2 CORINTIOS 11 - Quichua Imbabura 2016

1¡Asha juizu illajshna rimajujpipash, uyahuaichilla! Ari, uyahuaichilla nipanimi.

2Taita Diosca, Paipajlla causachunmi munan. Shinallatami, ñucapash, cangunataca, jarihuan na ima tucushca cuitsata, shujlla cusahuan cazarachijshna, Cristopajman pushamurcani.

3Ashtahuangarin, umachinata alipacha yachaj culebra, Eva huarmita umachishcashna, cangunatapash umachinga yashpami manllani. Cangunataca, Cristota na tucui shunguhuan juyashpa chingagrinatami manllani.

4Cangunaca, Jesusmanda ñucanchi villashca jahuami, maijambash nij tucushpalla Jesusmanda llullashpa villajtara chasquinguichi. Shinallata, Diospaj Espirituta chasquishca jahuami, shuj espiritutapash chasquinajunguichi. Quishpirinamanda villanata chasquishca jahuapashmi, shujtara alicachishpa uyanajunguichi.

5Chai ali yachajushca apostolcunaca, na ñucata ashtahuan yali yachajushcacunachu yajunimi.

6Alipacha rimaita na ushaj cashpapash, alipacha yachajushcami cani. Chaitaca imata rurashpapash, tucuipimi ricuchircanchi.

7Canguna jatunyachi tucuchunmi, na jatun tucushpa villajurcani. Shinallata, Taita Dios quishpichijushcataca, imatapash na mañashpami villajurcani. Chaita rurashpaca, ¿juchatachu rurarcani?

8Shuj llactapi tandanajuj crijcuna culquita carajpimi, cangunaman villangapa shamurcani.

9Cangunahuan cashpaca, ñucapaj imagu illashpapash, cangunataca na mañarcanichu. Ashtahuangarin, Macedonia llactamanda shamuj huauquicunami, imagu illajpipash carahuarca. Shinamandami, yalishca punllacunapipash na fiñachircani, jipa punllacunapipash shinallatami na fiñachingapa munani.

10Cristo na llullaj cajta, ñuca shungupi yachashpa, ninanda cushijushpa villajujtaca, Acaya llactapi causajcunaca, pipash na jarcai ushangachu.

11¿Imashpata cashna nijuni? ¿Cangunata na juyashpachu, cashna nijuni? Cangunata ñuca juyajujtaca, Taita Diospash yachanmi.

12Cunangaman imashna rurajushcashnallatami rurashpa catisha. Shina cashpami, shujcuna villashpa purijcunataca na ñucanchishnalla cajta ricuchishun.

13Chaicunaca llulla apostolcunami, umachishpa pandata yachachijcunami. Cristopaj apostolcunashnalla tucushpa purijcunami.

14Chashnata ricushpapash, na manllarinachu canguichi. Satanaspash, paillata punchapamba angelshna tucushpa ricurinllami.

15Shina cajpimi, Satanaspajta rurajcunapash, alitalla rurajcunashna purinajun. Chaitaca, na manllarinachu canguichi. Chashnacunaca, tucurimui punllapimi imata rurashcamandapash, ninanda llaquichi tucunga.

Apóstol cashpami, Pabloca llaquita apajushca

16Cutinmi cashna nijuni. Pipash ñucataca juizu illajmi nichunga na munanichu. Na cashpaca, ñucapash ashaguta jariyangapaca, juizu illajtashna chasquihuaichilla.

17Apunchi Jesús mandashcataca na nijunichu. Ashtahuangarin, ñuca jariyangapa munashpallami juizu illajshna nijuni.

18Ashtacacunami, paicunallata alicachirinajun. Ñucapash ¿nachu chashnallata alicachiri ushani?

19Cangunaca, ali yachajushcacuna cashpapash, shinlli shungu runacunataca, alicachishpa uyanajunguichillami.

20Shina cashpami, cangunataca gañandashna mandajpipash, langajshna tucuchijpipash, shuhuashpa quichujpipash, jatun tucushpa ñavipi huajtajpipash, imatapash na nishpa maijandapash chasquijllacuna canguichi.

21Ñucanchipash chaitaca ruranallami carcanchi, shina cashpapash, na rurai ushashca cashpami, chaitaca ningapapash pinganayan. Ashtahuangarin shujcunaca, imahuambash jariyajpimi, ñucapash chashnallata rurangapa munani (caitaca, juizu illajshnami nijuni).

22¿Paicunaca hebreocunachu? Ñucapash chaillatami cani. ¿Paicunaca Israelcunachu? Ñucapash chaillatami cani. ¿Paicunaca Abrahambaj miraicunachu? Ñucapash chaillatami cani.

23¿Paicunaca, Cristopajta rurajcunachu? Ñucacarin ashtahuanmi cani (caitaca juizu illajshnami nijuni). Ñucami, paicunatapash yali ashtahuan Cristopajtaca rurashpa asti tucurcani, prezuna huasicunapi churai tucurcani. Tauca cutinmi ñalla huañuchi tucurcani.

24Picha cutinmi, judiocunaca, quimsa chunga iscungaman astihuarca.

25Quimsa cutinmi, caspicunahuan asti tucurcani. Shuj cutinga, rumicunahuanmi huañuchingapa munahuarca. Quimsa cutinmi, ñuca rijuj barcopash yacupi huashajushpa chingarca. Shina huashajujpica shuj tuta, shuj punllatami mama cucha jahuapi huambujurcani.

26Tauca cutinmi ñangunapi huañuchinga yashpa manllajurcani. Shinallata, jatun yacucunapi huañunata, shuhuacuna llaquichinatapash, ñuca llacta gentecuna cashpa, shuj llacta gentecuna cashpapash, llaquichinga yashpami manllajurcani. Pueblocunapipash, jichushca pambacunapipash, mama cuchapipash, huañuna manllaihuanmi purijurcani. Crijmi canchi nij tucushcacunahuan cashpapashmi manllarcani.

27Ninanda shaijungacamanmi, imatapash rurajurcani. Tauca tutacunatami na puñushpa pacarircani. Yarjaihuambash, yacunayaihuambash, na micushcapash, tauca punllacunatami carcani. Churajuna illajpimi chirichijurcani.

28Ashtahuan imatapash yalica, tucui tandanajuj crijcunata yarishpami, punllandi ninanda llaquirijuni.

29Maijan huañujujpipash, ñucapash ¿nachu chashnallata tucuni? Maijandapash pandachishpa juchapi urmachijpica, ¿nachu ñucapash fiñarinapacha cani?

30Ñucapash jariyana cajpica, imatapash na rurai ushashcamandallami jariyasha.

31Ñuca na llullajujtaca, ñucanchi Apunchi Jesucristopaj Taita Diospash yachanmi. Paitaca, causaita causaicaman alicachishunchi.

32Damasco pueblopi cajpica, jatun mandaj Aretas churashca, llactata mandajmi ñucata japingapa shuyajurca. Chai Damasco pueblomanda llujshina pungucunapi ñucata chapachunmi, chapajcunata churarca.

33Chai pueblota muyushca jatun pircapi tiyaj ventanatami, shuj canastapi ñucataca uriajuchihuarca. Chashnami, ñucata japigrijuj runapaj maquimandaca quishpirircani.