushachunmi,Taita Diosca munan.

16Huatashcashna causanamandaca ñami cacharichi tucushca canguichi. Shina cashpapash, yangata na alitara ruranguichiman. Ashtahuangarin, Taita Diospajtami rurashpa causana canguichi.

17Tucuicunatami alicachina canguichi. Crijcunapurapash, juyarinami canguichi. Taita Diostaca manllanami canguichi. Jatun mandajtapash alicachinami canguichi.

18Gañanguna, mandajcuna imata mandajpipash, tucuipimi cazuna canguichi. Mandajcunataca, yuyashpa aliguta charijcunatapash, millaicunatapash cazunami canguichi.

19Taita Diospaj ñaupajpi, aliguta yarishpa causanajujpipash, yangamanda ninanda llaquichijpica, Taita Diosllatami, cangunataca ninanda alicachishpa chasquinga.

20Juchata rurashcamanda llaquita apajushpaca, ¿ima alita cangayari? Ashtahuangarin, aliguta rurashcamanda llaquita apajujpimi, Taita Diosca alicachishpa chasquinga.

21Chashna ali causangapami cayai tucushca canguichi. Cristoca, Paita catichunmi, ñucanchimandaca llaquita apashpa huañurca.

22Cristoca, ima juchatapash na rurarcachu. Shinallata, ima llulla shimicunatapash na rimarcachu.

23“Imapash tucushpami ali canman” ninajujpipash, na chashnallata tigrachircachu. Llaquichijpipash, na tigrachishpa llaquichircachu. Ashtahuangarin, alitalla ruraj Dios ricuchunmi saquirca.

24Cristomi, ñucanchi juchacunata aparishpa, Pai juchayu cashcashna, cruzpi chacatai tucurca. Ñucanchica, ama ashtahuan juchata rurashpa, juchapaca huañushcashna cashpa, alitalla rurashpa causachunmi chashna huañurca. Paita chugrichishcamandami, ñucanchica ali tucushca canchi.

25Cangunaca, chingashca llamacunashnami carcanguichi. Ashtahuangarin cunanga, cangunata Michij Cristopaj ñaupajmanmi tigrashcanguichi.